തിരുവനന്തപുരം: മന്ത്രി വി.എന്.വാസവന്റെ സഞ്ജയ് ഗാന്ധി വിരുദ്ധ പരാമര്ശത്തില് പ്രതിഷേധിച്ച് പ്രതിപക്ഷം നിയമസഭ ബഹിഷ്കരിച്ചു. ചൊവ്വാഴ്ച കേരള സഹകരണ സംഘം ഭേദഗതി ബില്ലിന്മേലുള്ള ചര്ച്ചയ്ക്കു മറുപടി പറയവേയാണ് മന്ത്രി പരാമര്ശം നടത്തിയത്.
‘അടിയന്തരാവസ്ഥ പ്രഖ്യാപിച്ച് ഇന്ദിരാഗാന്ധി രാജ്യത്തെ ജനാധിപത്യത്തെ കൊല ചെയ്യുമ്പോള് സഞ്ജയ് ഗാന്ധി റുക്സാന സുല്ത്താന എന്ന മാദക സുന്ദരിയുടെ മടിയില് തലവച്ചു കിടക്കുകയായിരുന്നു’ എന്ന വാചകമാണ് പ്രതിപക്ഷ ബഹളത്തിനിടയാക്കിയത്.
സഞ്ജയ് ഗാന്ധിയെ വ്യക്തിപരമായി ആക്ഷേപിക്കുന്ന വാക്കുകള് പിന്വലിക്കണമെന്ന് പ്രതിപക്ഷ നേതാവ് വി.ഡി. സതീശന് ആവശ്യപ്പെട്ടു. ഇക്കാര്യം പിന്നീടു പരിശോധിക്കാമെന്ന് ഡപ്യൂട്ടി സ്പീക്കര് മറുപടി നല്കിയെങ്കിലും പ്രതിപക്ഷം നിലപാടില് ഉറച്ചുനിന്നു. പിന്നീടു സഭ വിട്ടിറങ്ങി.