ബ്രിട്ടനില്‍ മേയ് അഞ്ചിന് പ്രാദേശിക കൗണ്‍സിലുകളിലേക്കു നടക്കുന്ന തെരഞ്ഞെടുപ്പില്‍ മത്സരിക്കാന്‍ വീണ്ടും മലയാളികള്‍. കേംബ്രിജിലെ ഈസ്റ്റ് ചെസ്റ്റര്‍ട്ടന്‍ ഡിവിഷനില്‍ ലേബര്‍ പാര്‍ട്ടിയുടെ സ്ഥാനാര്‍ഥിയായി, മുന്‍പ് 2018 ല്‍ കൗണ്‍സിലറായി തെരഞ്ഞെടുക്കപ്പെട്ടിട്ടുള്ള കോട്ടയം ആര്‍പ്പൂക്കര കരിപ്പൂത്തട്ട് സ്വദേശി ബൈജു വര്‍ക്കി തിട്ടാല, ലണ്ടനിലെ ബാര്‍ക്കിങ് ആന്‍ഡ് ഡഗനാം കൗണ്‍സിലിലെ വെയില്‍ബോണ്‍ വാര്‍ഡില്‍ കണ്‍സേര്‍വേറ്റീവ് പാര്‍ട്ടിയുടെ സ്ഥാനാര്‍ഥിയായി പെരുമ്ബാവൂര്‍ സ്വദേശി സുഭാഷ് നായര്‍, ഹണ്ടിങ് ടണ്‍ ഷെയര്‍ ഡിസ്ട്രിക്‌ട് കൗണ്‍സിലിലെ ഹണ്ടിങ്ങ്ടണ്‍ നോര്‍ത്ത് വാര്‍ഡില്‍നിന്നും കണ്‍സേര്‍വേറ്റീവ് പാര്‍ട്ടി സ്ഥാനാര്‍ഥിയായി അങ്കമാലി സ്വദേശിയായ ലീഡോ ജോര്‍ജ് എന്നിവരാണു മത്സരിക്കുന്നത്. കേംബ്രിജില്‍ മത്സരിക്കുന്ന ബൈജു വര്‍ക്കി തിട്ടാല പ്രാക്ടീസിംഗ് സോളിസിറ്റര്‍ ആണ്. നിയമത്തില്‍ ഉന്നത വിദ്യാഭ്യാസം നേടി ക്രിമിനല്‍ ഡിഫന്‍സ് കോര്‍ട്ട് ഡ്യൂട്ടി സോളിസിറ്റര്‍ ആയി പ്രവര്‍ത്തിക്കുന്ന ബൈജു ബ്രിട്ടനിലെത്തിയ കാലം മുതല്‍ പൊതുരംഗത്തും രാഷ്‌ട്രീയത്തിലും സജീവമാണ്.
എന്‍എച്ച്‌എസ് ജീവനക്കാരിയായ ആന്‍സിയാണ് ഭാര്യ ഡഗനാമില്‍ മത്സരിക്കുന്ന സുഭാഷ് നായര്‍ ഐ ടി പ്രഫഷണലാണ്. യുകെയില്‍ എത്തിയ കാലം മുതല്‍ വിവിധ മലയാളി സംഘടനകളുടെ തലപ്പത്തുണ്ട്. ലണ്ടന്‍ മലയാളീ ഹിന്ദു സമാജം, നാഷണല്‍ കൗണ്‍സില്‍ ഫോര്‍ ഹിന്ദു ഹെറിറ്റേജ് ഉള്‍പ്പടെയുള്ള വിവിധ സംഘടനകളുടെ സംഘാടകനുമാണ്. എന്‍എച്ച്‌ എസില്‍ നഴ്‌സായ സുജയാണു ഭാര്യ. ഹണ്ടിംഗ്ടണില്‍ മത്സരിക്കുന്ന ലീഡോ മുന്‍പ് ഇതേ വാര്‍ഡില്‍നിന്നുതന്നെ കൗണ്‍സിലറായി വിജയിച്ചിട്ടുണ്ട്. സ്വന്തമായി നഴ്സിംഗ് ഏജന്‍സി നടത്തുന്ന ലീഡോയുടെ ഭാര്യ റാണി എന്‍എച്ച്‌എസില്‍ നേഴ്സ് ആയി ജോലി ചെയ്യുന്നു.
