കോഴിക്കോട്: പയ്യോളിക്കടുത്ത് തിക്കോടിയില്‍ വഴിത്തര്‍ക്കവുമായി ബന്ധപ്പെട്ട് കൂട്ടത്തല്ല്. അയല്‍വാസികള്‍ തമ്മിലുണ്ടായ അടിപിടിയുടെ ദൃശ്യങ്ങള്‍ സമൂഹമാധ്യമങ്ങളില്‍ വൈറലായി. സ്ത്രീകളും പുരുഷന്മാരുമെല്ലാം അടിയില്‍ പങ്കാളികളായിട്ടുണ്ട്. മതില്‍കെട്ടാനെത്തിയ ജോലിക്കാര്‍ക്കും അടിയേറ്റതായാണ് വിവരം. തിക്കോടി കോഴിപ്പുറത്ത് ശനിയാഴ്ചയാണ് സംഭവമുണ്ടായത്.
പുറക്കാട് റോഡില്‍ നിന്നും പുതുക്കുടി റോഡിലേക്ക് പോകുന്നഭാഗത്ത് റോഡ് വെട്ടുന്നതിന്റെ ഭാഗമായി സ്ഥലത്തിന്റെ അതിര്‍ത്തി നിര്‍ണയിച്ചതുമായി ബന്ധപ്പെട്ടാണ് തര്‍ക്കമുണ്ടായത്. സ്ഥലം വിട്ടുനല്‍കുന്നതു സംബന്ധിച്ച് നേരത്തെ തന്നെ കേസും മറ്റും നിലനിന്നിരുന്നതാണിവിടെ. നിരവധി കുടുംബങ്ങള്‍ക്ക് ഉപകാരപ്പെടുന്ന റോഡ് നിര്‍മിക്കണമെന്ന ആവശ്യം പ്രദേശവാസികള്‍ ദീര്‍ഘനാളായി ഉന്നയിക്കുന്നതാണ്.
ഇതിന്റെ അടിസ്ഥാനത്തില്‍ റോഡ് നിര്‍മിക്കാനെത്തിയവരെ എതിര്‍പക്ഷം തടയുകയായിരുന്നു. വാക്കേറ്റം പൊടുന്നനെ കൂട്ടത്തല്ലായി മാറി. വീഡിയോ പ്രചരിച്ചതോടെ സംഭവം ചര്‍ച്ചയാകുകയും ജനപ്രതിനിധികളടക്കം വിഷയത്തില്‍ ഇടപെടുകയും പ്രശ്‌നപരിഹാരമുണ്ടാക്കുകയും ചെയ്തിട്ടുണ്ട്. അതിര്‍ത്തി നിര്‍ണയിച്ച് റോഡ് നിര്‍മിക്കാനാണ് മധ്യസ്ഥ ചര്‍ച്ചയിലെ തീരുമാനം. പരാതിയില്ലാത്തതിനാല്‍ പോലീസ് കേസെടുത്തിട്ടില്ല. എന്നാല്‍ അടിപിടി സംബന്ധിച്ച വിവരശേഖരണം നടത്തിയിട്ടുണ്ട്.
