തിരുവനന്തപുരം: വനിതാ കൗണ്സിലര്മാര്ക്കെതിരെ അപകീര്ത്തികരമായ പരാമര്ശം നടത്തിയെന്നാരോപിച്ച് തിരുവനന്തപുരം കോര്പറേഷന് കൗണ്സിലര് ഡി.ആര് അനിലിനെതിരെ ബിജെപി നടത്തിയ മാര്ച്ചില് സംഘര്ഷം. അനിൽ രാജിവയ്ക്കണമെന്നാവശ്യപ്പെട്ട് മെഡിക്കല് കോളജിനു സമീപത്തെ ഇ.കെ.നായനാര് ചാരിറ്റബിള് ട്രസ്റ്റ് ഓഫീസിലേക്കാണ് ബിജെപി പ്രവര്ത്തകര് മാര്ച്ച് നടത്തിയത്.
ഓഫീസിനു മുന്നില് പ്രവര്ത്തകര് കരി ഓയില് ഒഴിച്ചു. പ്രവര്ത്തകരും പോലീസുമായുണ്ടായ ഉന്തിനും തള്ളിനുമിടയില് ഓഫീസിനു മുന്വശത്തെ ചില്ല് തകര്ന്നു. പത്തോളം ബിജെപി പ്രവര്ത്തകരെ പോലീസ് കസ്റ്റഡിയിലെടുത്ത് ഇവിടെനിന്ന് നീക്കി.
അതേസമയം തന്റെ ഓഫീസെന്ന പേരില് ബിജെപി നഗരസഭയുടെ റസ്റ്റ് ഹൗസ് തകര്ത്തെന്ന് ഡി.ആര് അനില് പ്രതികരിച്ചു. പൊതുമുതല് നശിപ്പിച്ചതിന് ബിജെപി പ്രവര്ത്തകര്ക്കെതിരെ കേസെടുക്കുമെന്ന് ഡെപ്യൂട്ടി മേയര് പി.കെ രാജുവും വ്യക്തമാക്കി.
