പലര്‍ക്കും തോന്നുന്ന സംശയമാണ് കണ്ണില്‍ എങ്ങിനെ വിരവരും? ഇത് വന്നാല്‍ എങ്ങിനെ തിരിച്ചറിയാം എന്നെല്ലാം.
എന്താണ് കണ്ണിലെ വിര?
Ocular Myiasis എന്നറിയപ്പെടുന്ന കണ്ണിലെ വിരകള്‍ പരാന്നഭോജികളായ പ്രാണികളുടെ ലാര്‍വ നേത്രപാളികള്‍ പതിക്കുന്നത് മൂലം വരുന്ന ഒരു അവസ്ഥയാണ്. വളരെ വിരളമായി മാത്രം സംഭവിക്കുന്ന ഒരു അസുഖം മാത്രമാണ് ഇത്. പൊതുവില്‍ വൃത്തിയില്ലാത്ത അന്തരീക്ഷത്തില്‍ ജീവിക്കുന്നവര്‍, അല്ലെങ്കില്‍ അടഞ്ഞ് കിടക്കുന്ന സ്ഥലത്ത് ജീവിക്കുന്നവരിലെല്ലാമാണ് കണ്ണുകളില്‍ വിരവരാന്‍ സാധ്യത കൂടുതല്‍.
ലക്ഷണങ്ങള്‍
കണ്ണില്‍ വിരവന്നാല്‍ പ്രത്യക്ഷത്തില്‍ കാണുന്ന കുറച്ച് ലക്ഷണങ്ങളുണ്ട്. അവയില്‍ ഒന്നാണ് കണ്ണുകളില്‍ കാണപ്പെടുന്ന ചുവപ്പ് നിറം. കണ്ണില്‍ നല്ലപോലെ ചുവപ്പ് നിറം അല്ലെങ്കില്‍ രക്തം കട്ടപിടിച്ചത് പോലെ കിടക്കുന്നത് കാണാന്‍ സാധിക്കും. കണ്ണില്‍ അലര്‍ജി വന്നാലും അതുപോലെ ചെങ്കണ്ണ് വന്നാലും ഇത്തരത്തില്‍ കണ്ണില്‍ ചുവപ്പ് കാണാം. അതുപോലെ, കണ്ണില്‍ വിര വന്നാലും കണ്ണില്‍ ചുവപ്പ് നിറം പടരുന്നത് ഒരു പ്രധാന ലക്ഷണമാണ്.
കണ്ണില്‍ ചുവപ്പ് നിറം മാത്രമല്ല, നല്ല വേദനയും വിര വന്നാല്‍ ഉണ്ടാകും. ചിലപ്പോള്‍ വളരെ നേരിയ വേദന, അല്ലെങ്കില്‍ കണ്ണില്‍ അസ്വസ്ഥത എന്നിങ്ങനെയുള്ള ബുദ്ധിമുട്ടുകളായിരിക്കാം അനുഭവപ്പെടുക. ചിലരില്‍ വേദന കലശലായിരിക്കാനും സാധ്യത കൂടുതലാണ്. നല്ല വേദന വരുന്നതിന്റെ കൂടെ തന്നെ കണ്ണില്‍ നിന്നും നല്ലപോലെ വെള്ളം വരാനും കണ്ണിന് ചുറ്റും വീക്കം സംഭവിക്കാനും സാധ്യത കൂടുതലാണ്. കൂടാതെ, കണ്ണില്‍ എന്തൊക്കെയോ ഉള്ളത് പോലെ നിങ്ങള്‍ക്ക് തന്നെ സ്വയം തോന്നാം.
മറ്റ് പ്രശ്‌നങ്ങള്‍
കണ്ണില്‍ വിര വന്നാല്‍ അത് നമ്മളുടെ കാഴ്ച്ചയേയും കാര്യമായി തന്നെ ബാധിക്കാം. പ്രത്യേകിച്ച് നിങ്ങള്‍ക്ക് വളരെ പെട്ടെന്ന് തന്നെ, കാഴ്ച്ച കുറയുന്നത് പോലെ അനുഭവപ്പെടാം. ചിലര്‍ക്ക് കാഴ്ച്ചശക്തി പൂര്‍ണ്ണമായോ, അല്ലെങ്കില്‍ ഭാഗികമായോ നഷ്ടപ്പെടാനും സാധ്യത കൂടുതലാണ്. അതുപോലെ, കണ്ണില്‍ അള്‍സര്‍ വരാനുള്ള സാധ്യത കൂടുതലാണ്. ഇത്തരം വിരശല്യം മൂലം ചിലപ്പോള്‍ Acanthamoeba keratitis, Loiasis, River blindness (Onchocerciasis), Toxocariasis, Ocular Cysticercosis (associated with pork tapeworm), Hydatid Cyst, Ocular Toxoplasmosis, Roundworm infestation, and Myiasis എന്നിങ്ങനെയുള്ള രോഗങ്ങള് വരാനും സാധ്യത കൂടുതലാണ്. അതിനാല്‍, ഇത്തരം ബുദ്ധിമുട്ടുകള്‍ നിങ്ങള്‍ക്ക് അനുഭവപ്പെട്ടാല്‍ പെട്ടെന്ന് തന്നെ ഒരു ഡോക്ടറെ കാണിക്കുകയാണ് വേണ്ടത്.
ഇത് എങ്ങിനെ പകരുന്നു
നേരിട്ട് പ്രാണികളില്‍ നിന്നും കണ്ണുകള്‍ക്ക് അണുബാധ ഉണ്ടാകാം. ഇല്ലെങ്കില്‍ ഇത്തരം അസുഖം ബാധിച്ച അണുകളുമായി കോണ്‍ടാക്ട് വരുന്നത്. അല്ലെങ്കില്‍ ഗര്‍ഭിണികളില്‍ നിന്നും കുഞ്ഞുങ്ങളിലേയ്ക്ക്. ആഹാരത്തില്‍ നിന്നെല്ലാം നമ്മള്‍ക്ക് ഈ വിരശല്യം ലഭിക്കാന്‍ സാധ്യത കൂടുതലാണ്.
ചികിത്സ
രോഗിയുടെ അവസ്ഥയും രോഗാവസ്ഥയും നോക്കിയാണ് ചികിത്സ നിര്‍ണ്ണയിക്കുക. കണ്ണില്‍ നല്ലപോലെ വീക്കം, നീര് എന്നിവ ഉണ്ടെങ്കില്‍ സ്‌റ്റെറോയ്ഡ് ചികിത്സയില്‍ ഉപയോഗിക്കും. ഇതല്ലെങ്കില്‍ സര്‍ജറി ചെയ്ത് കണ്ണില്‍ നിന്നും വിരയെ നീക്കം ചെയ്യുകയാണ് മറ്റൊരു മാര്‍ഗ്ഗം. അതിന്റെ കൂടെ ഇത്തരം രോഗങ്ങള് പരാതിരിക്കാനുള്ള മരുന്നു നല്‍കും.
വരാതിരിക്കാന്‍
നല്ല വൃത്തിയും ശുചിത്വവും ഉറപ്പാക്കുകയാണ് ഏറ്റവും ആദ്യം വേണ്ടത്. ഇത് പലതരം രോഗങ്ങള് നിങ്ങളെ വരാതിരിക്കാന്‍ സഹായിക്കും. നല്ല വൃത്തിയുള്ള അ്തരീക്ഷത്തില്‍ ജീവിക്കാന്‍ ശ്രദ്ധിക്കാം. അതുപോലെ, വൃത്തിയുള്ള അന്തരീക്ഷത്തില്‍ ആഹാരം പാചകം ചെയ്യാം. നല്ല വൃത്തിയുള്ള ആഹാരം കഴിക്കാന്‍ ശ്രദ്ധിക്കാം. ഇത് കൂടാതെ, വൃത്തിഹീനമായ കൈകള്‍ കണ്ണുകളില്‍ തൊടാതിരിക്കാന്‍ ശ്രദ്ധിക്കുക. നല്ലപോലെ പാചകം ചെയ്ത് മാത്രം ആഹാരം കഴിക്കാന്‍ ശ്രദ്ധിക്കണം. കണ്ണടയും ലെന്‍സും ഉപയോഗിക്കുമ്പോള്‍ ശ്രദ്ധിച്ച് വൃത്തിയോടെ ഉപയോഗിക്കാന്‍ ശ്രദ്ധിക്കുക. പ്രാണികള്‍ കണ്ണില്‍ പോകാതേയും, കണ്ണില്‍ കടിക്കാതിരിക്കാനും ശ്രദ്ധിക്കണം. പ്രത്യേകിച്ച് നടക്കുമ്പോഴെല്ലാം കണ്ണിലേയ്ക്ക് പ്രാണികള്‍ വരാതെ ശ്രദ്ധിക്കേണ്ടത് അനിവാര്യമാണ്. ഇത്തരത്തില്‍ കൃത്യമായ പരിചരണം നല്‍കിയാല്‍ കണ്ണുകളില്‍ വിര വരുന്നത് തടയാം.
