ബ്രിട്ടൺ: ബ്രിട്ടനിലെ കേംബ്രിജിലുള്ള ആദം ബ്രൂക്സ് ആശുപത്രിയിൽ നഴ്സായി ജോലി ചെയ്യുകയായിരുന്ന മലയാളി നഴ്സ് മരിച്ചു. കുമരകം സ്വദേശിനിയായ പ്രതിഭയാണ് മരിച്ചത്. പ്രതിഭയെ താമസിക്കുന്ന മുറിയിൽ മരിച്ച നിലയിൽ കണ്ടെത്തുകയായിരുന്നു. രണ്ടു വർഷം മുമ്പാണ് പ്രതിഭ ബ്രിട്ടനിൽ എത്തിയത്. കുടുംബത്തെ കൂടെ കൂട്ടാനായി നാട്ടിലേക്ക് പോകാൻ ഇരിക്കെയാണ് മരണം സംഭവിച്ചത്.
നാട്ടിലേക്ക് പോകാനുള്ള ഒരുക്കത്തെ കുറിച്ച് സംസാരിക്കുന്നതിന് വേണ്ടി യുകെയിൽ തന്നെയുള്ള സഹോദരി വിളിച്ചപ്പോൾ ഫോൺ എടുത്തില്ല. ഒരുപാട് തവണ വിളിച്ചിട്ടും ഫോൺ എടുത്തില്ല. തുടർന്ന് സുഹൃത്തിന്റെ സഹായത്തോടെ അന്വേഷണം നടത്തി. അപ്പോഴാണ് മരിച്ച നിലയിൽ കണ്ടെത്തിയത്.
ലണ്ടനിലേക്കുള്ള എയർ ഇന്ത്യാ വിമാനത്തിൽ യുവതി പ്രസവിച്ചപ്പോൾ അതിൽ പങ്കിളിയായിരുന്നു പ്രതിഭ. ആ സമയത്ത് വലിയ രീതിയിൽ ഇവർക്ക് പ്രശംസ ലഭിച്ചിരുന്നു. കുമരകം നോർത്ത് സിപിഎം ലോക്കൽ സെക്രട്ടറി കദളിക്കാട്ടുമാലിയിൽ കെ. കേശവന്റെ മകൾ ആണ്. ബ്രിട്ടനിലെ ഇടതുപക്ഷ സംഘടനയായ കൈരളി യുകെയുടെ ദേശീയ കമ്മിറ്റി അംഗം ആണ് കൂടാതെ കേംബ്രിജ് യൂണിറ്റ് പ്രസിഡന്റ് ആണ്.
