മുല്ലപ്പെരിയാര് അണക്കെട്ടിന്റെ സുരക്ഷ സംബന്ധിച്ച് പുതിയ പരിശോധനയ്ക്ക് സമയമായെന്ന ശുപാര്ശയുമായി കേന്ദ്ര ജലകമ്മീഷന്. സുപ്രിംകോടതിയില് സമര്പ്പിച്ച തല്സ്ഥിതി റിപ്പോര്ട്ടിലാണ് കമ്മീഷന് ഇക്കാര്യം അറിയിച്ചിരിക്കുന്നത്. പൊതുതാല്പര്യ ഹര്ജികളില് കോടതി അന്തിമവാദം തുടങ്ങാനിരിക്കെയാണ് റിപ്പോര്ട്ട് നല്കിയത്.
മുല്ലപ്പെരിയാര് കേസില് കോടതി പരിഗണിച്ച് തീരുമാനമെടുക്കേണ്ട സുപ്രധാന വിഷയങ്ങള് എന്തൊക്കെയെന്ന് അറിയിക്കാന് കക്ഷികളുടെ അഭിഭാഷകര്ക്ക് കോടതി നിര്ദേശം നല്കിയിരുന്നു. അഭിഭാഷകര് യോഗം ചേര്ന്ന് സമവായത്തിലെത്തണമെന്നും, ഏതെല്ലാം വിഷയങ്ങളിലാണ് തര്ക്കമെന്ന് അറിയിക്കണമെന്നും നിര്ദേശമുണ്ട്. മുല്ലപ്പെരിയാര് അണക്കെട്ട് ഡീ കമ്മീഷന് ചെയ്യണം എന്നതുള്പ്പെടെയുള്ള വിവിധ ആവശ്യങ്ങള് ഉന്നയിച്ചുക്കൊണ്ടുള്ള പൊതുതാത്പര്യഹര്ജികളാണ് കോടതിക്ക് മുന്നിലുള്ളത്.