ന്യൂയോര്‍ക്ക്: കോവിഡ് മഹാമാരിയെത്തുടര്‍ന്നുള്ള അടിയന്തര സാഹചര്യം കണക്കിലെടുത്ത് കോവിഡ് വാക്സിനുള്ള ബൗദ്ധിക സ്വത്തവകാശം താത്കാലികമായി യുഎസിലെ ബൈഡന്‍ ഭരണകൂടം പിന്‍വലിക്കും. ലോകാരോഗ്യരംഗം അസാധാരണമായ ഒരു പ്രതിസന്ധിയിലൂടെയാണു കടന്നുപോകുന്നത്. യുഎസ് ഭരണകൂടം ബൗദ്ധിക സ്വത്തവകാശത്തില്‍ ശക്തമായി വിശ്വസിക്കുന്നു. എന്നാല്‍, ഈ മഹാമാരി ഇല്ലാതാക്കാന്‍ കോവിഡ് വാക്സിനുള്ള ബൗദ്ധിക സ്വത്തവകാശം പിന്‍വലിക്കുന്നതിനെ പിന്തുണയ്ക്കുന്നു- യുഎസ് ട്രേഡ് പ്രതിനിധി കാതറീന്‍ തായി പറഞ്ഞു.
അമേരിക്കയ്ക്കു വാക്സിന് നല്‍കിയശേഷം ലോകത്തിനു വാക്സിന് നല്‍കുകയാണു ബൈഡന്‍ ഭരണകൂടത്തിന്‍റെ നയം. നിരവധി കോവിഡ് വാക്സിനുകള്‍ക്കു യുഎസ് അനുമതി നല്‍കിയിട്ടുണ്ട്. ഫലപ്രദമായ രീതിയില്‍ ഇതു ജനങ്ങള്‍ക്ക് എത്തിക്കുന്നതിനുള്ള ശ്രമമാണു നടക്കുന്നത്- തായി പറഞ്ഞു.
യുഎസ് പ്രസിഡന്‍റ് ബൈഡന്‍റെ പ്രഖ്യാപനം കോവിഡ്-19 നെതിരേയുള്ള പോരാട്ടത്തിലെ ചരിത്ര നിമിഷമാണെന്ന് ലോകാരോഗ്യ സംഘടനാ മേധാവി ടെഡ്രോസ് അദനോം ഗബ്രിയെസിസ് പറഞ്ഞു. അമേരിക്കയുടെ തീരുമാനത്തെ ഓസ്‌ട്രേലിയ, ഫ്രാന്‍സ്, ന്യൂസിലന്‍ഡ് രാജ്യങ്ങള്‍ പിന്തുണച്ചു. വാക്‌സിനുമേലുള്ള ബൗദ്ധിക സ്വത്തവകാശം പിന്‍വലിച്ചാല്‍ വിവിധ മരുന്നുകന്പനികള്‍ക്കു വന്‍തോതില്‍ കോവിഡ് വാക്സിന് നിര്‍മിക്കാന്‍ സാധിക്കും.
