ബാലുശ്ശേരി: ‘സഖാവ് നമ്മുടെ ചങ്കാണ്, ഇരട്ടച്ചങ്കന്‍ പൊളിയാണ്..’ എന്ന് പാട്ടുപാടിയ നടി തെസ്നിഖാന്‍ കോണ്‍ഗ്രസിന് വോട്ട് തേടി പ്രചാരണത്തിനിറങ്ങി. ഇടതുപക്ഷത്തിന് വോട്ടുതേടി പുരോഗമന കലാ സാഹിത്യ സംഘം (പു.ക.സ) ഇറക്കിയ വിവാദ വിഡിയോയിലെ നായികയായ പ്രശസ്ത സിനിമ നടി തെസ്നിഖാനാണ് യു.ഡി.എഫ് സ്ഥാനാര്‍ഥി ധര്‍മജനുവേണ്ടി വോട്ടഭ്യര്‍ഥിച്ച്‌ കോഴിക്കോട് ബാലുശ്ശേരി മണ്ഡലത്തില്‍ പര്യടനം നടത്തിയത്. ഇതാണ് പി.ആര്‍ വര്‍ക്കും യാഥാര്‍ഥ്യവും തമ്മിലുള്ള വ്യത്യാസമെന്ന് സോഷ്യല്‍ മീഡിയയില്‍ പരിഹാസമുയര്‍ന്നു.
യു.ഡി.എഫ് കുടുംബസംഗമത്തില്‍ നടി തെസ്നിഖാന്‍ ധര്‍മജനുവേണ്ടി വോട്ടഭ്യര്‍ഥന നടത്തുന്നു
തെസ്നി ഖാനെ നായികയാക്കി പുകസ എറണാകുളം ജില്ലാ കമ്മിറ്റി ഇറക്കിയ ഹ്രസ്വ വീഡിയോ ഉള്ളടക്കത്തിന്‍റെ പേരില്‍ വന്‍ വിവാദമായിരുന്നു. വിഡിയോയിലൂടെ പ്രചരിപ്പിക്കുന്ന ‘പിന്തിരിപ്പന്‍’ സ്വഭാവവും മുസ്ലിംകളെ തീവ്രവാദ മുദ്രകുത്തിയതും വ്യാപകമായ വിമര്‍ശനങ്ങള്‍ക്കിടയാക്കി. തുടര്‍ന്ന് വീഡിയോകള്‍ പിന്‍വലിക്കാന്‍ സംഘടന നിര്‍ബന്ധിതമാവുകയായിരുന്നു. ഗുണനിലവാരം ഇല്ലെന്ന തിരിച്ചറിവിനെ തുടര്‍ന്നാണ് ഈ വീഡിയോകള്‍ പിന്‍വലിച്ചതെന്ന് പുകസ സംസ്ഥാന പ്രസിഡന്‍റ് ഷാജി എന്‍ കരുണ്‍ വ്യക്തമാക്കിയിരുന്നു.
ഞായറാഴ്ച ബാലുശ്ശേരി പഞ്ചായത്തിലെ കൂനഞ്ചേരി, കണ്ണങ്കോട്, പറമ്ബിന്‍മുകള്‍, താനിക്കുഴി, പുളിക്കൂല്‍ താഴെ എന്നിവിടങ്ങളില്‍ നടന്ന യു.ഡി.എഫ് കുടുംബയോഗങ്ങളിലാണ് തെസ്നിഖാന്‍ പങ്കെടുത്തത്.
അതിനിടെ, ബാലുശ്ശേരിയിലെ യു.ഡി.എഫ് സ്ഥാനാര്‍ഥി ധര്മജന് ബോള്‍ഗാട്ടിയുടെ തെരഞ്ഞെടുപ്പ് പ്രചാരണത്തിനായി സിനിമ-സീരിയല്‍ രംഗത്തെ താരങ്ങളാണ് ഇപ്പോള്‍ ബാലുശ്ശേരി മണ്ഡലത്തിെന്‍റ വിവിധ ഭാഗങ്ങളില്‍ നിറഞ്ഞുനില്‍ക്കുന്നത്.
കഴിഞ്ഞദിവസം നടന്മാരായ കലാഭവന്‍ ഷാജോണും ഹരീഷ് കണാരനും ചാനല്‍ മിമിക്രി താരങ്ങളായ അജിത്, ജിേന്‍റാ, അജീഷ്, എബി എന്നിവരും മണ്ഡലത്തിലെ വിവിധസ്ഥലങ്ങളില്‍ നടന്ന കുടുംബ സംഗമങ്ങളില്‍ പങ്കെടുത്തു. അഹമ്മദ്കുട്ടി ഉണ്ണികുളം, കെ. ബാലകൃഷ്ണന്‍ കിടാവ്, കെ. രാമചന്ദന്‍ മാസ്റ്റര്‍, ഫൈസല്‍ അത്തോളി, വി.സി. വിജയന്‍, എ.കെ. അബ്ദുസ്സമദ്, വരുണ്‍കുമാര്‍ എന്നിവരും യോഗങ്ങളില്‍ സംബന്ധിച്ചു.
