ഇടുക്കി: ഇടുക്കി തങ്കമണി യൂദാഗിരിയിലെ മന്ത്രവാദ കേന്ദ്രത്തിനെതിരെ സിപിഎം പ്രതിഷേധം. കേന്ദ്രത്തിലെ മന്ത്രവാദ ബലിത്തറകള് സിപിഎം പ്രവര്ത്തകര് പൊളിച്ചു നീക്കി. മൃഗബലി അടക്കം നടക്കുന്നു എന്നാരോപിച്ചായിരുന്നു പ്രതിഷേധം.
തങ്കമണി യൂദാഗിരിയില് റോബിന് എന്നയാളുടെ സ്ഥലത്ത് അദ്ദേഹത്തിന്റെ വീടിനോട് ചേര്ന്നാണ് മന്ത്രവാദ കേന്ദ്രം നടന്നുവന്നത്. ഞായറാഴ്ച പോലീസ് നടത്തിയ പരിശോധനയില് ബലിത്തറകളും പൂജാ സാമഗ്രികളും, ബലിക്ക് ഉപയോഗിച്ചിരുന്ന കത്തി ഉള്പ്പെടെയുള്ളവ കണ്ടെത്തിയിരുന്നു. പോലീസ് താക്കീത് നല്കി മടങ്ങിയെങ്കിലും ബലിത്തറകള് പൊളിച്ചു നീക്കിയിരുന്നില്ല.
വാഴത്തടകള് കൊണ്ട് മൂടിയിട്ട നിലയിലായിരുന്നു ബലിത്തറകള്. ഒരു ബലിത്തറയില് മന്ത്രവാദം നടത്തി കത്തി കുത്തിവച്ച നിലയിലുമായിരുന്നു. ഇത് സിപിഎം പ്രവർത്തകർ നീക്കം ചെയ്തു.