ജയ്പുര്‍: രാജസ്ഥാനില്‍ സര്‍ക്കാരിനെ അട്ടിമറിക്കാന്‍ കുതിരക്കച്ചവടം നടത്തിയ കേന്ദ്രമന്ത്രി ഗജേന്ദ്ര സിംഗ് ഷെഖാവത്ത് രാജിവയ്ക്കണമെന്ന് കോണ്‍ഗ്രസ്. കോണ്‍ഗ്രസ് വിമത എംഎല്‍എമാരുമായി ഗജേന്ദ്ര സിംഗ് ഷെഖാവത്ത് നടത്തിയ ഫോണ്‍ സംഭാഷണത്തിന്‍റെ അടിസ്ഥാനത്തില്‍ രാജസ്ഥാന്‍ അഴിമതി വിരുദ്ധ ബ്യൂറോ കേസ് രജിസ്റ്റര്‍ ചെയ്തിരുന്നു. ഇതിനു പിന്നാലെയാണ് ഷെഖാവത്തിന്‍റെ രാജി ആവശ്യപ്പെട്ട് കോണ്‍ഗ്രസ് രംഗത്തെത്തിയത്.
ഓഡിയോ ക്ലിപ്പില്‍ തന്‍റെ ശബ്ദമല്ലെന്നും അതില്‍ പരാമര്‍ശിക്കുന്ന ഷെഖാവത്ത് താനല്ലെന്നും മറ്റൊരാളാണെന്നും പറയുന്ന മന്ത്രി പോലീസ് പരിശോധനയ്ക്ക് ശബ്ദ സാമ്ബിള്‍ നല്‍കാത്തത് എന്തുകൊണ്ടാണെന്ന് കോണ്‍ഗ്രസ് നേതാവ് അജയ് മാക്കന്‍ ചോദിച്ചു. കേന്ദ്രമന്ത്രിയായി തുടരാനുള്ള ധാര്‍മിക അവകാശം ഷെഖാവത്തിനു നഷ്ടപ്പെട്ടെന്നും അന്വേഷണത്തെ സ്വാധീനിക്കാതിരിക്കാന്‍ മന്ത്രിസ്ഥാനം രാജിവയ്ക്കണമെന്നും അജയ് മാക്കന്‍ ആവശ്യപ്പെട്ടു.
രാജസ്ഥാനില്‍നിന്നുള്ള വിമത എംഎല്‍‌എമാര്‍ക്ക് ഹരിയാന, ഡല്‍ഹി പോലീസ് സംരക്ഷണം നല്‍കുകയാണെന്നും അദ്ദേഹം ആരോപിച്ചു. സര്‍ക്കാരിനെ അട്ടിമറിക്കാനുള്ള ഗൂഡാലോചന സംബന്ധിച്ച അന്വേഷണം അവസാനിപ്പിക്കണമെന്ന് ആഗ്രഹിക്കുന്നതിനാലാണ് കേന്ദ്രം സിബിഐയുടെ പേരില്‍ ഭീഷണിപ്പെടുത്തുന്നതെന്നും അദ്ദേഹം കുറ്റപ്പെടുത്തി.
