ന്യൂയോര്ക്ക്: യുഎസ് ബഹിരാകാശ സേനയുടെ രഹസ്യ ദൗത്യമായ X-37B വീണ്ടും ബഹിരാകാശ യാത്രയ്ക്ക് തയ്യാറെടുക്കുന്നു. ബഹിരാകാശ വിമാനത്തിന്റെ അടുത്ത ദൗത്യത്തിനായുള്ള കൗണ്ട്ഡൗണ് നടക്കുന്നതായാണ് റിപ്പോര്ട്ട്. X-37B യുടെ ഇതുവരെയുള്ള എല്ലാ ദൗത്യങ്ങളും വളരെ കൗതുകകരമായിരുന്നുവെങ്കിലും ഏഴാമത്തേ ദൗത്യമായ അടുത്തതില് ചില പ്രത്യേക പുതുമകളും ഉള്പ്പെടും. സ്പേസ് എക്സിന്റെ ഫാല്ക്കല് ഹെവി റോക്കറ്റിലാണ് എക്സ്37ബി ബഹിരാകാശത്ത് എത്തിച്ചേരുന്നത്.
യുഎസ് വ്യോമസേനക്ക് ബഹിരാകാശത്ത് വരെ വന് സാന്നിധ്യമുണ്ടെന്നത് രഹസ്യമായ പരസ്യമാണ്. ഇതിലൊന്നാണ് എക്സ്37ബി എന്ന രഹസ്യ ബഹിരാകാശ പേടകം. ഈ പേടകത്തെ സംബന്ധിച്ചുള്ള രഹസ്യങ്ങളൊന്നും ഇന്നും ആര്ക്കുമറിയില്ലെന്നതാണ് കൗതുകകരം.
2023 ഡിസംബര് 7 ന് ഫ്ലോറിഡയിലെ കെന്നഡി സ്പേസ് സെന്ററില് നിന്ന് എക്സ്-37 ബി മിഷന് 7 വിക്ഷേപിക്കുമെന്ന് ബഹിരാകാശ സേന അറിയിച്ചു. ഫാല്ക്കണ് ഹെവി റോക്കറ്റിലെ ബഹിരാകാശ വിമാനത്തിന്റെ ആദ്യ ദൗത്യം USSF-52 എന്ന് നാമകരണം ചെയ്യപ്പെടും, അത് ബഹിരാകാശ സേനയും എയര്ഫോഴ്സ് റാപ്പിഡ് കപ്പബിലിറ്റീസ് ഓഫീസും ചേര്ന്ന് പ്രവര്ത്തിപ്പിക്കും.
എക്സ്-37 ബി മിഷന് 7 ന് വിശാലമായ പരീക്ഷണ ലക്ഷ്യങ്ങള് ഉണ്ടായിരിക്കുമെന്ന് ബഹിരാകാശ സേന പറഞ്ഞു. പുതിയ പരിക്രമണ വ്യവസ്ഥകളില് പുനരുപയോഗിക്കാവുന്ന ബഹിരാകാശ വിമാനം പ്രവര്ത്തിപ്പിക്കുക, ഭാവി ബഹിരാകാശ ഡൊമെയ്ന് ബോധവല്ക്കരണ സാങ്കേതികവിദ്യകള് പരീക്ഷിക്കുക, നാസ നല്കുന്ന മെറ്റീരിയലുകളിലെ റേഡിയേഷന് ഇഫക്റ്റുകള് അന്വേഷിക്കുക എന്നിവ ഈ പരിശോധനകളില് ഉള്പ്പെടുന്നു.
എയര്ഫോഴ്സ് ഡിപ്പാര്ട്ട്മെന്റിനും അതിന്റെ പങ്കാളികള്ക്കുമായി ഒന്നിലധികം അത്യാധുനിക പരീക്ഷണങ്ങള് നടത്തുന്നതിന് ഫ്ലൈറ്റ് തെളിയിക്കപ്പെട്ട സേവന മൊഡ്യൂളും ഫാല്ക്കണ് ഹെവി റോക്കറ്റും ഉപയോഗിച്ച് പുനരുപയോഗിക്കാവുന്ന X-37B-യുടെ കഴിവുകളുടെ എന്വലപ്പ് വിപുലീകരിക്കുന്നതില് ഞങ്ങള് സന്തുഷ്ടരാണെന്ന് X-37B പ്രോഗ്രാം ഡയറക്ടര് ലെഫ്റ്റനന്റ് കേണല് ജോസഫ് ഫ്രിറ്റ്ഷെന് കൂട്ടിച്ചേര്ത്തു.
ബഹിരാകാശത്തെ വിവിധ പരീക്ഷണങ്ങള്ക്കുള്ള ‘ഓര്ബിറ്റര് ടെസ്റ്റ് വെഹിക്കിള്’ എന്ന നിലയില് 1999ലാണ് എക്സ് 37 എന്ന പദ്ധതി നാസ ആരംഭിക്കുന്നത്. സ്പേസ് ഡ്രോണ് എന്നും ഈ വെഹിക്കിള് അറിയപ്പെടുന്നു. അഞ്ചു വര്ഷത്തിനു ശേഷം പദ്ധതി യുഎസ് പ്രതിരോധ വകുപ്പിനു കൈമാറി. എക്സ്-37 പദ്ധതി പ്രകാരം ഇതുവരെ ആറ് സ്പേസ് ഡ്രോണുകള് വിജയകരമായി വിക്ഷേപിച്ച് തിരിച്ചെത്തിച്ചു. റോക്കറ്റിലേറി വിക്ഷേപണവും തിരികെ വിമാനത്തിന്റേതിനു സമാനമായ ‘ലാന്ഡിങ്ങു’മാണ് ഈ പേടകങ്ങളുടെ പ്രത്യേകത.