കൊച്ചി: കേരളത്തിലെ ഏറ്റവും ചെലവേറിയ വാഹന നമ്പർ ലേലത്തിന് സാക്ഷ്യം വഹിച്ച് എറണാകുളം ആർടി ഓഫീസ്. അരക്കോടിയോളം രൂപയ്ക്ക് കൊച്ചി ആർടി ഓഫീസിന് കീഴിൽ വരുന്ന ഫാൻസി വാഹന നമ്പർ ലേലത്തിൽ വിറ്റുപോയി. KL 07 DG 0007 എന്ന വാഹന നമ്പരാണ് ലേലം വിളികൾക്കൊടുവിൽ വൻ തുകയ്ക്ക് വിറ്റുപോയത്. കൊച്ചിയിലെ സ്വകാര്യ കമ്പനിയാണ് ഫാൻസി നമ്പർ സ്വന്തമാക്കിയത്.
സോഫ്റ്റ് വെയർ കമ്പനിയായ ലിറ്റ്മസ് 7 സിസ്റ്റം കൺസൾട്ടിങ് പ്രൈവറ്റ് ലിമിറ്റഡ് ആണ് ഫാൻസി നമ്പർ സ്വന്തമാക്കിയത്. 45.99 ലക്ഷം രൂപയാണ് KL 07 DG 0007 എന്ന വാഹന നമ്പരിനായി കമ്പനി ചെലവഴിച്ചത്. അഞ്ചുപേരായിരുന്നു ലേലത്തിൽ പങ്കെടുത്തത്. ഫാൻസി നമ്പരിനായി 25000 രൂപ അഡ്വാൻസ് നൽകി ബുക്ക് ചെയ്തായിരുന്നു ലേലം വിളി അരങ്ങേറിയത്.
ലംബോർഗിനി ഉറുസ് എസ്യുവിയിലാണ് KL 07 DG 0007 എന്ന നമ്പർ പതിയുക. നാലരക്കോടിയോളം വില വരുന്ന വാഹനമാണ് ലംബോർഗിനി ഉറുസ് എസ്യുവി. അതേസമയം മറ്റൊരു ഫാൻസി നമ്പരും ഉയർന്ന വിലയ്ക്ക് ലേലത്തിൽ പോയി. KL 07 DG 0001 എന്ന നമ്പർ 25 ലക്ഷം രൂപയ്ക്കാണ് വിറ്റുപോയത്. പിറവം സ്വദേശി തോംസൺ ആണ് നമ്പർ സ്വന്തമാക്കിയത്. ലേലത്തിൽ നാലുപേരാണ് പങ്കെടുത്തത്.
കേരളത്തിൽ ഇതാദ്യമല്ല ഫാൻസി നമ്പരുകൾ ലക്ഷങ്ങൾക്ക് വിറ്റുപോകുന്നത്. നേരത്തെ KL 01 CK 0001 എന്ന നമ്പർ 31 ലക്ഷം രൂപയ്ക്ക് വിറ്റുപോയത് റെക്കോഡായിരുന്നു. തിരുവനന്തപുരം സ്വദേശിയായ കെഎസ് ബാലഗോപാൽ ആയിരുന്നു നമ്പർ സ്വന്തമാക്കിയത്. എന്നാൽ 45.99 ലക്ഷം രൂപയ്ക്ക് KL 07 DG 0007 എന്ന നമ്പർ വിറ്റുപോയതോടെ ഇതിനായി റെക്കോഡ്.
ഫാൻസി നമ്പർ എങ്ങനെ ബുക്ക് ചെയ്യാം?
parivahan.gov.in എന്ന വെബ്സൈറ്റിലൂടെ ഫാൻസി നമ്പർ ബുക്ക് ചെയ്യാനാകും.
‘Online Services’ എന്ന ഓപ്ഷനിലെ ‘Fancy Number’ൽ ക്ലിക്ക് ചെയ്ത് ‘New Public User’ എന്ന ഓപ്ഷൻ ഉപയോഗിച്ച് പുതിയ അക്കൗണ്ട് തുടങ്ങി അതത് ആർടിഒ ഓഫീസ് നൽകി ലഭ്യമായ ഫാൻസി നമ്പരുകൾ തിരഞ്ഞെടുക്കാൻ അവസരമുണ്ട്. കൂടാതെ, ആവശ്യമായ നമ്പർ ലഭ്യമാണോ എന്ന് പരിശോധിക്കാനാകും. ലേലം തുടങ്ങുന്ന സമയത്ത് വീണ്ടും പോർട്ടലിൽ പ്രവേശിച്ച് ലേല പ്രക്രിയയിൽ പങ്കെടുക്കാം.
