കിഴക്കൻ രാജസ്ഥാൻ കനാൽ പദ്ധതിയുടെ (ഇആർസിപി) വിഷയത്തിൽ മോദിയെ പരിഹസിച്ച് കോൺഗ്രസ് നേതാവ് സച്ചിൻ പൈലറ്റ്. മോദി ഉൾപ്പെടെയുള്ള ബിജെപി നേതാക്കൾ ഇആർസിപിയെ യാഥാർത്ഥ്യമാക്കാൻ നിരവധി വാഗ്ദാനങ്ങൾ നൽകിയെങ്കിലും ഇപ്പോൾ ആ വിഷയം പരാമർശിക്കുന്നില്ലെന്ന് പൈലറ്റ് പറഞ്ഞു. തന്റെ ഔദ്യോഗിക ട്വീറ്റ് ഹാന്ഡിലിലൂടെയാണ് പൈലറ്റിന്റെ പരിഹാസം.
“ഇആർസിപി യാഥാർത്ഥ്യമാക്കുമെന്ന് പ്രധാനമന്ത്രി നേരത്തെ ഉറപ്പുനൽകിയിരുന്നു, എന്നാൽ ഇപ്പോൾ ഒരു ബിജെപി നേതാവും ഇആർസിപിയുടെ പേര് പോലും മിണ്ടുന്നില്ല . കേന്ദ്രമന്ത്രി ഗജേന്ദ്ര സിംഗ് ഷെഖാവത്ത് ഈ വകുപ്പിന്റെ മന്ത്രിയും സംസ്ഥാനത്തു നിന്നുള്ള ജനപ്രതിനിധിയുമാണ്, ഇതൊക്കെയാണെങ്കിലും, അദ്ദേഹത്തിന്റെ മൗനം മനസ്സിലാക്കാൻ കഴിയാത്തതാണ്. ഈ പദ്ധതിയോടുള്ള കേന്ദ്ര സർക്കാരിന്റെ ശത്രുതാപരമായ സമീപനം എന്തുകൊണ്ടാണ്? ഇആർസിപി സ്കീമിന്റെ ഒരു പ്രതിനിധി സംഘവുമായി കൂടിക്കാഴ്ച നടത്തുന്നതിന്റെ ഫോട്ടോ സഹിതമാണ് പൈലറ്റിന്റെ പോസ്റ്റ്.
“മോദി ജി വീണ്ടും രാജസ്ഥാനിലേക്ക് വരുന്നു. ഇആർസിപിക്ക് ദേശീയ പദ്ധതി പദവി നൽകാൻ ഞാൻ അദ്ദേഹത്തോട് അഭ്യർത്ഥിക്കുന്നു. ഇത് നമ്മുടെ സംസ്ഥാനത്തിന്റെ അവകാശമാണ്,” അദ്ദേഹം തന്റെ ട്വീറ്റിൽ തുടർന്നു, “ഇആർസിപി പ്രശ്നവുമായി ബന്ധപ്പെട്ട് നിരവധി പ്രതിനിധികൾ എന്നെ നിരന്തരം കാണുന്നുണ്ട്. ഈ ആവശ്യം ഉടൻ നിറവേറ്റപ്പെടുമെന്ന് പ്രതീക്ഷിക്കുന്നു,” മുൻ രാജസ്ഥാൻ ഉപമുഖ്യമന്ത്രി എഴുതി.
ഇആർസിപി രാജസ്ഥാനിൽ വളരെക്കാലമായി നിലനിൽക്കുന്ന ഒരു പ്രശ്നമാണ്, മുഖ്യമന്ത്രി അശോക് ഗെലോട്ട് ഉൾപ്പെടെ നിരവധി ഉന്നത കോൺഗ്രസ് നേതാക്കൾ ഇത് യാഥാർത്ഥ്യമാക്കാൻ മോദി സർക്കാരിനോട് വീണ്ടും വീണ്ടും ആവശ്യപ്പെടുന്നു. രാജസ്ഥാനിലും മധ്യപ്രദേശിലുമായി ഏകദേശം 3.4 ദശലക്ഷം ഹെക്ടർ കൃഷിഭൂമിക്ക് ഇആർസിപി ജലസേചനം ലഭ്യമാകുമെന്നാണ് പ്രതീക്ഷിക്കുന്നത്. ചമ്പൽ കനാൽ, കിഴക്കൻ രാജസ്ഥാൻ കനാൽ എന്നീ രണ്ട് കനാലുകളും ഇതിൽ ഉൾപ്പെടും. ഇതിന് ഏകദേശം 51,000 കോടി രൂപയാണ് ചെലവ് കണക്കാക്കുന്നത്. രാജസ്ഥാനിലെ ഏകദേശം 2.6 ദശലക്ഷം കർഷകർക്കും മധ്യപ്രദേശിലെ 2.4 ദശലക്ഷത്തിനും ഈ പദ്ധതി പ്രയോജനപ്പെടുത്താൻ സാധ്യതയുണ്ട്.
ബന്ധപ്പെട്ട വകുപ്പിന്റെ മന്ത്രിയായിരുന്നിട്ടും ഇആർസിപി യാഥാർത്ഥ്യമായെന്ന് ഉറപ്പാക്കാൻ അദ്ദേഹത്തിന് കഴിഞ്ഞില്ലെന്ന് ആരോപിച്ച് ഗെഹ്‌ലോട്ട് മുമ്പ് നിരവധി തവണ കേന്ദ്രമന്ത്രി ഗജേന്ദ്ര സിംഗ് ഷെഖാവത്തിനെതിരെ ആഞ്ഞടിച്ചിരുന്നു.
