തിരുവനന്തപുരം അന്താരാഷ്ട്ര വിമാനത്താവളത്തിൽ നടന്ന യാദൃച്ഛികമായ പരിശോധനയിൽ പത്ത് കിലോഗ്രാമോളം ഹൈബ്രിഡ് കഞ്ചാവ് പിടികൂടി. വിമാനത്താവളത്തിലെ എക്സ്റേ സ്കാനിംഗ് വിഭാഗത്തിലെ ഉദ്യോഗസ്ഥർ ലഗേജ് പരിശോധിക്കുന്നതിനിടെയാണ് സംശയാസ്പദമായ പൊതികൾ ശ്രദ്ധയിൽപ്പെട്ടത്. ഭക്ഷണപ്പൊതികളുടെ രൂപത്തിലായിരുന്നു ഈ പായ്ക്കറ്റുകൾ.
ആദ്യഘട്ടത്തിൽ, ഇത് ചോക്ലേറ്റ് ആണെന്നാണ് ഉദ്യോഗസ്ഥർ അനുമാനിച്ചത്. എന്നാൽ പിന്നീട്, ഇതിൽ സിഗരറ്റുകളോ മറ്റോ ആണോ ഉള്ളതെന്ന് സംശയം തോന്നിയതിനെത്തുടർന്ന് പായ്ക്കറ്റുകൾ തുറന്നു പരിശോധിക്കാൻ തീരുമാനിക്കുകയായിരുന്നു. ഈ പരിശോധനയിലാണ് ഏകദേശം പത്ത് കിലോഗ്രാം വരുന്ന ഹൈബ്രിഡ് കഞ്ചാവ് കണ്ടെത്തിയത്.
സംഭവത്തിൽ ബെംഗളൂരിൽ പഠിക്കുന്ന മലപ്പുറം സ്വദേശികളായ വിദ്യാർഥികളാണ് പിടിയിലായിരിക്കുന്നത്. 23 വയസ്സുള്ള ഒരു യുവാവും 21 വയസ്സുള്ള ഒരു യുവതിയുമാണ് കസ്റ്റംസിന്റെ പിടിയിലായത്. ഇവർ രക്ഷിതാക്കളെ അറിയിക്കാതെയാണ് വിദേശയാത്രയ്ക്ക് പോയതെന്നും അന്വേഷണത്തിൽ വ്യക്തമായിട്ടുണ്ട്. തായ്ലൻഡിൽ പോയ ശേഷം ബാങ്കോക്കിൽ നിന്നാണ് ഇവർ തിരികെ എത്തിയത്.
കൂടുതൽ അന്വേഷണങ്ങൾക്കായി കോഴിക്കോട്ടുനിന്നുള്ള കസ്റ്റംസ് ഉദ്യോഗസ്ഥർ സ്ഥലത്തെത്തിയിട്ടുണ്ട്. നിലവിൽ വിദ്യാർഥികൾ കസ്റ്റംസിന്റെ കസ്റ്റഡിയിലാണ്. ഇവരെ വിശദമായി ചോദ്യം ചെയ്തുവരികയാണ്. കൂടാതെ, വിദ്യാർഥികളുടെ രക്ഷിതാക്കളെയും വിളിച്ചുവരുത്തി വിവരങ്ങൾ ശേഖരിക്കുന്നുണ്ട്.
വിദ്യാർഥികൾക്ക് പണവും വിദേശയാത്രയ്ക്കുള്ള ചെലവുകളും നൽകി ലഹരി കടത്തുന്ന സംഘം ഇവരെ കാരിയർമാരായി ഉപയോഗിച്ചിരിക്കാനുള്ള സാധ്യതയാണ് കസ്റ്റംസ് അധികൃതർ പ്രധാനമായും സംശയിക്കുന്നത്. കഞ്ചാവാണെന്നുള്ള വിവരം വിദ്യാർഥികളെ അറിയിക്കാതെയായിരിക്കാം ഇവരെ ഈ ദൗത്യം ഏൽപ്പിച്ചതെന്നും അന്വേഷണ സംഘം പരിശോധിക്കുന്നുണ്ട്.
ഈ ലഹരി കടത്തിനുപിന്നിൽ സ്ഥിരമായി കഞ്ചാവ് കടത്തുന്ന ഒരു സംഘം പ്രവർത്തിക്കുന്നുണ്ടോയെന്നും കസ്റ്റംസ് അന്വേഷിക്കുന്നുണ്ട്. നേരത്തെയും തമിഴ്നാട്ടിലും കർണാടകത്തിലും പഠിക്കുന്ന മലയാളി വിദ്യാർഥികളെ ഇത്തരത്തിൽ ലഹരി കടത്തിനായി ഉപയോഗിക്കുന്നതായി അന്വേഷണ സംഘങ്ങൾ കണ്ടെത്തിയിരുന്നു. ഈ സാഹചര്യത്തിൽ, പുതിയ സംഭവവും അതീവ ഗൗരവത്തോടെയാണ് അധികൃതർ കാണുന്നത്. വിശദമായ അന്വേഷണത്തിലൂടെ മാത്രമേ കൂടുതൽ വിവരങ്ങൾ ലഭ്യമാകൂ എന്ന് കസ്റ്റംസ് അറിയിച്ചു.
