ദുബായ്: വാരാന്ത്യ ദിവസങ്ങളിൽ പത്രങ്ങൾ പ്രസിദ്ധീകരിക്കുന്നത് അവസാനിപ്പിച്ച് യുഎഇ മാധ്യമങ്ങൾ. ഗൾഫ് ന്യൂസ്, ഖലീജ് ടൈംസ് അടക്കമുള്ള മാധ്യമങ്ങളാണ് പ്രിന്റിങ്ങ് അവസാനിപ്പിച്ചതായി പറഞ്ഞിരിക്കുന്നത്.
പരസ്യദാതാക്കൾക്കും ബിസിനസ് പാർട്നേഴ്സിനും വേണ്ടി മെയ് 29ന് പുറത്തിറക്കിയ ഒരു കുറിപ്പിലാണ് ഇക്കാര്യങ്ങൾ പറയുന്നത്. ജൂൺ മൂന്ന് ശനിയാഴ്ച മുതലാണ് പത്രം പ്രിന്റിങ്ങിന് അവധിയുണ്ടാകുന്നത്.
അതേസമയം, ഓൺലൈൻ സേവനങ്ങൾ അവസാനിപ്പിക്കില്ലെന്ന് അധികൃതർ അറിയിച്ചിട്ടുണ്ട്. “വാർത്തകൾക്കും വിവരങ്ങൾക്കുമായി ഞങ്ങളുടെ ഓൺലൈൻ പ്ലാറ്റ്‌ഫോമുകൾ തിരിയുന്നവരുടെ എണ്ണം കൂടുന്നതിനനുസരിച്ച് വായനക്കാരുടെ മുൻഗണനയിലും ഉപഭോഗ ശീലങ്ങളിലും കാര്യമായ മാറ്റമുണ്ടെന്ന് നിരീക്ഷിച്ചു, ഈ മാറ്റം വരുത്തിയ ചലനാത്മകതയുമായി ഞങ്ങൾ പൊരുത്തപ്പെടുകയും തന്ത്രപരമായി ഞങ്ങളുടെ വിഭവങ്ങൾ പുനഃക്രമീകരിക്കുകയും ചെയ്യേണ്ടത് നിർണായകമാണ്,” കത്തിലൂടെ സെയിൽസ് & പബ്ലിഷിംഗ് ഡയറക്ടർ അൻഷുമാൻ ജോഷി പറഞ്ഞു.
അവധി ഏർപ്പെടുത്തിയുള്ള തീരുമാനം നിസാരമായി എടുത്തതല്ലെന്ന് ഉറപ്പ് നൽകാൻ ആഗ്രഹിക്കുന്നതായും മാധ്യമസ്ഥാപനം പറഞ്ഞു. ഞങ്ങളുടെ വായനക്കാരുടെയും പരസ്യദാതാക്കളുടെയും താൽപ്പര്യങ്ങൾ ഒരുപോലെ സേവിക്കുന്നതിനും ഞങ്ങളുടെ ബ്രാൻഡിന് സുസ്ഥിരവും ഊർജ്ജസ്വലവുമായ ഭാവി ഉറപ്പാക്കുന്നതിനുമുള്ള സമർപ്പണമാണ് ഇത് നയിച്ചതെന്നും വിശദീകരണം.
നിങ്ങൾക്കും ഞങ്ങൾക്കും ഇതൊരു ദുഃഖ വാർത്തയാണെന്നാണ് മാധ്യമം പറഞ്ഞിരിക്കുന്നത്. നാല് പതിറ്റാണ്ടുകളായി ഈ യാത്രയിൽ വിശ്വസ്തരായ വായനക്കാരായി നിങ്ങൾ ഞങ്ങളോടൊപ്പമുണ്ടെന്നും അവർ തങ്ങളുടെ എഡിറ്റോറിയൽ ലേഖനത്തിൽ കുറിച്ചു.
ഒരു പ്രിന്റ് മാധ്യമം പ്രവർത്തനങ്ങളുമായി മുന്നോട്ട് പോകുന്നതിന് ഏറെ ബുദ്ധിമുട്ടുകയാണ്. പേപ്പറിനും, മഷിക്കും, മറ്റ് ഉപകരണങ്ങൾക്കും, ഡെലിവറി ചാർജും അടക്കം വലിയൊരു തുകയാണ് ഈടാക്കുന്നത്. അതിന് പുറമെ, പരസ്യവരുമാനം വർഷങ്ങളായി ഓരോ മാസവും ചുരുങ്ങുകയാണെന്നും അദ്ദേഹം പറഞ്ഞു.
1978ൽ യുഎഇയിൽ മേഖലകളിൽ സ്വാധീനമുള്ള മാധ്യമമാണ് ഗൾഫ് ന്യൂസ്. ഓൺലൈൻ മാധ്യമരംഗത്തും ശ്രദ്ധേയമായപങ്കുവഹിച്ചിട്ടുണ്ട് ഈ മാധ്യമം.
