നടി എന്നതിലുപരി സൽമാൻ ഖാന്റെ മുൻ കാമുകി കൂടിയാണ് സോമി അലി. ഇരുവരും തമ്മിലുള്ള ബന്ധം അധികനാൾ നീണ്ടുനിന്നില്ലെങ്കിലും ഇപ്പോഴും ഈ ബന്ധം ചർച്ചയാകാറുണ്ട്. സോമിയും സൽമാൻ ഖാനും തമ്മിലുള്ള ബന്ധത്തിൽ ഒരുപാട് അകലം ഉണ്ടായിട്ടുണ്ട്. അതിനു തെളിവാണ് സൽമാൻ ഖാനെ കടന്നാക്രമിച്ചുകൊണ്ടുള്ള സോമിയുടെ പല സോഷ്യൽമീഡിയ പോസ്റ്റുകളും.
ഇത്തവണ പുതിയ സോഷ്യൽമീഡിയ പോസ്റ്റിലും സോമി അലി സൽമാൻ ഖാനെതിരെ ആരോപണങ്ങൾ ഉന്നയിച്ചിട്ടുണ്ട്. സൽമാൻ ഖാനൊപ്പമുള്ള ഒരു ത്രോബാക്ക് ചിത്രം പങ്കുവച്ചിരിക്കുകയാണ് സോമി. അതിൽ സൽമാൻ റോസാപ്പൂവ് നൽകുന്നതായി കാണാം. പലതും സംഭവിക്കാൻ പോകുന്നു- എന്ന അടിക്കുറിപ്പോടെയാണ് സോമി ചിത്രം പങ്കുവച്ചിരിക്കുന്നത്. എന്റെ ഷോ ഇന്ത്യയിൽ നിരോധിക്കുകയും പിന്നീട് കേസെടുക്കുമെന്ന് ഭീഷണിപ്പെടുത്തുകയും ചെയ്തു. നീ ഒരു ഭീരുവാണ് വർഷങ്ങളായി നിങ്ങൾ എന്നോട് ചെയ്തിരുന്ന സിഗരറ്റ് പൊള്ളലിൽ നിന്നും, ശാരീരിക പീഡനങ്ങളിൽ നിന്നും എന്നെ രക്ഷിക്കാൻ ഇവിടെ 50 അഭിഭാഷകർ നിൽക്കുന്നു”- എന്നായിരുന്നു സോമിയുടെ പോസ്റ്റ്.
സൽമാനെ പിന്തുണച്ചവരോട് സോമി ദേഷ്യപ്പെടുകയും ചെയ്തു. സ്ത്രീകളെ ആക്രമിക്കുന്ന ഈ മനുഷ്യനെ പിന്തുണയ്ക്കുന്ന എല്ലാ നടിമാരോടും ലജ്ജ തോന്നുന്നുവെന്നും സോമി എഴുതി. ഇതിനെ പിന്തുണച്ച ഇത്തരം അഭിനേതാക്കളും ലജ്ജിക്കണം. ഇപ്പോൾ പോരാടാനുള്ള സമയമാണ്.’- സോമി പറഞ്ഞു.
സൽമാനെ കുറിച്ചുള്ള സോമിയുടെ പോസ്റ്റ് സോഷ്യൽ മീഡിയയിൽ വൈറലായിയെങ്കിലും പിന്നീട് നടി ഈ പോസ്റ്റ് ഡിലീറ്റ് ചെയ്തു. പോസ്റ്റ് ഡിലീറ്റ് ചെയ്യാനുള്ള കാരണം എന്താണെന്ന് സോമിക്ക് മാത്രമേ പറയാൻ സാധിക്കൂ, എന്നാൽ ആ പോസ്റ്റ് ബോളിവുഡിൽ കോളിളക്കം സൃഷ്ടിച്ചിരിക്കുകയാണ്.
സോമി അലി മുമ്പ് പലതവണ സൽമാൻ ഖാനെ ലക്ഷ്യം വച്ചിട്ടുണ്ട്. തന്റെ പോസ്റ്റുകളിൽ സൽമാനെതിരെ ഗുരുതരമായ ആരോപണങ്ങൾ പലപ്പോഴും ഉന്നയിക്കാറുണ്ട്. സോമി അലി സൽമാൻ ഖാന്റെ വലിയ ആരാധകനായിരുന്ന ഒരു കാലമുണ്ടായിരുന്നു. ഇരുവരും ഏറെ നാൾ ഡേറ്റിംഗിലുമായിരുന്നു. സൽമാൻ തന്നെ ചതിച്ചെന്നും അതിനാൽ സൽമാനെ ഉപേക്ഷിച്ചെന്നുമാണ് സൽമാൻ ഖാനുമായുള്ള ബന്ധം വേർപ്പെടുത്താനുള്ള കാരണമായി സോമി തന്റെ പഴയ ഒരു അഭിമുഖത്തിൽ പറഞ്ഞത്.
