ലോക് ഡൗണ്‍ ജൂലൈ 19 വരെ നീട്ടി തമിഴ്‌നാട് സര്‍കാര്‍. അതേസമയം കോവിഡ് കേസുകള്‍ കുറഞ്ഞുവരുന്ന സാഹചര്യത്തില്‍ ചില ഇളവുകള്‍ സര്‍കാര്‍ നല്‍കിയിട്ടുണ്ട്. ഇനിമുതല്‍ കടകള്‍ രാത്രി ഒമ്ബത് മണിക്ക് അടച്ചാല്‍ മതി. റസ്റ്ററന്റുകള്‍, ചായക്കടകള്‍, ബേകെറികള്‍, തട്ടുകടകള്‍ എന്നിവക്ക് ഒമ്ബത് മണിവരെ പ്രവര്‍ത്തിക്കാം. 50 ശതമാനം ഉപഭോക്താക്കള്‍ മാത്രമേ കടകളിലുണ്ടാകാവൂ.
സാമൂഹ്യ അകലം പാലിക്കുകയും കോവിഡ് മാനദണ്ഡങ്ങള്‍ പാലിക്കുകയും ചെയ്യണം. എസി ഷോപുകള്‍ ജനാലകളും വാതിലുകളും തുറന്നിട്ടു വേണം പ്രവര്‍ത്തിക്കാന്‍. വിവാഹങ്ങളില്‍ 50 പേര്‍ക്കും സംസ്‌ക്കാര ചടങ്ങുകളില്‍ 20 പേര്‍ക്കും പങ്കെടുക്കാം.
അതേസമയം സ്‌കൂളുകളും കോളജുകളും ബാറുകളും തിയറ്ററുകളും സ്വിമ്മിങ് പൂളുകളും അടഞ്ഞുകിടക്കും. രാഷ്ട്രീയ- സാംസ്‌ക്കാരിക പൊതുപരിപാടികള്‍ക്കും അനുമതിയില്ല. അന്തര്‍-സംസ്ഥാന ബസുകള്‍ ആരംഭിക്കാന്‍ തീരുമാനമില്ലെങ്കിലും അയല്‍ സംസ്ഥാനമായ പുതുച്ചേരിയിലേക്ക് ബസ് സര്‍വീസുകള്‍ നടത്തുന്നുണ്ട്. കോവിഡ് മാനദണ്ഡങ്ങള്‍ പാലിച്ച്‌ പരീക്ഷകള്‍ നടത്താം.
