ന്യൂഡല്ഹി: സിബിഎസ്ഇ പത്താം ക്ലാസ് പരീക്ഷാ ഫലം പ്രഖ്യാപിച്ചു. 91.46 ശതമാനം വിജയം. കഴിഞ്ഞ വര്ഷത്തേക്കാള് 0.36 ശതമാനത്തിന്റെ വര്ധനയുണ്ട്. കഴിഞ്ഞവര്ഷം 91.10% ആയിരുന്നു.18,73,015 വിദ്യാര്ഥികള് പരീക്ഷ എഴുതി. 17,13,121 പേര് ഉപരിപഠനത്തിന് അര്ഹരായി.
മേഖലകളില് ഉയര്ന്ന വിജയശതമാനം തിരുവനന്തപുരം മേഖലയിലാണ്. 99.28 ശതമാനമാണ് വിജയം. 98.28 ശതമാനവുമായി ചെന്നൈയും 98.23 ശതമാനം വിജയവുമായി ബംഗളൂരു മേഖലയും രണ്ടും മൂന്നും സ്ഥാനങ്ങളിലെത്തി. 79.12 ശതമാനം വിജയവുമായി ഗോഹട്ടിയാണ് ഏറ്റവും പിന്നില്. വിജയശതമാനത്തില് പെണ്കുട്ടികള് ഇക്കുറിയും മുന്നിലെത്തി. പരീക്ഷയെഴുതിയ 93.31 ശതമാനം പെണ്കുട്ടികളും വിജയിച്ചു. ആണ്കുട്ടികളുടെ വിജയശതമാനം 90.14.
4,1804 പേര് 95ശതമാനത്തിനു മുകളില് മാര്ക്ക് നേടി.1,84,358 പേര്ക്ക് 90 ശതമാനത്തിനു മുകളില് മാര്ക്കുണ്ട്. 99.23 ശതമാനം വിജയത്തോടെ കേന്ദ്രീയ വിദ്യാലയമാണ് സ്കൂളുകളില് മുന്നില് . ജവഹര് നവോദയകളില് 98.66 ശതമാനം വിജയം. സര്ക്കാര്, എയ്ഡഡ് സ്കൂളുകളില് വിജയശതമാനം കുറഞ്ഞു. സ്വകാര്യ സ്കൂളുകള് 92.81ശതമാനം വിജയം നേടി .
കൊവിഡിന്റെ പശ്ചാത്തലത്തില് പരീക്ഷ നടത്താത്ത വിഷയങ്ങള്ക്ക് ഇന്റേണല് അസസ്മെന്റിന്റെയും നേരത്തെ നടത്തിയ പരീക്ഷകളുടെയും അടിസ്ഥാനത്തിലാണ് ഫലം തയ്യാറാക്കിയിട്ടുള്ളത്. ഏറ്റവും കൂടുതല് മാര്ക്ക് കിട്ടിയ മൂന്ന് വിഷയങ്ങളുടെ ശരാശരി മാര്ക്ക് ആയിരിക്കും റദ്ദാക്കിയ പരീക്ഷകളുടെ മൂല്യനിര്ണ്ണയത്തിനായി എടുക്കുക. വിജയികളെ അഭിനന്ദിക്കുന്നുവെന്ന് മാനവവിഭവശേഷി മന്ത്രി പറഞ്ഞു.