വയനാട്: നിയമസഭാ തെരഞ്ഞെടുപ്പ് അടുക്കവേ ശബരിമല വിഷയം വിടാതെ കോണ്‍ഗ്രസ്. പ്രതിപക്ഷ നേതാവ് രമേശ് ചെന്നിത്തല നയിക്കുന്ന ഐശ്വര്യ കേരള യാത്രയുടെ ഉദ്ഘാടന വേളയില്‍ മുന്‍ മുഖ്യമന്ത്രി ഉമ്മന്‍ ചാണ്ടി ഉയര്‍ത്തിയ ശബരിമല വിഷയം കോണ്‍ഗ്രസ് വീണ്ടും സജ്ജീവമാക്കുകയാണ്. ശബരിമലയെക്കുറിച്ച്‌ ഇരുപാര്‍ട്ടികളും മിണ്ടുന്നില്ലെന്ന് ചെന്നിത്തല പറഞ്ഞു. റിവ്യൂ ഹര്‍ജി വേഗത്തിലാക്കുമോ? പാര്‍ലമെന്റില്‍ നിയമം കൊണ്ടുവരുമോ? സിപിഎമ്മും ബിജെപിയും ഒറ്റക്കെട്ടാണെന്നും ചെന്നിത്തല ആരോപിച്ചു.
ശബരിമല സ്ത്രീ പ്രവേശനം ഏറ്റവുമധികം വേദനിപ്പിച്ച സംഭവമാണ്. ഭക്തര്‍ക്ക് മുറിവുണ്ടാക്കി. ശബരിമല വിഷയത്തില്‍ പുനഃപരിശോധ ഹര്‍ജി സുപ്രീം കോടതിയുടെ പരിഗണനയിലാണ്. ഇത് വേഗത്തില്‍ തീര്‍പ്പാക്കാന്‍ സംസ്ഥാന സര്‍ക്കാര്‍ ഇടപെടുമോയെന്നും പ്രതിപക്ഷ നേതാവ് ചോദിച്ചു. ശബരിമലയെ കലാപഭൂമിയാക്കി മാറ്റി ബിജെപിയെ വളര്‍ത്താനാണ് സര്‍ക്കാരിന്‍റെ ശ്രമമെന്നും ചെന്നിത്തല കുറ്റപ്പെടുത്തി.
അവാര്‍ഡ് വിതരണത്തെക്കുറിച്ച്‌ പ്രതികരിച്ചത് ചലച്ചിത്രതാരങ്ങളുടെ ആവശ്യപ്രകാരാണ്. അവാര്‍ഡ് ജേതാക്കളെ അപമാനിച്ചുവെന്ന നിലപാടില്‍ ഉറച്ചു നില്‍ക്കുന്നുെവന്നും ചെന്നിത്തല പറഞ്ഞു. സംസ്ഥാന ചലച്ചിത്ര അവാര്‍ഡിനെച്ചൊല്ലിയുള്ള വിവാദം അനാവശ്യമെന്നു ഇന്നലെ മന്ത്രി പ്രതികരിച്ചിരുന്നു. കോവിഡ് പ്രോട്ടോക്കോള്‍ പാലിക്കുന്നതിനാണ് പുരസ്കാരം കൈതൊടാതെ നല്‍കിയത്. അവാര്‍ഡ് ജേതാക്കളാരും പരാതി പറ‍ഞ്ഞിട്ടില്ലെന്നും മന്ത്രി പറഞ്ഞു.
