ഫിലഡൽഫിയ ∙ അഞ്ചു പതിറ്റാണ്ടുകളായി മാധ്യമ വ്യവസായത്തിൽ പ്രവർത്തിച്ച് ടെലിവിഷൻ റിപ്പോട്ടിങ്ങ് രംഗത്തെ കുലപതിയായ ഡാൻ ക്വയായ്ക്ക് ട്രൈസേറ്റ് കേരളാ ഫോറം മീഡിയാ മാഗ്നേറ്റ് അവാർഡ് സമ്മാനിച്ചു. ഫിലഡൽഫിയയിൽ ചാനൽ 6എബിസി ആക്ഷൻ ന്യൂസിൽ റിപ്പോർട്ടറും മൾട്ടിമീഡിയ പത്രപ്രവർത്തകനുമായി പ്രശസ്തനാണ് ഡാൻ ക്വയാ. അമേരിക്കൻ മലയാളികളിലെ മുതിർന്ന മാധ്യമ പ്രവർത്തകനായ വിൻസന്റ് ഇമ്മാനുവേലിന്റെ സുഹൃത്ത് എന്ന നിലയിൽ മലയാളികളുടെ വാർത്താ വിശേഷങ്ങൾ റിപ്പോർട്ട് ചെയ്യുന്നതിൽ ഡാൻ ക്വയാ നേതൃത്വം നൽകിയിട്ടുണ്ട്. കേരളത്തിലെ ആയുർവേദ ചികിത്സാ തത്വങ്ങളെക്കുറിച്ചും രീതികളെക്കുറിച്ചും കളരിപ്പയറ്റ്, കഥകളി, മോഹിനിയാട്ടം എന്നീ കലാ രൂപങ്ങളെക്കുറിച്ചും പഠിക്കുന്നതിന് ഡാൻ ക്വയാ ട്രൈസ്റ്റേറ്റ് കേരളാ ഫോറം ഭാരവാഹികൾക്കൊപ്പം വിൻസന്റ് ഇമ്മാനുവേലിന്റെ നേതൃത്വത്തിൽ അടുത്ത വർഷം ഇന്ത്യൻ പര്യടനം നടത്തുമെന്ന് അവാർഡ് സ്വീകരിച്ച് ഡാൻ വെളിപ്പെടുത്തി.
പ്രശസ്ത സിനിമാ താരം ഗീത, സിസ്റ്റർ ഡോ. ജോസ്ലിൻ ഇടത്തിൽ (ടെമ്പിൽ യൂണിവേഴ്സിറ്റി സ്കൂൾ ഓഫ് മെഡിസിൻ അസോസിയേറ്റ് പ്രൊഫസർ), ട്രൈസ്റ്റേറ്റ് കേരളാ ഫോറം ചെയർമാൻ സുമോദ് നെല്ലിക്കാലാ, ജനറൽ സെക്രട്ടറി സാജൻ വർഗീസ്, ട്രഷറാർ രാജൻ സാമുവേൽ, ഓണാഘോഷ ചെയർമാൻ വിൻസന്റ് ഇമ്മാനുവേൽ, ഓണാഘോഷ കോ ചെയർ ജോർജ് നടവയൽ, എക്സിക്യൂട്ടിവ് വൈസ് ചെയർമെൻ ഫീലിപ്പോസ് ചെറിയാൻ, ജോർജ് ഓലിക്കൽ, ജോബീ ജോർജ്, ജോയിന്റ് സെക്രട്ടറി റോണി വർഗീസ്, അസോസിയേറ്റ് ട്രഷറാർ ലെനോ സ്കറിയാ, സുരേഷ് നായർ, അലക്സ് തോമസ്, സുധാ കർത്താ, ജീമോൻ ജോർജ്, ജോർജ് ജോസഫ്, കുര്യൻ രാജൻ, ബെന്നി കൊട്ടാരത്തിൽ, ജോർജ് കടവിൽ എന്നിവർ ആശംസകൾ നേർന്നു.
ദി വാകോ ഉപരോധം, മുറാ ഫെഡറൽ ബിൽഡിംഗിലെ ഒക്ലഹോമ സിറ്റി ബോംബിംഗ് എന്നിവയുൾപ്പെടെ നിരവധി പ്രാദേശിക, ദേശീയ, രാജ്യാന്തര വാർത്തകൾ ഡാൻ ക്വയാ റിപ്പോർട്ട് ചെയ്തിട്ടുണ്ട്. ന്യൂയോർക്ക് നഗരത്തിലെ വേൾഡ് ട്രേഡ് സെന്ററിൽ നടന്ന ഭീകരാക്രമണം (2001), കൊളംബൈൻ ഹൈസ്കൂളിലെ കൂട്ടക്കൊല, കൊസോവോയിലെ ബോസ്നിയൻ സംഘർഷം (1995), ഇറാഖിലെ യുദ്ധം, ഹെയ്തിയിലെ അമേരിക്കൻ ഇടപെടൽ, 1991ലെ പേർഷ്യൻ ഗൾഫ് യുദ്ധം എന്നിവയുൾപ്പെടെയുള്ള സംഘട്ടനങ്ങളുടെ മുൻനിരയിൽ യുഎസ് സൈനികരുമായി നിലയുറപ്പിച്ച് ഡാൻ ക്വയാ റിപ്പോർട്ട് ചെയ്തു.
ടെക്സാസിലെ വിക്ടോറിയയിലാണ് അദ്ദേഹം വളർന്നത്. ടെക്സസിലെ വി വിക്ടോറിയ കോളേജിൽ ചേർന്നു, അവിടെ ആശയവിനിമയത്തിൽ ബിരുദം നേടി. കോളേജ് പഠനകാലത്ത് ഡാൻ ക്വയാ നാടക ക്ലബ്ബിൽ സജീവമായിരുന്നു. 2011 നവംബർ 18ന് ഫിലഡൽഫിയയുടെ “ഹാൾ ഓഫ് ഫെയിം” ബ്രോഡ്കാസ്റ്റ് പയനിയർമാരിൽ ഡാൻ ക്വയയെ ഉൾപ്പെടുത്തി. ജാമി അപ്പോഡി (ആങ്കർ & റിപ്പോർട്ടർ), വാൾട്ടർ പെരസ് (ആങ്കർ & ജനറൽ അസൈൻമെന്റ് റിപ്പോർട്ടർ), (അലി ഗോർമാൻ – ആരോഗ്യം & മെഡിക്കൽ റിപ്പോർട്ടർ), സാറാ ബ്ലൂംക്വിസ്റ്റ് (ആങ്കറും റിപ്പോർട്ടറും) എന്നിവർ 6എബിസിയിൽ ഡാന്റെ സഹപ്രവർത്തകരാണ്.
