പറന്നുയർന്ന വിമാനം റാഞ്ചാൻ ശ്രമം; യാത്രക്കാർ ഭീതിയിൽ. കത്തി കാണിച്ച് ഭീഷണി മുഴക്കിയ അക്രമിയെ വിമാനത്തിലെ മറ്റൊരു യാത്രക്കാരൻ വെടിവെച്ച് കൊന്നു. ബെലീസിലാണ് ഈ അപ്രതീക്ഷിത സംഭവം നടന്നത്. വിമാനം നിലത്തിറങ്ങിയപ്പോൾ പരിഭ്രാന്തരായ യാത്രക്കാർ പുറത്തേക്ക് ഓടുന്ന ദൃശ്യങ്ങൾ പുറത്തുവന്നു.
ബെലീസ് അധികൃതർ നൽകുന്ന വിവരങ്ങൾ അനുസരിച്ച്, യുഎസ് പൗരനായ ഒരാളാണ് ട്രോപ്പിക് എയർലൈൻസിന്റെ ചെറിയ വിമാനം റാഞ്ചാൻ ശ്രമിച്ചത്. സാൻ പെഡ്രോയിലേക്കുള്ള യാത്രയ്ക്കിടെ ആകാശത്ത് വെച്ചായിരുന്നു സംഭവം. 49 വയസ്സുകാരനായ അക്രമി കത്തി ഉപയോഗിച്ച് യാത്രക്കാരെ ആക്രമിക്കാൻ തുടങ്ങി. ഈ ആക്രമണത്തിൽ മൂന്ന് പേർക്ക് പരിക്കേറ്റു. അകിന്യേല സാവ ടെയ്ലർ എന്ന യുഎസ് പൗരനാണ് വിമാനത്തിൽ ഭീതി പരത്തിയതെന്ന് ബെലീസ് പോലീസ് കമ്മീഷണർ ചെസ്റ്റർ വില്യംസ് പറഞ്ഞു. തുടർന്ന്, അതേ വിമാനത്തിൽ ഉണ്ടായിരുന്ന ഒരു യാത്രക്കാരൻ ടെയ്ലറെ വെടിവെച്ച് കൊലപ്പെടുത്തി.
അക്രമിയെ വെടിവെച്ച യാത്രക്കാരനെ പോലീസ് കമ്മീഷണർ ചെസ്റ്റർ വില്യംസ് അഭിനന്ദിച്ചു. അദ്ദേഹത്തെ ധീരൻ എന്ന് വിശേഷിപ്പിച്ചതായി ന്യൂയോർക്ക് പോസ്റ്റ് റിപ്പോർട്ട് ചെയ്തു. ടെയ്ലർക്ക് വിമാനത്തിൽ എങ്ങനെ കത്തി കടത്താൻ കഴിഞ്ഞു എന്നത് ഇപ്പോഴും ഒരു ചോദ്യചിഹ്നമാണ്. വിമാനം രാജ്യത്തിന് പുറത്തേക്ക് കൊണ്ടുപോകാനാണ് അക്രമി ആവശ്യപ്പെട്ടത്. ഇയാൾ എന്തിനാണ് റാഞ്ചാൻ ശ്രമിച്ചതെന്ന കാരണം വ്യക്തമല്ല. സംഭവത്തെക്കുറിച്ച് കൂടുതൽ അന്വേഷണങ്ങൾ നടക്കുന്നുണ്ടെന്നും, ബെലീസ് അധികൃതർ യുഎസ് എംബസിയുമായി സഹകരണം തേടിയിട്ടുണ്ടെന്നും റിപ്പോർട്ടുകൾ സൂചിപ്പിക്കുന്നു.
