കൊച്ചി: യാത്രക്കാരുടെ തിരക്ക് കണക്കിലെടുത്ത് ബെംഗളൂരുവിൽ നിന്ന് മംഗലാപുരത്തേക്കും കൊച്ചുവേളിയിലേക്കും സ്പെഷ്യൽ ട്രെയിൻ സർവീസുകളുമായി സതേൺ റെയിൽവേ. ലോക്സഭാ തെരഞ്ഞെടുപ്പിൽ വോട്ട് ചെയ്യാൻ കേരളത്തിലേക്ക് വരുന്നവർക്ക് ഉപകാരപ്പെടുന്ന സർവീസുകളാണ് റെയിൽവേ പ്രഖ്യാപിച്ചിരിക്കുന്നത്. ബെംഗളൂരു – മംഗളൂരു സെൻട്രൽ സ്പെഷ്യൽ ട്രെയിൻ ഇന്ന് വൈകീട്ട് ആറ് മണിയ്ക്കും ബെംഗളൂരു – കൊച്ചുവേളി സ്പെഷ്യൽ ട്രെയിൻ ഉച്ചതിരിഞ്ഞ് 03:50നുമാണ് യാത്ര ആരംഭിക്കുക. രണ്ട് ട്രെയിനിന്‍റെയും മടക്കയാത്ര നാളെയാണ്.
06533 എസ്എംവിടി ബെംഗളൂരു – മംഗളൂരു സെൻട്രൽ എക്സ്പ്രസ് വൈകീട്ട് ആറ് മണിയ്ക്ക് പുറപ്പെട്ട് നാളെ രാവിലെ 10 മണിയ്ക്കാണ് മംഗലാപുരത്ത് എത്തിച്ചേരുക. ഒരു എസി ടു ടയർ കോച്ച്, നാല് എസി ത്രീ ടയർ കോച്ച്, എട്ട് സ്ലീപ്പർ ക്ലാസ് കോച്ചുകൾ, നാല് ജനറൽ സെക്കൻഡ് ക്ലാസ് കോച്ചുകൾ, ഭിന്നശേഷിക്കാർക്കുള്ള രണ്ട് ജനറൽ കോച്ചുകൾ എന്നിവയാണ് ട്രെയിനിലുള്ളത്. ടിക്കറ്റ് റിസർവേഷൻ ആരംഭിച്ചിട്ടുണ്ട്.
ബെംഗളൂരുവിൽനിന്ന് ആറ് മണിക്ക് പുറപ്പെടുന്ന ട്രെയിൻ പുലർച്ചെ 01:58 ഓടെയാണ് പാലക്കാട് എത്തുക. ഷൊർണ്ണൂർ, തിരൂർ, കോഴിക്കോട്, വടകര, തലശേരി, കണ്ണൂർ, പയ്യന്നൂർ, കാസർകോട് എന്നിവിടങ്ങളിലാണ് കേരളത്തിലെ മറ്റ് സ്റ്റോപ്പുകൾ. രാവിലെ പത്ത് മണിയോടെ മംഗളൂരു സെൻട്രൽ സ്റ്റേഷനിലെത്തുന്ന ട്രെയിനിന്‍റെ മടക്കയാത്ര 06544 ഉച്ചയ്ക്ക് 12 മണിയ്ക്കാണ് ആരംഭിക്കുക. തുടർന്ന് ശനിയാഴ്ച പുലർച്ചെ മൂന്ന് മണിയ്ക്ക് ബെംഗളൂരുവിൽ എത്തിച്ചേരും.
