ഡോ. ജോര്ജ് എം. കാക്കനാട്
ഹൂസ്റ്റണ്: ഒരു സിനിമയില് സലീം കുമാറിന്റെ കഥാപാത്രം പറയുന്നുണ്ട്, ‘ഈ കറുത്തിരിക്കുന്ന ഞാന് ശരിക്കും ഞാനല്ല. വെളുത്തു തുടുത്തിരിക്കുന്ന ശരിക്കും ഞാന് വേറേ ഏതോ പണക്കാരന്റെ വീട്ടില് സുഖമായി ജീവിക്കുന്നുണ്ട്’ എന്ന്. മലയാളികള് ഈ കോമഡി ഏറെ ആസ്വദിക്കുകയും ചെയ്തിട്ടുണ്ട്. എന്നാല് മുന് പ്രസിഡന്റിനെക്കുറിച്ച് സാക്ഷാല് അമേരിക്കന് പ്രസിഡന്റ് ഇങ്ങനെ പറഞ്ഞാലോ? കോമഡി ട്രാജഡി ആകുമെന്ന് ഉറപ്പ്്. ഏതാണ്ട് അതുപൊലൊരു കോമഡി (ട്രാജഡി)യാണ് ട്രംപ് പൊട്ടിച്ചിരിക്കുന്നത്.
മുന് പ്രസിഡന്റ് ജോ ബൈഡനെ ‘2020-ല് വധിച്ചു’ എന്നും പകരം ഒരു റോബോട്ടിക് ക്ലോണ് ആണ് നമ്മള് എല്ലാം കണ്ടതെന്നുമാണ് ട്രംപിന്റെ പുതിയ വാദം. വെറുതേ രഹസ്യമായി പറഞ്ഞതല്ല, സോഷ്യല് മീഡിയയില് നാലാള് കാണുന്ന തരത്തിലാണ് യുഎസ് പ്രസിഡന്റ് ഈ ഗൂഢാലോചന ‘രസഹ്യം’ പങ്കുവച്ചിരിക്കുന്നത്. ‘ജോ ബൈഡന് ജീവനോടെയില്ല. 2020-ല് വധിക്കപ്പെട്ടു.’ എന്നാണ് ട്രംപ് തന്റെ ട്രൂത്ത് സോഷ്യല് അക്കൗണ്ടില് മറ്റൊരാളുടെ വാദം പങ്കിട്ടത്.
യഥാര്ത്ഥ ജോ ബൈഡന്റെ ‘ക്ലോണ്’ ആണ് നാം പിന്നീട് കണ്ടത്. ‘ക്ലോണുകള് ഡബിള്സ് & റോബോട്ടിക് എഞ്ചിനീയറിംഗ് വഴി സൃഷ്ടിച്ച ആത്മാവും വിവേകവുമില്ലാത്ത ബുദ്ധിശൂന്യനായ’ ബൈഡനാണ് ഉണ്ടായിരുന്നതെന്നും പോസ്റ്റ് പറയുന്നു. ‘ഡെമോക്രാറ്റുകള്ക്ക് ഈ വ്യത്യാസം അറിയില്ല’ എന്നും ട്രംപ് പോസ്റ്റില് അവകാശപ്പെടുന്നു. പതിവു പോലെ ട്രംപിന്റെ സിദ്ധാന്തം പുറത്തു ന്നതിനു പിന്നാലെ നെറ്റിസണ്മാര് ചര്ച്ചയില് പങ്കുചേര്ന്നു.
ട്രംപ് പിന്തുണക്കാര് ‘ഇവര് ഒരേ ആളുകളല്ല’ എന്ന് അവകാശപ്പെട്ടുകൊണ്ട് ബൈഡന്റെ മീമുകള് പങ്കിട്ടു. ചില ഉപയോക്താക്കള് ബൈഡന്റെ ഇയര്ലോബുകളിലെ മാറ്റങ്ങള് ചൂണ്ടിക്കാട്ടിയാണ് രംഗത്തുവന്നത്. 2020 ന് മുമ്പ് അവര് ബന്ധമില്ലാത്തവരായി കാണപ്പെട്ടുവെങ്കിലും ഇപ്പോള് അവ ചേര്ത്തിരിക്കുന്നതായി അവകാശപ്പെട്ടു. മറ്റൊരാള് ബൈഡന് ഉദ്ഘാടന ദിനത്തില് ‘ആര്ലിംഗ്ടണില് ശവസംസ്കാര പീരങ്കി സല്യൂട്ട്’ നല്കിയതായി അഭിപ്രായപ്പെട്ടു. അത് ടെലിവിഷനില് കാണിച്ചിരുന്നുവെന്നും ഇയാള് പറഞ്ഞുവയ്ക്കുന്നു.
മറ്റുള്ളവര് ട്രംപ് ‘ട്രോളിംഗ്’ തുടങ്ങുകയും ചെയ്തു. ട്രംപിനെ വിമര്ശിക്കുന്നവര് ഈ റീപോസ്റ്റിനെ ‘ആശങ്കപ്പെടുത്തുന്നത്’ എന്ന് വിളിച്ചു. ഒരു ഉപയോക്താവ് എക്സില് ഇങ്ങനെ എഴുതി- ”ബൈഡനെ ഒരു ക്ലോണ് ഉപയോഗിച്ച് മാറ്റിസ്ഥാപിച്ചു’ എന്നതിനെക്കുറിച്ചുള്ള രസകരമായ കാര്യം… ശരി, ആരാണ് അത് ചെയ്തത്, എന്തുകൊണ്ട്. അവര് ട്രംപിനെ ഒരു ക്ലോണും ഉപയോഗിച്ച് മാറ്റിസ്ഥാപിച്ചിട്ടില്ലെന്ന് നമുക്ക് എങ്ങനെ അറിയാം.’
പ്രത്യേകിച്ച്, ട്രംപിന്റെ ഭാര്യ മെലാനിയയ്ക്കും മുമ്പ് സമാനമായ അവകാശവാദങ്ങള് നേരിടേണ്ടി വന്നിട്ടുണ്ട്. അദ്ദേഹത്തിന്റെ ആദ്യ ടേമില്, ഒരു ബോഡി ഡബിള് അവര്ക്ക് പകരം വന്നതായി ചിലര് ആരോപിച്ചു. ആ സമയത്ത് വൈറ്റ് ഹൗസ് ആ അവകാശവാദങ്ങള് തള്ളിക്കളഞ്ഞു. ആരോപണങ്ങളെ ‘അസംബന്ധം’ എ്ന്നാണ് അന്ന് വിശേഷിപ്പിച്ചത്.
ജോ ബൈഡന് പ്രോസ്റ്റേറ്റ് ക്യാന്സറിന്റെ ‘മാരക അവസ്ഥ’ കണ്ടെത്തിയതിന് ദിവസങ്ങള്ക്ക് ശേഷമാണ് ട്രംപിന്റെ വാദം എന്നതു ശ്രദ്ധേയമാണ്. അതേസമയം പ്രസിഡന്റ് പോസ്റ്റ് ഷെയര് ചെയ്തതിനെക്കുറിച്ച് വൈറ്റ് ഹൗസ് ഇതുവരെ അഭിപ്രായം പറഞ്ഞിട്ടില്ല. ഏതെങ്കിലും തരത്തിലുള്ള ആധികാരികത ഇതിന് ഉണ്ടെന്ന് ട്രംപ് അവകാശപ്പെടുന്നുമില്ല എന്നതാണ് കൗതുകകരം.
രാഷ്ട്രീയ എതിരാളികള്ക്കെതിരെ പതിവായി ഓണ്ലൈന് ആക്രമണങ്ങള്ക്ക് പേരുകേട്ട പ്രസിഡന്റ് ട്രംപ് പോസ്റ്റിന്റെ പേരില് വീണ്ടും വിമര്ശനം നേരിടുകയാണ്. ചില നിരീക്ഷകര് അദ്ദേഹത്തിന്റെ സമീപകാല പോസ്റ്റിനെ ട്രോളിംഗിന്റെ മറ്റൊരു ഉദാഹരണമായി വിളിക്കുന്നു. 2020, 2024 ലെ തിരഞ്ഞെടുപ്പ് ചര്ച്ചകള്ക്കിടെ നടന്ന മുന് കൂടിക്കാഴ്ചകള്ക്ക് ശേഷം, 2025 ലെ പ്രസിഡന്റ് സ്ഥാനാരോഹണ വേളയിലാണ് ട്രംപും ബൈഡനും അവസാനമായി നേരിട്ട് കണ്ടത്.
ബൈഡന് സ്ഥാനമൊഴിഞ്ഞതിനുശേഷം, അദ്ദേഹത്തിന്റെ വൈജ്ഞാനികവും ശാരീരികവുമായ ആരോഗ്യത്തെക്കുറിച്ചുള്ള പൊതുജന പരിശോധന ശക്തമായി. ബൈഡന്റെ മാനസിക തീവ്രതയെ, പ്രത്യേകിച്ച് പ്രസിഡന്റ് സ്ഥാനത്തിന്റെ അവസാനത്തില്, ട്രംപ് ആവര്ത്തിച്ച് ചോദ്യം ചെയ്തിട്ടുണ്ട്, പലപ്പോഴും അദ്ദേഹത്തിന്റെ ദുര്ബലതയാണ് ദേശീയ പ്രശ്നങ്ങള്ക്ക് കാരണമെന്നും ട്രംപ് നിരന്തരം ആരോപിച്ചിരുന്നു. മുന് പ്രസിഡന്റിന്റെ നേരിട്ടുള്ള പങ്കാളിത്തമില്ലാതെ പ്രധാന നയങ്ങളും മാപ്പുകളും അംഗീകരിക്കാന് ബൈഡന്റെ സഹായികള് ഒരു ഓട്ടോപെന് ഉപയോഗിച്ചുവെന്ന തെളിയിക്കപ്പെടാത്ത അവകാശവാദങ്ങളും മുന്പ് അദ്ദേഹം പ്രചരിപ്പിച്ചിട്ടുണ്ട്.
ട്രംപ് ഈ വിചിത്രമായ ഗൂഢാലോചന സിദ്ധാന്തത്തെക്കുറിച്ച് നേരിട്ട് ഒന്നും പറഞ്ഞില്ല എന്നത് ശ്രദ്ധേയമാണ്. മറിച്ച് llijh എന്ന അത്ര അറിയപ്പെടാത്ത ഉപയോക്താവില് നിന്നുള്ള ഒരു സന്ദേശം Truth Socialല് റീപോസ്റ്റ് ചെയ്യുകയായിരുന്നു. അതേസമയം ഈ സിദ്ധാന്തത്തെ പിന്തുണയ്ക്കുന്നതിന് വിശ്വസനീയമായ തെളിവുകളൊന്നുമില്ല. 2020 ന് ശേഷം ജോ ബൈഡന് നിരവധി തത്സമയ പരിപാടികളില് പ്രത്യക്ഷപ്പെട്ടിട്ടുണ്ട്. സ്ക്രിപ്റ്റ് ചെയ്യാത്ത പത്രസമ്മേളനങ്ങളിലും പങ്കെടുത്തിട്ടുണ്ട്, ലോക നേതാക്കളുമായി നേരിട്ട് ചര്ച്ചകള് നടത്തിയിട്ടുമുണ്ട്.
ട്രംപിന്റെ ആദ്യ പ്രസിഡന്റായിരിക്കെ, അദ്ദേഹം പലപ്പോഴും തെറ്റായതോ തെറ്റിദ്ധരിപ്പിക്കുന്നതോ ആയ അവകാശവാദങ്ങള് ഉന്നയിച്ചിട്ടുണ്ടെന്ന് ന്യൂയോര്ക്ക് ടൈംസിന്റെ ഒരു റിപ്പോര്ട്ട് കണ്ടെത്തി. റിപ്പോര്ട്ട് അനുസരിച്ച്, ട്രംപ് അത്തരം 30,573 പരാമര്ശങ്ങളാണ് നടത്തിയിട്ടുള്ളത്. അതായത് പ്രതിദിനം ശരാശരി 21 എണ്ണം. കൂടാതെ 2024 ലെ തിരഞ്ഞെടുപ്പിന് മുന്നോടിയായി ഗൂഢാലോചന സിദ്ധാന്തങ്ങള് പലപ്പോഴും മുന്നോട്ടുവച്ചിരുന്നു.
2024-ല് ആറ് മാസത്തിനിടെ ട്രംപിന്റെ ആയിരക്കണക്കിന് സോഷ്യല് മീഡിയ പോസ്റ്റുകളും ഷെയറുകളും ന്യൂയോര്ക്ക് ടൈംസ് വിശകലനം ചെയ്തിരുന്നു. അവയില് കുറഞ്ഞത് 330 എണ്ണം എങ്കിലും അദ്ദേഹത്തിനോ അമേരിക്കന് പൊതുജനങ്ങള്ക്കോ എതിരായ രഹസ്യ ഗൂഢാലോചനകളെക്കുറിച്ച് തെറ്റായ അവകാശവാദങ്ങളാണ്. അദ്ദേഹം കുറ്റപ്പെടുത്തിയവരുടെ പ്രത്യേക പേരുകള് സഹിതം കണ്ടെത്തിയിട്ടുണ്ട്. എഫ്ബിഐ അദ്ദേഹത്തെ കൊല്ലാന് ശ്രമിച്ചതായും ജനുവരി 6 ലെ കാപ്പിറ്റോള് ആക്രമണത്തിന് പിന്നില് സര്ക്കാര് ഉദ്യോഗസ്ഥരാണെന്നും ഉള്ള അവകാശവാദങ്ങള് ഇതില് ഉള്പ്പെടുന്നു.
