Author: George Kakkanatt

ജീവിതപങ്കാളി എന്നത് വൈകാരികമായ ഒരു പിന്തുണ മാത്രമല്ല, മറിച്ച് ശാരീരികമായ ആരോഗ്യത്തിന്റെ കാവൽക്കാരൻ കൂടിയാണെന്ന് പുതിയ പഠനങ്ങൾ. വിവാഹവും ദീർഘായുസ്സും തമ്മിലുള്ള ബന്ധത്തെക്കുറിച്ച് കാലങ്ങളായി ചർച്ചകൾ നടക്കുന്നുണ്ടെങ്കിലും, ക്യാൻസർ സാധ്യതയുമായി ഇതിന് നേരിട്ട് ബന്ധമുണ്ടെന്നാണ് ‘ക്യാൻസർ റിസർച്ച് കമ്മ്യൂണിക്കേഷൻസ്’ പ്രസിദ്ധീകരിച്ച ഏറ്റവും പുതിയ പഠനം ചൂണ്ടിക്കാട്ടുന്നത്. വിവാഹിതരായ വ്യക്തികളെ അപേക്ഷിച്ച് അവിവാഹിതരായ ആളുകളിൽ അർബുദ രോഗബാധയ്ക്കുള്ള സാധ്യത വളരെ കൂടുതലാണെന്ന് ഈ ഗവേഷണം തെളിയിക്കുന്നു. സാമൂഹികമായ ഒറ്റപ്പെടലും ജീവിതശൈലിയിലെ മാറ്റങ്ങളും എങ്ങനെയാണ് ഒരു വ്യക്തിയുടെ മാരക രോഗസാധ്യതകളെ സ്വാധീനിക്കുന്നത് എന്നതിലേക്കാണ് ഈ പഠനം വിരൽ ചൂണ്ടുന്നത്. അവിവാഹിതരായ പുരുഷന്മാരിലും സ്ത്രീകളിലും ക്യാൻസർ വരാനുള്ള സാധ്യത ഞെട്ടിപ്പിക്കുന്ന വിധം വർദ്ധിച്ചിട്ടുണ്ടെന്നാണ് കണക്കുകൾ പറയുന്നത്. പഠനമനുസരിച്ച്, ഒരിക്കൽ പോലും വിവാഹം കഴിക്കാത്ത പുരുഷന്മാർക്ക് വിവാഹിതരായവരേക്കാൾ 68 ശതമാനം അധികം ക്യാൻസർ സാധ്യതയുണ്ട്. എന്നാൽ സ്ത്രീകളുടെ കാര്യത്തിൽ ഈ കണക്ക് അതിലും ഭീകരമാണ്; അവിവാഹിതരായ സ്ത്രീകൾക്ക് വിവാഹിതരോ വിധവകളോ ആയവരേക്കാൾ 83 ശതമാനം വരെ കൂടുതൽ അർബുദ ഭീഷണി നിലനിൽക്കുന്നു. ജീവിതത്തിൽ ഒരിക്കലെങ്കിലും വിവാഹിതരായവർക്ക്, അവർ നിലവിൽ വിവാഹബന്ധം വേർപ്പെടുത്തിയവരാണെങ്കിൽ പോലും അവിവാഹിതരേക്കാൾ കൂടുതൽ പ്രതിരോധശേഷി ഉണ്ടെന്ന കണ്ടെത്തൽ ശാസ്ത്രലോകത്തെ അത്ഭുതപ്പെടുത്തിയിരിക്കുകയാണ്. ദാമ്പത്യം എങ്ങനെയാണ് അർബുദത്തിൽ നിന്ന് സംരക്ഷണം നൽകുന്നത് എന്ന ചോദ്യത്തിന് വിദഗ്ധർ നൽകുന്ന പ്രധാന ഉത്തരം സാമൂഹിക പിന്തുണ എന്നതാണ്. വിവാഹിതരായ ആളുകൾക്ക് അവരുടെ പങ്കാളികളിൽ നിന്ന് നിരന്തരമായ ആരോഗ്യ ശ്രദ്ധ ലഭിക്കുന്നു. പതിവായ ആരോഗ്യ പരിശോധനകൾ നടത്തുന്നതിനും രോഗലക്ഷണങ്ങൾ തുടക്കത്തിലേ തിരിച്ചറിഞ്ഞ് ചികിത്സ തേടുന്നതിനും പങ്കാളിയുടെ പ്രോത്സാഹനം വലിയ പങ്ക് വഹിക്കുന്നുണ്ട്. അവിവാഹിതരായ ആളുകൾ പലപ്പോഴും സാമൂഹികമായി ഒറ്റപ്പെട്ടു പോകുന്നതിനാൽ, രോഗത്തിന്റെ ആദ്യ ലക്ഷണങ്ങൾ അവഗണിക്കുന്നതിനും പ്രതിരോധ പരിശോധനകളിൽ  നിന്ന് വിട്ടുനിൽക്കുന്നതിനും സാധ്യതയുണ്ട്. ഈ ഏകാന്തത രോഗം ഗുരുതരമാകാൻ കാരണമാകുന്നു. വിവാഹിതരായ വ്യക്തികൾ കൂടുതൽ ആരോഗ്യകരമായ ജീവിതശൈലി പിന്തുടരുന്നതായി ഗവേഷകർ നിരീക്ഷിക്കുന്നു. ലഹരി വസ്തുക്കളുടെ ഉപയോഗം, അമിത മദ്യപാനം, പുകയില ശീലം തുടങ്ങിയ ആരോഗ്യത്തെ ദോഷകരമായി ബാധിക്കുന്ന ശീലങ്ങളിൽ നിന്ന് വിവാഹിതർ ഒരു പരിധി വരെ വിട്ടുനിൽക്കുന്നു. പ്രത്യേകിച്ചും ശ്വാസകോശ ക്യാൻസർ, ഗർഭാശയ മുഖ ക്യാൻസർ എന്നിവ പുകവലിയുമായും സുരക്ഷിതമല്ലാത്ത ജീവിതരീതികളുമായും ബന്ധപ്പെട്ടിരിക്കുന്നു. ജീവിതത്തിൽ ഉത്തരവാദിത്തങ്ങളും കരുതാൻ ഒരാളും ഉള്ളപ്പോൾ ആളുകൾ തങ്ങളുടെ ആരോഗ്യത്തിന്റെ കാര്യത്തിൽ കൂടുതൽ ജാഗ്രത കാണിക്കുന്നു. ഇത്തരം ജീവിതശൈലി മാറ്റങ്ങൾ സ്വാഭാവികമായും ക്യാൻസർ സാധ്യത കുറയ്ക്കുന്നു. മുൻകാലങ്ങളിൽ പുരുഷന്മാരാണ് വിവാഹത്തിലൂടെ കൂടുതൽ ആരോഗ്യപരമായ നേട്ടങ്ങൾ ഉണ്ടാക്കുന്നതെന്നാണ് കരുതിയിരുന്നത്. എന്നാൽ ഈ പഠനം വ്യക്തമാക്കുന്നത് സ്ത്രീകൾക്കാണ് ദാമ്പത്യം കൂടുതൽ സംരക്ഷണം നൽകുന്നത് എന്നാണ്. അവിവാഹിതരായ സ്ത്രീകളിൽ അണ്ഡാശയ ക്യാൻസർ, എൻഡോമെട്രിയൽ ക്യാൻസർ എന്നിവയ്ക്കുള്ള സാധ്യത കൂടുതലാണ്. ഇതിന് ജീവശാസ്ത്രപരമായ കാരണങ്ങളും ഉണ്ടായേക്കാമെന്ന് ശാസ്ത്രജ്ഞർ കരുതുന്നു. പ്രസവിക്കാത്ത സ്ത്രീകളിൽ ഇത്തരം ക്യാൻസറുകൾ വരാനുള്ള സാധ്യത കൂടുതലാണെന്ന വസ്തുതയും ഇതിനോട് ചേർത്തു വായിക്കേണ്ടതാണ്. ഹോർമോൺ വ്യതിയാനങ്ങളും ജീവിതചര്യകളും സ്ത്രീകളുടെ ആരോഗ്യത്തെ ദാമ്പത്യവുമായി കൂടുതൽ ബന്ധിപ്പിക്കുന്നു. വിവാഹത്തിന്റെ ഗുണഫലങ്ങൾ വിവിധ വംശജരിൽ വ്യത്യസ്തമായാണ് കാണപ്പെടുന്നത്. കറുത്ത വർഗക്കാരായ പുരുഷന്മാരിലാണ് വിവാഹത്തിലൂടെയുള്ള ആരോഗ്യ സംരക്ഷണം ഏറ്റവും കൂടുതൽ പ്രകടമാകുന്നത് എന്ന് പഠനം പറയുന്നു. കുടുംബ വ്യവസ്ഥിതി നൽകുന്ന ശക്തമായ പിന്തുണയും പരിചരണവും ഇവരിലെ ക്യാൻസർ മരണനിരക്ക് കുറയ്ക്കാൻ സഹായിക്കുന്നുണ്ട്. നേരത്തെയുള്ള രോഗനിർണയത്തിനും ചിട്ടയായ ചികിത്സ ഉറപ്പാക്കുന്നതിനും പങ്കാളികൾ വഹിക്കുന്ന പങ്ക് ഇവർക്കിടയിൽ നിർണ്ണായകമാണ്. കുടുംബം ഒരു സംരക്ഷണ കവചമായി പ്രവർത്തിക്കുന്നതിന്റെ മികച്ച ഉദാഹരണമാണിതെന്ന് പഠനത്തിന് നേതൃത്വം നൽകിയ പൗലോ എസ്. പിൻഹീറോ അഭിപ്രായപ്പെടുന്നു. എല്ലാ വിദഗ്ധരും വിവാഹം മാത്രമാണ് പരിഹാരമെന്ന് കരുതുന്നില്ല. വിവാഹിതർക്ക് ലഭിക്കുന്ന മെച്ചപ്പെട്ട ആരോഗ്യ ഇൻഷുറൻസ് സൗകര്യങ്ങളും സാമ്പത്തിക സുരക്ഷിതത്വവും മികച്ച ചികിത്സ ലഭിക്കാൻ കാരണമായേക്കാം. അവിവാഹിതരായ രോഗികളോട് ആരോഗ്യപ്രവർത്തകർ ചിലപ്പോഴെങ്കിലും പക്ഷപാതപരമായി പെരുമാറുന്നുണ്ടോ എന്ന സംശയവും ഉയരുന്നുണ്ട്. ഒറ്റയ്ക്ക് താമസിക്കുന്നവർക്ക് വേണ്ടത്ര പരിചരണം നൽകാൻ വീട്ടിൽ ആളില്ലെന്ന ധാരണ ചികിത്സാ രീതികളെ സ്വാധീനിച്ചേക്കാം. അതുകൊണ്ട് തന്നെ വിവാഹമെന്ന പദവിയേക്കാൾ പ്രധാനം ഒരു വ്യക്തിക്ക് ലഭിക്കുന്ന സാമൂഹികമായ പിന്തുണയും ഇൻഷുറൻസ് പോലുള്ള സംവിധാനങ്ങളും ഉറപ്പാക്കുക എന്നതാണ് പ്രധാനം. ചുരുക്കത്തിൽ, വിവാഹം നേരിട്ട് ക്യാൻസറിനെ തടയുകയല്ല ചെയ്യുന്നത്, മറിച്ച് ഒരു...