കൊച്ചി: കൂടത്തായി കൊലപാതക പരമ്പര കേസിലെ മുഖ്യപ്രതി ജോളിയുടെ ജാമ്യ ഹര്ജി ഹൈക്കോടതി വീണ്ടും തള്ളി. രണ്ടാം ഭര്ത്താവ് ഷാജുവിന്റെ ഭാര്യ സിലിയെ കൊലപ്പെടുത്തിയ കേസില് ജാമ്യം തേടി നല്കിയ ഹര്ജിയിലാണ് സിംഗിള് ബെഞ്ച് ഉത്തരവ്. ഭര്ത്താവ് റോയ് തോമസിന്റെ കൊലപാതകവുമായി ബന്ധപ്പെട്ട് പോലീസ് രജിസ്റ്റര് ചെയ്ത കേസില് ജോളിക്ക് നേരത്തെ ജാമ്യം നിഷേധിച്ചിരുന്നു.
അതേസമയം, കൂടത്തായി കൊലപാതക പരമ്ബര കേസിലെ വിചാരണ നടപടികള് ഓഗസ്റ്റ് 11ലേക്ക് മാറ്റിയിരുന്നു. ജോളിയുടെ രണ്ടാം ഭര്ത്താവിന്റെ ഭാര്യയായിരുന്ന സിലിയെ കൊലപ്പെടുത്തിയ കേസാണ് ആദ്യം പരിഗണിക്കുന്നത്. സിലി 2016 ജനുവരി 11-നാണു മരിച്ചത്. ക്യാപ്സൂളില് സയനൈഡ് നിറച്ചു നല്കി ജോളി ജോസഫ് ഇവരെ കൊലപ്പെടുത്തിയെന്നാണു കേസ്. ജോളിക്കു സയനൈഡ് എത്തിച്ചു നല്കിയ ജൂവലറി ജീവനക്കാരനും റോയിയുടെ അമ്മാവന്റെ മകനുമായ കക്കാവയല് മഞ്ചാടി വീട്ടില് എം.എസ്.മാത്യു എന്ന ഷാജി (44), മാത്യുവിന് സയനൈഡ് നല്കിയ സ്വര്ണപ്പണിക്കാരന് താമരശേരി തച്ചംപൊയിലിലെ മുള്ളമ്പലത്തില് പ്രജികുമാര് (48) എന്നിവരാണ് കേസിലെ രണ്ടും മൂന്നും കൂട്ടുപ്രതികള്.