തിരുവനന്തപുരം: തിരുവനന്തപുരം മേയര്ക്കെതിരായ കോണ്ഗ്രസിന്റെ ജനകീയ പ്രതിഷേധത്തെ കായികമായി നേരിടാനാണ് സിപിഎമ്മിന്റെ തീരുമാനമെങ്കില് അതേ നാണയത്തില് തിരിച്ചടിക്കുമെന്ന് കെപിസിസി അധ്യക്ഷൻ കെ. സുധാകരൻ.
സംസ്ഥാന സര്ക്കാരും സിപിഎമ്മും തുടര്ച്ചയായി വഞ്ചിച്ച സംസ്ഥാനത്തെ യുവാക്കളുടെ പ്രതിഷേധമാണ് കെഎസ്യു പ്രവര്ത്തകര് രേഖപ്പെടുത്തിയത്. മേയറുടെ വഴി തടഞ്ഞ ചുണക്കുട്ടികളായ കെഎസ്യു പ്രവര്ത്തകരെ ഡിവൈഎഫ്ഐ, സിപിഎം ക്രിമിനലുകള് ക്രൂരമായി കണ്മുന്നിലിട്ട് തല്ലിചതച്ചിട്ടും പോലീസ് നിഷ്ക്രിയമായി നോക്കിനിന്നുവെന്നും അദ്ദേഹം ആരോപിച്ചു.
കൊടിയ മര്ദ്ദനമേറ്റുവാങ്ങിയ കെഎസ്യു പ്രവര്ത്തകരെ കൈയ്യാമംവച്ച പോലീസ് അക്രമികളായ സിപിഎം പ്രവര്ത്തകരെ വെറുതെ വിടുകയും ചെയ്തുവെന്നും അദ്ദേഹം പറഞ്ഞു. സിപിഎമ്മിന്റെ വാറോല അനുസരിച്ചാണ് മേയര്ക്കെതിരെ പ്രതിഷേധിക്കുന്ന കെഎസ്യു, കോണ്ഗ്രസ് പ്രവര്ത്തകരെ പോലീസ് അറസ്റ്റ് ചെയ്യുന്നതെന്നും സുധാകരൻ കൂട്ടിച്ചേർത്തു.