കൊല്ലം: കഴിഞ്ഞ ഞായറാഴ്ച കൊവിഡ് സ്ഥിരീകരിച്ച ആലപ്പുഴ കായംകുളം സ്വദേശി ചികിത്സയില് കഴിഞ്ഞിരുന്ന കൊല്ലം മെഡിസിറ്റി ആശുപത്രിയിലെ 55 ഓളം ജീവനക്കാര് നിരീക്ഷണത്തില് . 9 ഡോക്ടര്മാരും 30 നഴ്സുമാരും 16 ശുചീകരണ തൊഴിലാളികളുമാണ് നിരീക്ഷണത്തില് പ്രവേശിച്ചത് .
ഈമാസം 23നാണ് കായംകുളംകാരനായ 65 കാരനെ മെഡിസിറ്റിയില് പ്രവേശിപ്പിച്ചത്.
ക്രിട്ടിക്കല് കെയര് യൂണിറ്റില് വെന്റിലേറ്ററിന്റെ സഹായത്തോടെ ഹൃദയാഘാതം, പക്ഷാഘാതം, വൃക്കസംബന്ധമായ രോഗങ്ങള് എന്നിവയ്ക്ക് ചികിത്സയിലായിരുന്നു. ഇതിനിടെ ന്യൂമോണിയ ബാധിച്ചപ്പോള് നടത്തിയ സ്രവ പരിശോധനയിലാണ് കൊവിഡ് സ്ഥിരീകരിച്ചത്. ഫലം വന്ന 28ന് രാത്രിയാണ് രോഗിയെ പാരിപ്പള്ളി മെഡിക്കല് കോളേജിലെത്തിച്ചത്. അദ്ദേഹത്തിന്റെ നില അല്പം ഗുരുതരമാണ്. നിലവില് വെന്റിലേറ്ററിന്റെ സഹായത്തോടെ റെസ്പിറേറ്ററി ഐ.സി.യുവിലാണ്. ജീവന് രക്ഷിക്കാനുള്ള ശ്രമങ്ങളുടെ ഭാഗമായി പ്ലാസ്മാ സര്ജറിക്കൊപ്പം ജീവന് രക്ഷാമരുന്നായ ടോസിലിസുമാബും കഴിഞ്ഞ ദിവസം നല്കിയിരുന്നു.