ന്യൂഡൽഹി: പുതിയ പാർലമെന്റ് മന്ദിരം ഇന്ത്യൻ രാഷ്ട്രപതിചെയ്യാൻ ലോക്‌സഭാ സെക്രട്ടേറിയറ്റിനും കേന്ദ്ര സർക്കാരിനും നിർദ്ദേശം നൽകണമെന്ന് ആവശ്യപ്പെട്ട് സുപ്രീം കോടതിയിൽ ഒരു പൊതുതാൽപ്പര്യ ഹർജി ഫയൽ ചെയ്തു. ഉദ്ഘാടനച്ചടങ്ങിൽ രാഷ്ട്രപതിയെ ഉൾപ്പെടുത്താത്തതു വഴി കേന്ദ്രസർക്കാർ ഇന്ത്യൻ ഭരണഘടനയുടെ ലംഘനമാണ് നടത്തിയതെന്ന് സുപ്രീം കോടതി അഭിഭാഷകൻ സി ആർ ജയ സുകിൻ സമർപ്പിച്ച ഹർജിയിൽ പറയുന്നു.
“പാർലമെന്റ് ഇന്ത്യയുടെ പരമോന്നത നിയമനിർമ്മാണ സ്ഥാപനമാണ്. പാർലമെന്റിൽ രാഷ്ട്രപതിയും രണ്ട് സഭകളും ഉൾപ്പെടുന്നു — ലോക്സഭയും രാജ്യസഭയും,ഏത് സഭയും വിളിച്ചുചേർക്കാനും പ്രൊറോഗ് ചെയ്യാനും രാഷ്ട്രപതിക്ക് അധികാരമുണ്ട്” ഹർജിയിൽ പറയുന്നു. ഉദ്ഘാടന ചടങ്ങിലേക്ക് കേന്ദ്രസർക്കാർ രാഷ്ട്രപതിയെ ക്ഷണിച്ചിട്ടില്ലെന്നും ഇത് അനുചിതമാണെന്നും ഹർജിയിൽ വാദിച്ചു.
മെയ് 28 ന് പ്രധാനമന്ത്രി നരേന്ദ്ര മോദിയുടെ പുതിയ പാർലമെന്റ് മന്ദിരത്തിന്റെ ഉദ്ഘാടനം ബഹിഷ്കരിക്കുമെന്ന് കോൺഗ്രസ്, ടിഎംസി, എഎപി, എഐഎംഐഎം, ജെഡിയു എന്നിവയുൾപ്പെടെ 20 പ്രതിപക്ഷ പാർട്ടികൾ അറിയിച്ചതിന് പിന്നാലെയാണ് ഈ സംഭവവികാസം .
“രാഷ്ട്രപതി പാർലമെന്റിന്റെ അവിഭാജ്യ ഘടകമാണ്, ശിലാസ്ഥാപന ചടങ്ങിൽ നിന്ന് രാഷ്ട്രപതിയെ എന്തിനാണ് ഒഴിവാക്കിയത്? ഇപ്പോൾ രാഷ്ട്രപതിയെ ഉദ്ഘാടന ചടങ്ങിലേക്ക് ക്ഷണിക്കുന്നില്ല. സർക്കാരിന്റെ ഈ തീരുമാനം ഉചിതമല്ല,” ഹർജിയിൽ പറയുന്നു.
ലോക്‌സഭാ സ്പീക്കർ ഓം ബിർളയുടെ ക്ഷണപ്രകാരം കോടികൾ ചിലവാക്കി നിർമിച്ച പുതിയ പാർലമെന്റ് മന്ദിരം മെയ് 28 ന് പ്രധാനമന്ത്രി മോദി ഉദ്ഘാടനം ചെയ്യും. നാല് നിലകളുള്ള കെട്ടിടത്തിൽ 1,200 എംപിമാരെ പാർപ്പിക്കും. മെയ് 28 ന് നടക്കുന്ന ഉദ്ഘാടന ചടങ്ങിൽ ബിജെപിയുടെ നേതൃത്വത്തിലുള്ള ദേശീയ ജനാധിപത്യ സഖ്യത്തിൽ (എൻഡിഎ) 15 പാർട്ടികൾ പങ്കെടുക്കുമെന്ന് പ്രതീക്ഷിക്കുന്നു.
