മെൽബൺ: ട്വന്റി-20 ലോകകപ്പിന് മുന്നോടിയായുള്ള പരിശീലനത്തിനിടെ തലയ്ക്ക് പരിക്കേറ്റ പാക്കിസ്ഥാൻ ബാറ്റർ ഷാൻ മസൂദിനെ ആശുപത്രിയിൽ പ്രവേശിപ്പിച്ചു.
മെൽബൺ ക്രിക്കറ്റ് ഗ്രൗണ്ടിൽ ബാറ്റിംഗ് പരിശീലനം നടത്തുകയായിരുന്ന മുഹമ്മദ് നവാസ് തൊടുത്തുവിട്ട ഷോട്ട് തലയുടെ വലത് വശത്ത് കൊണ്ടാണ് മസൂദിന് പരിക്കേറ്റത്. ബാറ്റിംഗ് അവസരത്തിനായി കാത്തുനിൽക്കുകയായിരുന്ന മസൂദ് പന്ത് ശരീരത്തിൽ കൊണ്ടതോടെ നിലത്തേക്ക് വീണിരുന്നു.
ഗ്രൗണ്ടിൽ വച്ച് തന്നെ വൈദ്യസഹായം ലഭിച്ച മസൂദ് ആരോഗ്യം വീണ്ടെടുത്ത് നടന്നാണ് ആശുപത്രിയിലേക്ക് പോകാനുള്ള വാഹനത്തിലേക്ക് കയറിയത്. തലയ്ക്കേറ്റ പരിക്കായതിനാൽ മസൂദിനെ വിശദമായ പരിശോധനകൾക്ക് വിധേയനാക്കുമെന്ന് പാക്കിസ്ഥാൻ ക്രിക്കറ്റ് ബോർഡ് അറിയിച്ചു.