മുംബൈ: ബോളിവുഡ് താരം സുശാന്ത് സിംഗ് രജ്പുതിന്റെ മരണവുമായി ബന്ധപ്പെട്ട് സംവിധായകന്‍ സഞ്ജയ് ലീല ബന്‍സാലിയെ ഇന്നലെ ബാന്ദ്ര പോലീസ് ചോദ്യം ചെയ്തു.രജ്പുതിനെ നായകനാക്കി നാലു സിനിമകള്‍ നിര്‍മിക്കാന്‍ ബന്‍സാലി തീരുമാനിച്ചിരുന്നു. എന്നാല്‍, തീയതി സംബന്ധിച്ചും മറ്റുമുള്ള തര്‍ക്കത്തിനിടെ ഈ പ്രോജക്ടുകള്‍ താന്‍ ഉപേക്ഷിക്കുകയായിരുന്നുവെന്നു ബന്‍സാലി പറഞ്ഞു.
സുശാന്ത് സിംഗിന്റെ മരണവുമായി ബന്ധപ്പെട്ട് ഇതുവരെ 28 പേരെ ചോദ്യം ചെയ്തിട്ടുണ്ട്. സുശാന്ത് അവസാനം അഭിനയിച്ച ചിത്രമായ ദില്‍ ബെചാരയില്‍ ഒപ്പം അഭിനയിച്ച സഞ്ചന സംഘിയുടെ മൊഴിയും പൊലീസ് കഴിഞ്ഞയാഴ്ച രേഖപ്പെടുത്തിയിരുന്നു. ജൂണ്‍ 14 നാണ് മുംബൈ ബാന്ദ്രയിലെ ഫ്‌ളാറ്റില്‍ സുശാന്തിനെ മരിച്ച നിലയില്‍ കണ്ടെത്തുന്നത്.
