കൊച്ചി: 51 വയസുകാരിയെ വിവാഹം കഴിച്ച് രണ്ടു മാസത്തിനുശേഷം ഷോക്കടിപ്പിച്ചു കൊലപ്പെടുത്തിയ കേസില്‍ ഭര്‍ത്താവിന് ഹൈക്കോടതി ജാമ്യം അനുവദിച്ചു.
കാരക്കോണം സ്വദേശിനിയായ ശാഖാകുമാരിയെ കൊലപ്പെടുത്തിയ കേസില്‍ ഭര്‍ത്താവ് അരുണിന് (29) ആണ് ഉപാധികളോടെ ജാമ്യം അനുവദിച്ചത്.
വിചാരണക്കോടതി അനുവദിച്ച ജാമ്യം റദ്ദാക്കി കീഴടങ്ങാന്‍ നിര്‍ദേശിച്ച സിംഗിള്‍ബെഞ്ചിന്‍റെ ഉത്തരവിനെത്തുടര്‍ന്ന് അരുണ്‍ നല്‍കിയ ജാമ്യാപേക്ഷയാണ് ഹൈക്കോടതി അനുവദിച്ചത്.
വിചാരണ ആറു മാസത്തിനകം പൂര്‍ത്തിയാക്കാനും ജസ്റ്റീസ് ബെച്ചു കുര്യന്‍ തോമസ് നിര്‍ദേശിച്ചു.അറസ്റ്റിലായി ഒന്നരവര്‍ഷമായിട്ടും വിചാരണ ഉടന്‍ നടക്കാനുള്ള സാധ്യത വിരളമാണെന്നു വിലയിരുത്തിയാണ് 50,000 രൂപയുടെ ബോണ്ടും തുല്യ തുകയ്ക്കുള്ള ആള്‍ജാമ്യവും വ്യവസ്ഥ ചെയ്ത് ജാമ്യം അനുവദിച്ചത്.
2020 ഒക്ടോബര്‍ 16 നാണ് അരുണ്‍ ശാഖാകുമാരിയെ വിവാഹം കഴിച്ചത്. ഒരു കുഞ്ഞു വേണമെന്നാവശ്യപ്പെട്ട് ശാഖാകുമാരി വഴക്കുണ്ടാക്കിയതിനെത്തുടര്‍ന്ന് 2020 ഡിസംബര്‍ 26ന് ഇവരെ ഷോക്കടിപ്പിച്ചു കൊലപ്പെടുത്തിയെന്നാണ് കേസ്.
