കോഴിക്കോട്: അധ്യാപികയോട് മോശമായി പെരുമാറിയെന്ന പരാതിയിന്മേൽ ഗോത്ര വർഗ പഠന കേന്ദ്രം ഡയറക്ടർക്കെതിരെ നടപടിയുമായി കാലിക്കറ്റ് സർവകലാശാല. വയനാട് ചെതലയം ഗോത്ര വർഗ പഠന കേന്ദ്രം ഡയറക്ടറായ ടി.വസുമതിയെ, സഹപ്രവർത്തക നൽകിയ പരാതിയുടെ അടിസ്ഥാനത്തിൽ സ്ഥാനത്ത് നിന്ന് നീക്കി. അസിസ്റ്റന്റ് പ്രഫസർ സി. ഹരികുമാറിന് പകരം ചുമതല നൽകി.
തന്നോട് മോശമായി പെരുമാറിയെന്ന് ആരോപിച്ച് 2021 ജൂലൈയിലാണ് വസുമതിക്കെതിരെ അധ്യാപിക പരാതി നൽകിയത്. തുടർന്ന് പരാതി പരിശോധിക്കാൻ സർവകലാശാല നിയോഗിച്ച സമിതി നൽകിയ റിപ്പോർട്ടിന്റെ അടിസ്ഥാനത്തിലാണ് ഇടത് അനുകൂല അധ്യാപക സംഘടനാ നേതാവ് കൂടിയായ വസുമതിക്കെതിരെ നടപടി എടുത്തത്.
എന്നാൽ ആരോപണം നിഷേധിച്ച വസുമതി, അധ്യാപിക നടത്തിയ ഹാജർ ബുക്ക് തിരിമറി താൻ തടഞ്ഞതാണ് വിവാദത്തിന് കാരണമെന്ന് അറിയിച്ചു.