ചിക്കാഗോയിൽ ജനിച്ചു വളർന്ന മുൻ കർദിനാൾ റോബർട്ട് പ്രെവോസ്റ്റ് പത്രോസിന്റെ പിൻഗാമിയായി തിരഞ്ഞെടുക്കപ്പെട്ടപ്പോൾ ഒരു രാജ്യം മുഴുവൻ ആത്മീയാഘോഷത്തിലാണ്. കത്തോലിക്കാ സഭയുടെ 2,000 വർഷത്തെ ചരിത്രത്തിൽ ആദ്യ അമേരിക്കക്കാരനാണ് 69 കാരനായ ലെയോ പതിനാലാമൻ പാപ്പ.
“ചിക്കാഗോയിലെ കത്തോലിക്കരെ സംബന്ധിച്ചിടത്തോളം, അടച്ചുപൂട്ടലുകളും കുറഞ്ഞുവരുന്ന വിശ്വാസികളുടെ സമൂഹവും, അമേരിക്കയിൽ പൊതുവെ കുറഞ്ഞുവരുന്ന കത്തോലിക്കരുടെ സാന്നിധ്യവും മനസ്സിലാക്കാൻ നമ്മെ സഹായിക്കുന്ന, നമ്മെ അറിയുന്ന, നമ്മുടെ അനുഭവം അറിയുന്ന ഒരാളാണ് അദ്ദേഹം”- ചിക്കാഗോയുടെ തെക്ക് ഭാഗത്തുള്ള സെന്റ് സബീന കത്തോലിക്കാ പള്ളിയിലെ പുരോഹിതനായ ഫാദർ മൈക്കൽ പ്ലെഗർ പറഞ്ഞു.
1982-ൽ ബിരുദാനന്തര ബിരുദം നേടിയ ചിക്കാഗോയിലെ ഹൈഡ് പാർക്കിലെ കാത്തലിക് തിയോളജിക്കൽ യൂണിയനിലെ പുരോഹിതന്മാരും ജീവനക്കാരും അടങ്ങുന്ന ഒരു കൂട്ടം ആളുകൾ, റോമിലെ വത്തിക്കാൻ ബാൽക്കണിയിലേക്ക് പോപ്പ് ലിയോ നടക്കുന്നത് ടെലിവിഷനിൽ തത്സമയം കാണിച്ചപ്പോൾ ആഹ്ളാദഭരിതരായി.
“ഞങ്ങളിൽ പലർക്കും വിശ്വസിക്കാൻ കഴിഞ്ഞില്ല, ഞങ്ങളുടെ സന്തോഷം, അഭിമാനം എന്നിവ പ്രകടിപ്പിക്കാൻ വാക്കുകൾ ഇല്ല” – ദൈവശാസ്ത്ര സ്കൂളിന്റെ പ്രസിഡന്റ് സിസ്റ്റർ ബാർബറ റീഡ് പറഞ്ഞു. ‘അസാധാരണമായ കാരുണ്യമുള്ള ഒരു ബുദ്ധിമാനായ മനുഷ്യൻ’ എന്നാണ് സിസ്റ്റർ റീഡ് പോപ്പ് ലിയോയെ വിശേഷിപ്പിച്ചത്. ചിക്കാഗോ അതിരൂപതയുടെയും അതിലെ 1.9 ദശലക്ഷം കത്തോലിക്കരുടെയും 216 ഇടവകകളുടെയും വികാരി ജനറലായ ലോറൻസ് സള്ളിവൻ, പോപ്പ് ലിയോ വളരെ പ്രാർഥനാശീലനായ ഒരു മനുഷ്യനാണെന്നു പറഞ്ഞു. “നമ്മളിൽ ഒരാളെ മാർപാപ്പയായി തിരഞ്ഞെടുക്കുന്നത് ചിക്കാഗോയ്ക്കും, അമേരിക്കയ്ക്കും വലിയ ആവേശത്തിന്റെ ദിവസമാണ്”- അദ്ദേഹം പറഞ്ഞു.
