കണ്ണൂർ: ലോക്സഭാ തെരഞ്ഞെടുപ്പ് സംസ്ഥാനസർക്കാരിൻ്റെ വിലയിരുത്തൽ അല്ലെന്ന് സിപിഎം സംസ്ഥാന സെക്രട്ടറി എം വി ഗോവിന്ദൻ പറഞ്ഞു. തളിപ്പറമ്പിൽ വോട്ടു രേഖപ്പെടുത്തിയതിനു ശേഷം മാധ്യമ പ്രവർത്തകരോട് സംസാരിക്കുകയായിരുന്നു അദ്ദേഹം. നിങ്ങൾക്ക് വേണമെങ്കിൽ അങ്ങനെ എഴുതിക്കൊള്ളൂ. ഞങ്ങൾക്ക് അതിൽ പ്രശ്നമൊന്നുമില്ല. ഈ കാര്യത്തിൽ ഞങ്ങൾക്ക് നല്ല ആത്മവിശ്വാസമുണ്ടെന്നും അദ്ദേഹം കൂട്ടിച്ചേർത്തു.
കേരളത്തിൽ യുഡിഎഫ് തരംഗമാണെന്ന ചാനലുകളുടെയും പത്രങ്ങളുടെയും സർവേകൾ തെറ്റാണ്. ചരിത്രത്തിൽ ഇല്ലാത്ത ഭൂരിപക്ഷം ഇക്കുറി എൽഡിഎഫ് നേടും. രാജ്യത്ത് ഭരിക്കുന്ന സർക്കാരിനെതിരെയുള്ള ജനവിധിയാണ് ഇക്കുറിയുണ്ടാവുകയെന്നതിൽ തർക്കമില്ല.
മുഖ്യമന്ത്രിക്കെതിരെയുള്ള ആരോപണങ്ങൾ കെട്ടിച്ചമച്ചതാണെന്ന് ലാവ്ലിൻ കേസിലുടെ വ്യക്തമായതല്ലേ. ലാവ്ലിനിൽ അഴിമതി നടന്നിട്ടുണ്ടോയെന്ന കാര്യത്തിൽ ഇനിയും സുപ്രീം കോടതി തീർപ്പു കൽപ്പിക്കേണ്ടതിൻ്റെ വിചാരണയാണ് ഇപ്പോൾ നടന്നു വരുന്നതെന്നും അത്തരത്തിൽ ഒരു കേസേയില്ലെന്നും എം വി ഗോവിന്ദൻ പറഞ്ഞു.
