- ഡോ. ജോര്ജ് എം. കാക്കനാട്
ഹൂസ്റ്റണ്: ഒരു ഡിബേറ്റ് ഉണ്ടാക്കിയ പുകില് സാക്ഷാല് ജോ ബൈഡനോളം മറ്റാര്ക്കും അറിയില്ല. മര്യാദയ്ക്ക് പ്രസിഡന്റ് സ്ഥാനത്തേക്ക് മത്സരിച്ചിരുന്ന ബൈഡനെ എല്ലാവരും കൂടി പിടിച്ചു പുറത്താക്കിയതിനു പിന്നില് ഡിബേറ്റില് ഏറ്റ തിരിച്ചടിയാണെന്ന് ‘ വാഷിങ്ടണിലെ മൈല് കുറ്റികള്ക്കു പോലും അറിയാം’. അന്നു ബൈഡനെ മലര്ത്തിയടിച്ച റിപ്പബ്ലിക്കന് സ്ഥാനാര്ഥിയും മുന് പ്രസിഡന്റുമായ ഡൊണാള്ഡ് ട്രംപിന് അതുകൊണ്ടുതന്നെ ഡിബേറ്റിന്റെ പ്രാധാന്യം മറ്റാരും പറഞ്ഞു കൊടുക്കേണ്ടതില്ല.
എബിസി നെറ്റ്വര്ക്ക് സംഘടിപ്പിക്കുന്ന ഡിബേറ്റില് പങ്കെടുക്കണോ വേണ്ടയോ എന്ന ‘കണ്ഫ്യൂഷനി’ലാണ് ട്രംപ് എന്നാണ് പൊതുവേയുള്ള സംസാരം. ഒന്നാമത് എബിസി നെറ്റ്വര്ക്കിന് ട്രംപിനെ കാണാന് മേല. തിരിച്ചും അങ്ങനെതന്നെ. പുലിമടയിലേക്ക് തലവച്ചു കൊടുക്കണോ എന്നാണ് ട്രംപിന്റെ സംശയം. ഈ വിഷയം എടുത്തു പിടിച്ച് ഡൊണാള്ഡ് ട്രംപിന്റെയും കമലാ ഹാരിസിന്റെയും പ്രചാരണ സംഘങ്ങള് കടുത്ത ഏറ്റുമുട്ടലിലാണ്. മൈക്ക് മുഴുവന് സമയവും ഓണ് ആക്കി വയ്ക്കണമെന്ന് കമലയുടെ ടീം പറയുമ്പോള് ആദ്യ സംവാദത്തിന്റെ നിയമങ്ങള് അതേപടി തുടരണമെന്ന് ട്രംപ് ടീമും വാദിക്കുന്നു.
വൈസ് പ്രസിഡന്റിന്റെ ടീം തുറന്ന മൈക്രോഫോണുകളിലേക്ക് മടങ്ങാന് ആഹ്വാനം ചെയ്യുന്നു. അതേസമയം റിപ്പബ്ലിക്കന് എതിരാളിക്ക് അതില് അത്ര താല്പ്പര്യമില്ല. എബിസി നെറ്റ്വര്ക്ക് പക്ഷപാതപരമാണെന്ന് വാദിക്കുന്ന ട്രംപ് സംഘം ഡിബേറ്റിനില്ലെന്ന് സൂചനയാണ് നല്കുന്നത്. ‘ഞാന് എന്തിന് കമലാ ഹാരിസിനെതിരെ ആ നെറ്റ്വര്ക്കില് ഡിബേറ്റ് നടത്തും?’ വൈറ്റ് ഹൗസിനായി മൂന്നാമത്തെ ബിഡ് നടത്തുന്ന ട്രംപ്, ഞായറാഴ്ച രാത്രി വൈകി ഒരു സോഷ്യല് മീഡിയ പോസ്റ്റില് നെറ്റ്വര്ക്ക് പക്ഷപാതപരമാണെന്ന് ആരോപിച്ചു കുറിച്ച വാക്കുകളാണിത്.
വൈസ് പ്രസിഡന്റിന്റെ പ്രചാരണം പരിപാടിയിലുടനീളം സ്ഥാനാര്ത്ഥികളുടെ മൈക്രോഫോണുകള് ഓണാക്കി വയ്ക്കണമെന്ന് ആഗ്രഹിക്കുന്നു. കഴിഞ്ഞ പ്രസിഡന്ഷ്യല് ഡിബേറ്റിലെന്നപോലെ എതിരാളി സംസാരിക്കുമ്പോള് നിശബ്ദമാക്കരുത്.- ഹാരിസ് വക്താവ് ബ്രയാന് ഫാലണ് പറഞ്ഞു. ‘ഹോട്ട് മൈക്കുകള്’ എന്ന് വിളിക്കപ്പെടുന്ന ഇതിന് രാഷ്ട്രീയ സ്ഥാനാര്ത്ഥികളെ സഹായിക്കാനോ വേദനിപ്പിക്കാനോ കഴിയും. ചിലപ്പോള് പൊതുജനങ്ങള്ക്ക് വേണ്ടിയുള്ളതല്ലാത്ത അഭിപ്രായങ്ങള് പരസ്യമാകുന്നതിന് ഇതു കാരണമാകും.
‘ട്രംപിന്റെ നിരന്തരമായ നുണകളും തടസ്സങ്ങളും തത്സമയം നേരിടാന് വൈസ് പ്രസിഡന്റ് തയ്യാറാണ്. മ്യൂട്ട് ബട്ടണിന് പിന്നില് ഒളിക്കുന്നത് ട്രംപ് അവസാനിപ്പിക്കണം.’ ഫാലണ് പ്രസ്താവനയില് ആവശ്യപ്പെട്ടു. മൈക്രോഫോണുകള് നിശബ്ദമാക്കിയ സിഎന്എന്നിന്റെ ജൂണ് സംവാദത്തിന്റെ അതേ നിബന്ധനകള് തങ്ങള് ഇതിനകം അംഗീകരിച്ചിട്ടുണ്ടെന്ന് ട്രംപ് കാമ്പെയ്ന് മുതിര്ന്ന ഉപദേഷ്ടാവ് ജേസണ് മില്ലര് ഒരു പ്രസ്താവനയില് പറഞ്ഞു:
അതേസമയം തന്റെ മൈക്രോഫോണ് ഓണ് ചെയ്തു വയ്ക്കാനാണ് താന് ഇഷ്ടപ്പെടുന്നതെന്ന് ട്രംപ് പിന്നീട് മാധ്യമപ്രവര്ത്തകരോട് പറഞ്ഞു. കഴിഞ്ഞ തവണ ഇത് നിശബ്ദമാക്കിയത് തനിക്ക് ഇഷ്ടപ്പെട്ടില്ലെന്നും തന്റെ പുതിയ എതിരാളിക്കെതിരായ ഏറ്റുമുട്ടലിന് താന് കൂടുതല് തയ്യാറെടുക്കുന്നില്ലെന്നും കൂട്ടിച്ചേര്ത്തു. ഇരു സ്ഥാനാര്ഥികളുടെയും അഭിപ്രായത്തിനുള്ള അഭ്യര്ത്ഥനയോട് എബിസിയുടെ പ്രതിനിധികള് പ്രതികരിച്ചില്ല.
കഴിഞ്ഞ മാസം പ്രസിഡന്റ് ജോ ബൈഡന് സ്ഥാനമൊഴിഞ്ഞതിന് ശേഷമാണ് ഹാരിസ് ഡെമോക്രാറ്റിക് സ്ഥാനാര്ത്ഥിത്വം ഉറപ്പിച്ചത്. ബൈഡനും ട്രംപും എബിസി ന്യൂസ് ആതിഥേയത്വം വഹിക്കുന്ന സെപ്റ്റംബര് 10 സംവാദത്തിന് തയാറാണെന്ന് വ്യക്തമാക്കുകയും ചെയ്തിരുന്നു. തന്റെ പ്രചാരണം കാര്യക്ഷമമാക്കുന്നതിന് ഏര്ലി ഡിബേറ്റുകള് ഗുണം ചെയ്യും എന്നായിരുന്നു ബൈഡന്റെ ചിന്ത. എന്നാല് ജൂണ് 27 ന് നടന്ന മുഖാമുഖം ബൈഡന്റെ സ്ഥാന ഭ്രംശത്തിലാണ് കലാശിച്ചത്.
