കുടുംബത്തെയും സുഹൃത്തുക്കളെയും യുഎഇയിലേക്ക് വിസിറ്റ് വിസയില്‍ കൊണ്ടുവരാൻ ശ്രമിക്കുന്നവർക്കുള്ള പ്രതിമാസ ശമ്പള മാനദണ്ഡം നേരത്തെ പ്രഖ്യാപിച്ചതാണ് യുഎഇ. ഇക്കാര്യത്തില്‍ കൂടുതല്‍ വ്യക്തത നിലവില്‍ വന്നിരിക്കുകയാണ് ഐസിപിയെ ഉദ്ദരിച്ച്‌ ‘ഖലീജ് ടൈംസ്’ ഉള്‍പ്പടെ നല്‍കിയ റിപ്പോർട്ടുകളനുസരിച്ച്‌ മക്കളെയും മാതാപിതാക്കളെയും യുഎഇയില്‍ സന്ദശനത്തിന് കൊണ്ടുവരാൻ സ്പോണ്‍സർ ചെയ്യുന്നയാള്‍ക്ക് പ്രതിമാസം 4000 ദിർഹം ശമ്പളം ഉണ്ടായിരിക്കണം.
സഹോദരങ്ങള്‍, സ്വന്തം പേരക്കുട്ടികള്‍, മുത്തച്ഛൻ, മുത്തശ്ശി എന്നിവരെയാണ് കൊണ്ടു വരുന്നതെങ്കില്‍ 8000 ദിർഹമാണ് ശമ്പളം ഉണ്ടായിരിക്കേണ്ടത്. അമ്മാവൻ , ആന്റി, കസിൻ എന്നിവർക്കും ഇതേ ശമ്പള പരിധിയാണ്.സുഹൃത്തുക്കളെ വിസിറ്റ് വിസയില്‍ സ്പോണ്‍സർ ചെയ്യാൻ ഉദ്ദേശിക്കുന്നവർക്ക് 15,000 ദിർഹം മാസ ശമ്പളം ഉണ്ടായിരിക്കണം. ബന്ധുക്കള്‍ക്കുള്ള വിസിറ്റ് വിസയുടെ അപേക്ഷാ ഘട്ടത്തില്‍ തന്നെ ബന്ധുത്വം തെളിയിക്കുന്ന രേഖകള്‍ നല്‍കണം. മടക്ക ടിക്കറ്റ്, 6 മാസം കാലാവധിയുള്ള പാസ്പോർട്ട് എന്നിവയും നിർബന്ധമാണ്.
