ചുമ സിറപ്പ് കഴിച്ച് ശിശുമരണങ്ങള്‍ റിപ്പോര്‍ട്ട് ചെയ്ത സംഭവത്തില്‍ നടപടി കടുപ്പിക്കാനൊരുങ്ങി ലോകാരോഗ്യ സംഘടന(WHO) ഇത്തരം മരുന്നുകള്‍ക്കെതിരെ എത്രയും പെട്ടന്ന് തന്നെ നടപടികള്‍ സ്വീകരിക്കണമെന്നും സംഘടന ആവശ്യപ്പെട്ടു. ഗാംബിയ, ഇന്തോനേഷ്യ, ഉസ്‌ബെക്കിസ്ഥാന്‍ എന്നിവിടങ്ങളില്‍, പ്രധാനമായും 5 വയസ്സിന് താഴെയുള്ള 300 ലധികം കുട്ടികള്‍ മലിനമായ മരുന്നുകള്‍ കഴിച്ച് വൃക്കസംബന്ധമായ രോഗം മൂലം മരണപ്പെട്ടെന്നും WHO പ്രസ്താവനയില്‍ പറയുന്നു. ഈ ചുമ സിറപ്പുകളില്‍ ഉയര്‍ന്ന അളവില്‍ ഡൈഎത്തിലീന്‍ ഗ്ലൈക്കോളും എഥിലീന്‍ ഗ്ലൈക്കോളും ഉണ്ടായിരുന്നു.
ഫിലിപ്പീന്‍സ്, ടിമോര്‍ ലെസ്റ്റെ, സെനഗല്‍, കംബോഡിയ എന്നിവിടങ്ങളില്‍ ഈ മരുന്നുകള്‍ വില്‍പനയ്ക്കുള്ളതിനാല്‍ ഇനിയും കുട്ടികളെ ബാധിക്കാന്‍ സാധ്യതയുണ്ടെന്നും യുഎന്‍ ആരോഗ്യ ഏജന്‍സി അറിയിച്ചു. കൂടുതല്‍ മരണങ്ങള്‍ തടയാന്‍ 194 അംഗരാജ്യങ്ങളിലുടനീളം ഇതിനെതിരെ നടപടിയെടുക്കാനും സംഘടന ആവശ്യപ്പെട്ടു. മെഡിക്കല്‍ വിതരണ ശൃംഖലയില്‍ ഏര്‍പ്പെട്ടിരിക്കുന്നവരോട് ഉടനടി നടപടിയെടുക്കണമെന്നാണ് ലോകാരോഗ്യ സംഘടന ആവശ്യപ്പെടുന്നത്.
കഴിഞ്ഞ നാല് മാസമായി, ഉയര്‍ന്ന അളവിലുള്ള ഡൈതലീന്‍ ഗ്ലൈക്കോളിന്റെയും (ഡിഇജി) എഥിലീന്‍ ഗ്ലൈക്കോളിന്റെയും(ഇജി) സാന്നിധ്യം സ്ഥിരീകരിച്ചതോ സംശയിക്കുന്നതോ ആയ ചുമ സിറപ്പുകള്‍ വിപണിയിലുളളതായി വിവിധ രാജ്യങ്ങള്‍ റിപ്പോര്‍ട്ട് ചെയ്തിട്ടുണ്ട്. ഈ വസ്തുക്കള്‍ വ്യാവസായിക ലായകങ്ങളായും ആന്റിഫ്രീസ് ഏജന്റുകളായും ഉപയോഗിക്കുന്ന വിഷ രാസവസ്തുക്കളാണ്. അവ ചെറിയ അളവില്‍ പോലും ശരീരത്തില്‍ എത്തുന്നത് മാരകമായേക്കാം ഇവ ഒരിക്കലും മരുന്നുകളില്‍ കാണരുതാത്തതാണ്.
ലോകാരോഗ്യ സംഘടന റെഗുലേറ്റര്‍മാരോടും സര്‍ക്കാരുകളോടും ആവശ്യപ്പെട്ടത്
-മരണത്തിനും രോഗത്തിനും സാധ്യതയുള്ള ഏതെങ്കിലും മെഡിക്കല്‍ ഉല്‍പ്പന്നങ്ങള്‍ വിപണികളിലെ പ്രചാരത്തിലുണ്ടെങ്കില്‍ അവ കണ്ടെത്തി നീക്കം ചെയ്യുക.
-അതത് വിപണികളിലെ എല്ലാ മെഡിക്കല്‍ ഉല്‍പ്പന്നങ്ങളും വില്‍പ്പനയ്ക്ക് അംഗീകരിച്ചിട്ടുണ്ടെന്നും അംഗീകൃത/ലൈസന്‍സുള്ള വിതരണക്കാരില്‍ നിന്നാണ് ലഭ്യമാകുന്നതെന്നും ഉറപ്പാക്കുക.
-അന്താരാഷ്ട്ര മാനദണ്ഡങ്ങള്‍ക്ക് അനുസൃതമായാണ് നിര്‍മ്മാണ യൂണിറ്റുകള്‍ പ്രവര്‍ത്തിക്കുന്നതെന്ന് ഉറപ്പാക്കാനുളള പരിശോധനകള്‍ നടത്തുക
-അതത് വിപണികളില്‍ പുറത്തിറക്കുന്ന മെഡിക്കല്‍ ഉല്‍പ്പന്നങ്ങളുടെ അപകടസാധ്യത അടിസ്ഥാനമാക്കിയുള്ള ടാര്‍ഗെറ്റഡ് ടെസ്റ്റിംഗ് ഉള്‍പ്പെടെയുള്ള വിപണി നിരീക്ഷണം വര്‍ദ്ധിപ്പിക്കുക.
-നിലവാരമില്ലാത്തതും വ്യാജവുമായ മരുന്നുകളുടെ നിര്‍മ്മാണം, വിതരണം, ഉപയോഗം എന്നിവയെ ചെറുക്കാന്‍ സഹായിക്കുന്നതിന് പ്രസക്തവും ഉചിതവുമായ നിയമ നടപടികള്‍ നടപ്പിലാക്കുക.
