Author: George Kakkanatt

ഇന്ത്യയിലെ കഠിനമായ ഉഷ്ണതരംഗത്തെ ആഫ്രിക്കയിലെ താപനിലയുമായി താരതമ്യം ചെയ്യുന്ന ഹീറ്റ് മാപ്പ് (Heat Map) സോഷ്യൽ മീഡിയയിൽ വൈറലാകുന്നു. ആഫ്രിക്കയിലെ പല ഭാഗങ്ങളെക്കാളും ഉയർന്ന താപനിലയാണ് ഇന്ത്യയിൽ രേഖപ്പെടുത്തുന്നത് എന്ന് കാണിക്കുന്ന ചിത്രം ‘ഇന്ത്യ ഇപ്പോൾ ഇതാണ്’ എന്ന അടിക്കുറിപ്പോടെയാണ് പ്രചരിക്കുന്നത്. കടും ചുവപ്പും ഓറഞ്ചും നിറങ്ങളിൽ ഇന്ത്യയുടെ ഭൂപടം ജ്വലിച്ചു നിൽക്കുമ്പോൾ, ആഫ്രിക്കയുടെ പല ഭാഗങ്ങളിലും താരതമ്യേന കുറഞ്ഞ ചൂടാണ് അനുഭവപ്പെടുന്നത് എന്നത് വലിയ ചർച്ചകൾക്ക് വഴിവെച്ചിരിക്കുകയാണ്. ഇന്ത്യ അനുഭവിക്കുന്ന ഈ ‘പ്രഷർ കുക്കർ പ്രഭാവത്തിന്റെ’ (Pressure Cooker Effect) കാരണങ്ങൾ ഐ.എഫ്.എസ് ഉദ്യോഗസ്ഥനായ ഹിമാൻഷു ത്യാഗി വിശദീകരിച്ചു. ഇന്ത്യയുടെ ഭൂമിശാസ്ത്രപരമായ പ്രത്യേകതകളാണ് ഈ താപനിലയ്ക്ക് പ്രധാന കാരണം. ആർട്ടിക്, സൈബീരിയ എന്നിവിടങ്ങളിൽ നിന്നുള്ള തണുത്ത കാറ്റിനെ ഹിമാലയ പർവ്വതനിരകൾ തടയുന്നു. അതേസമയം, പടിഞ്ഞാറ് താർ മരുഭൂമിയിൽ നിന്നുള്ള ഉഷ്ണക്കാറ്റ് മണ്ണിന്റെ ഈർപ്പം പൂർണ്ണമായും നീക്കം ചെയ്യുകയും വായുവിനെ ഉണക്കുകയും ചെയ്യുന്നു. വനവൽക്കരണത്തിലൂടെയും ഹരിതകവചം സംരക്ഷിക്കുന്നതിലൂടെയും മാത്രമേ ഇതിന് ശാശ്വത പരിഹാരം കാണാൻ കഴിയൂ എന്നും അദ്ദേഹം കുറിച്ചു. ഹിമാൻഷു ത്യാഗിയുടെ പോസ്റ്റ് വലിയ തോതിലുള്ള പ്രതികരണങ്ങൾക്കാണ് കാരണമായത്. മരം വെച്ചുപിടിപ്പിക്കുന്നത് കൊണ്ട് മാത്രം ഈ പ്രശ്നം പരിഹരിക്കാൻ കഴിയില്ലെന്നും നിലവിലുള്ള ആവാസവ്യവസ്ഥകളെ സംരക്ഷിക്കണമെന്നും പലരും അഭിപ്രായപ്പെട്ടു. വികസന പദ്ധതികൾക്കായി വനങ്ങൾ വൻതോതിൽ വെട്ടിത്തെളിക്കുന്നത് ചൂട് വർദ്ധിപ്പിക്കാൻ കാരണമാകുന്നുവെന്ന് ചിലർ വിമർശിച്ചു. അതേസമയം, ഹിമാലയം ഇല്ലായിരുന്നുവെങ്കിൽ ഇന്ത്യ ഇത്രത്തോളം ഫലഭൂയിഷ്ഠമായ ഇടമാകില്ലായിരുന്നുവെന്നും കാലവർഷം ലഭിക്കില്ലായിരുന്നുവെന്നും ചൂണ്ടിക്കാട്ടി ഹിമാലയത്തെ അനുകൂലിച്ചും നിരവധി പേർ രംഗത്തെത്തി. ഏഷ്യയിലെ തന്നെ ഏറ്റവും ചൂടുള്ള നഗരങ്ങളിലൊന്നായ ഒഡീഷയിലെ ബലാംഗീർ പോലുള്ള സ്ഥലങ്ങളിൽ വീടിനുള്ളിൽ പോലും ഇരിക്കാൻ കഴിയാത്ത അവസ്ഥയാണെന്ന് ചിലർ പരിതപിച്ചു. ‘ഹർ ഘർ പേഡ്’ (ഓരോ വീട്ടിലും ഒരു മരം) പോലുള്ള പദ്ധതികൾ സർക്കാർ കൊണ്ടുവരണമെന്നും വൻതോതിൽ ഫലവൃക്ഷങ്ങൾ വെച്ചുപിടിപ്പിക്കണമെന്നും ചില ഉപയോക്താക്കൾ നിർദ്ദേശിച്ചു. ജനസംഖ്യാ നിയന്ത്രണം, ഉപഭോഗം കുറയ്ക്കൽ തുടങ്ങിയ കാര്യങ്ങളും പരിസ്ഥിതി സംരക്ഷണത്തിനായി ചർച്ച...