ന്യൂഡല്ഹി : ഇറ്റാലിയന് എണ്ണക്കപ്പലായ എന്റിക്ക ലക്സിയിലെ നാവികരുടെ വെടിയേറ്റ് മത്സ്യത്തൊഴിലാളികള് കൊല്ലപ്പെട്ട കേസില് ഇന്ത്യക്ക് നഷ്ടപരിഹാരത്തിന് അര്ഹതയുണ്ടെന്ന് അന്താരാഷ്ട്ര ആര്ബിട്രേഷന് ട്രൈബ്യൂണല് വിധി .
ജീവഹാനിക്കും ശാരീരിക ഉപദ്രവത്തിനും സെന്റ് ആന്റണി എന്ന മത്സ്യബന്ധന ബോട്ടിലെ ക്യാപ്റ്റന് അടക്കമുള്ളവര് നേരിടേണ്ടി വന്ന മാനസികവ്യഥയും കണക്കിലെടുത്താണു വിധി . നഷ്ടപരിഹാരത്തുക ഇരു രാജ്യങ്ങളും കൂടിയാലോചിച്ചു തീരുമാനിക്കണം.
ഇറ്റാലിയന് നാവികര്ക്കെതിരായ ക്രിമിനല് നടപടികള് അവസാനിപ്പിക്കാന് ഇന്ത്യ അടിയന്തര നടപടിയെടുക്കണമെന്നും ട്രൈബ്യൂണല് നിര്ദേശിച്ചു . 2012 ഫെബ്രുവരി 15നാണ് കേസിനാസ്പദമായ സംഭവം നടക്കുന്നത് . സെന്റ് ആന്റണി എന്ന മത്സ്യബന്ധന ബോട്ടിലെ മലയാളി ഉള്പ്പെടെ രണ്ടു മത്സ്യത്തൊഴിലാളികള് കൊല്ലപ്പെട്ട സംഭവത്തില് ഇറ്റാലിയന് നാവികരായ സാല്വത്തോറെ ജിറോണിനെയും മാസിമിലാനോ ലാത്തോറയെയും അറസ്റ്റ് ചെയ്തിരുന്നു.
പിന്നീട് ജാമ്യം ലഭിച്ച പ്രതികള് രാജ്യം വിടുന്നതു വിലക്കിയെങ്കിലും ആരോഗ്യകാരണങ്ങള് ചൂണ്ടിക്കാട്ടി മാസിമിലാനോ ആദ്യവും സാല്വത്തോറെ ജിറോണ് പിന്നീടും ഇറ്റലിയിലേക്കു പോയി . ഐക്യരാഷ്ട്രസഭാ ചട്ടം അനുസരിച്ച് കടല്നിയമങ്ങള് തീര്പ്പാക്കാനുള്ള അന്താരാഷ്ട്ര ട്രൈബ്യൂണലാണ് കേസില് ഇന്ത്യക്ക് അനുകൂലമായി വിധി പറഞ്ഞിരിക്കുന്നത് . ഇന്ത്യയുടെ പരമാധികാരത്തെ വെല്ലുവിളിച്ചുവെന്നതും ഇന്ത്യക്കാരുടെ സമുദ്ര സഞ്ചാര സ്വാതന്ത്ര്യത്തെ ചോദ്യം ചെയ്തുവെന്നതും ഉള്പ്പെടെയുള്ള വാദങ്ങളാണ് ഇന്ത്യ ട്രൈബ്യൂണലിനു മുന്നില്വച്ചത് . ഇതെല്ലാം ട്രൈബ്യൂണല് ശരിയെന്ന് അംഗീകരിച്ചു .