- ഡോ. ജോര്‍ജ് എം. കാക്കനാട്ട്
ഹ്യൂസ്റ്റണ്‍: ന്യൂയോര്‍ക്കിലെയും ന്യൂജേഴ്‌സിയിലെയും ജനങ്ങളെ തവിടുപൊടിയാക്കിയ കോവിഡ് ഇപ്പോള്‍ വടക്കുകിഴക്കന്‍ കേന്ദ്രങ്ങളിലാണ് വീശിയടിക്കുന്നത്. ഇവിടെ കേന്ദ്രീകരിച്ചിരിക്കുന്ന പകര്‍ച്ചവ്യാധി ഇപ്പോള്‍ അമേരിക്കയിലെ 39 സംസ്ഥാനങ്ങളിലായി വളരുകയാണ്. തെക്ക്, പടിഞ്ഞാറ് ഭാഗങ്ങള്‍ മുതല്‍ മിഡ്‌വെസ്റ്റ് വരെ ഇതിന്റെ വ്യാപ്തി വികസിച്ചു കഴിഞ്ഞു. ഒരു പുതിയ ആഴ്ച ആരംഭിക്കുമ്പോള്‍, രാജ്യത്തിന്റെ കാഴ്ചപ്പാടും അസാധാരണമായ വിധത്തില്‍ മാറുന്നു. കൊറോണയെ നിസാരമായി കണ്ടവര്‍ ഇപ്പോള്‍ പ്രതിരോധത്തിലേക്ക് ചുവടുവെക്കുകയാണ്. ചുരുക്കം ചില സംസ്ഥാനങ്ങളിലൊഴികെ മറ്റെല്ലായിടത്തും കേസ് എണ്ണം വര്‍ദ്ധിച്ചുകൊണ്ടിരിക്കുകയാണ്. കിടക്കകള്‍ തീര്‍ന്നുപോവുന്ന ആശുപത്രികള്‍, മരുന്നു ക്ഷാമം, ടെസ്റ്റിങ് സെന്ററുകളുടെ അഭാവം എന്നിവയൊക്കെയും പല കൗണ്ടികളെയും വേട്ടയാടുന്നതായി റിപ്പോര്‍ട്ടുകളുണ്ട്. രാജ്യത്തെ ഏറ്റവും വലിയ നഗര കേന്ദ്രങ്ങളായ അറ്റ്‌ലാന്റ, ഡാളസ്, ലോസ് ഏഞ്ചല്‍സ്, മിയാമി, ഫീനിക്‌സ്, ജാക്‌സണ്‍വില്ലെ, ഫ്‌ലോറിഡ എന്നിവ നിയന്ത്രണാതീതമായ വളര്‍ച്ചയാണ് കോവിഡിന്റെ കാര്യത്തില്‍ കൈവരിച്ചിരിക്കുന്നത്. രാജ്യത്ത് ഇപ്പോള്‍ 3,438,627 പേരാണ് രോഗബാധിതര്‍, മരണസംഖ്യ 137,873 കവിഞ്ഞു.
തെക്കുകിഴക്കന്‍, പടിഞ്ഞാറ് ഭാഗങ്ങളില്‍ പുതിയ കേസുകള്‍ വര്‍ദ്ധിച്ചുകൊണ്ടിരിക്കുമ്പോള്‍, രാജ്യത്ത് എല്ലായിടത്തും ഏതാണ്ട് സമാനമായ രീതിയില്‍ പ്രശ്‌നകരമായ അടയാളങ്ങള്‍ ഉയര്‍ന്നുവരുന്നു. ഒക്ലഹോമ സിറ്റി ഉള്‍പ്പെടുന്ന കൗണ്ടിയില്‍ രണ്ടാഴ്ച മുമ്പുള്ളതിനേക്കാള്‍ ഇരട്ടി കേസുകളാണ് ഇപ്പോള്‍ ഉള്ളത്. ആഴ്ചകളുടെ പുരോഗതിക്ക് ശേഷം മിനിയാപൊളിസിന് ചുറ്റും കേസ് എണ്ണം വീണ്ടും വര്‍ദ്ധിച്ചു തുടങ്ങി. വിസ്‌കോണ്‍സിനും ഒഹായോയും പകര്‍ച്ചവ്യാധിയുടെ മുമ്പത്തെ ഘട്ടത്തേക്കാള്‍ കൂടുതല്‍ പുതിയ അണുബാധകള്‍ റിപ്പോര്‍ട്ട് ചെയ്യുന്നു.
ഫ്‌ളോറിഡയിലെ മിയാമി-ഡേഡ് കൗണ്ടിയില്‍, ആറ് ആശുപത്രികള്‍ വൈറസ് കേസുകളെ കൊണ്ടു നിറഞ്ഞിരിക്കുയാണെന്നു ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നു. കേസുകളുടെ വര്‍ദ്ധനവ് വര്‍ദ്ധിച്ചതിനെ തുടര്‍ന്ന് അവിടെ മേയര്‍ കര്‍ഫ്യൂ ഏര്‍പ്പെടുത്തി. ഇവിടെ ഇന്‍ഡോര്‍ ഡൈനിംഗിനായി റെസ്‌റ്റോറന്റുകള്‍ അടക്കാന്‍ ഉത്തരവിട്ടു കഴിഞ്ഞു. രാജ്യത്തിന്റെ കൊറോണ വൈറസ് പ്രതിസന്ധിയെ അതിജീവിക്കാനായി ട്രംപ് അഡ്മിനിസ്‌ട്രേഷന്‍ ആരോഗ്യ ഉദ്യോഗസ്ഥര്‍ മുഖംമൂടികള്‍ ധരിക്കേണ്ടതിന്റെ പ്രാധാന്യം ഊന്നിപ്പറയുകയാണ്. എന്നാല്‍ ഇതു നേരത്തെ ചെയ്തിരുന്നുവെങ്കില്‍ ആയിരക്കണക്കിനു ജീവനുകള്‍ രക്ഷിക്കാമായിരുന്നുവെന്നു എതിരാളികള്‍ പറയുന്നു. പ്രസിഡന്റ് ഡോണള്‍ഡ് ട്രംപ് ഇപ്പോള്‍ ഫേസ്മാസ്‌ക്ക് ധരിക്കാന്‍ തുടങ്ങിയിട്ടുണ്ട്. ഇതു വലിയൊരു സന്ദേശമാണ് രാജ്യത്തിനു നല്‍കിയത്. ഇതോടെ, മുഖം മൂടല്‍ ആവശ്യപ്പെടുന്നതില്‍ മടിയുള്ള നിരവധി ഗവര്‍ണര്‍മാര്‍, മേയര്‍മാര്‍, കൗണ്ടി ഉദ്യോഗസ്ഥര്‍ എന്നിവര്‍ ഇപ്പോള്‍ ഉത്തരവുകള്‍ മാറ്റി പുറപ്പെടുവിച്ചു.
25 സംസ്ഥാനങ്ങളിലും ഡിസ്ട്രിക്റ്റ് ഓഫ് കൊളംബിയയിലും ഇപ്പോള്‍ മുഖം മൂടുന്ന ഓര്‍ഡറുകള്‍ പ്രാബല്യത്തില്‍ ഉണ്ട്. പന്ത്രണ്ട് സംസ്ഥാനങ്ങളില്‍ ഈ ഓര്‍ഡറുകള്‍ ജൂലൈയില്‍ പ്രാബല്യത്തില്‍ വന്നു. പൊതുവേ, പൊതു സ്ഥലങ്ങളില്‍ ആയിരിക്കുമ്പോഴും സാമൂഹിക അകലം പാലിക്കാന്‍ കഴിയാതെ വരുമ്പോഴും മിക്ക ആളുകളും മുഖം മറയ്ക്കണമെന്ന് ഓര്‍ഡറുകള്‍ ആവശ്യപ്പെടുന്നു. എന്നാല്‍ മാന്‍ഡേറ്റിന്റെ വ്യാപ്തി ഓരോ സംസ്ഥാനത്തിനും വ്യത്യാസപ്പെട്ടിരിക്കുന്നു.
പാന്‍ഡെമിക് കാരണം മാര്‍ച്ചില്‍ അടച്ചതിനുശേഷം, വാള്‍ട്ട് ഡിസ്‌നി വേള്‍ഡിന്റെ രണ്ട് പ്രധാന പാര്‍ക്കുകളായ മാജിക് കിംഗ്ഡം, അനിമല്‍ കിംഗ്ഡം എന്നിവ വാരാന്ത്യത്തില്‍ സന്ദര്‍ശകരെ സ്വാഗതം ചെയ്തത് ഇപ്പോള്‍ വലിയ വാര്‍ത്തയായിട്ടുണ്ട്. എപ്‌കോട്ടും ഡിസ്‌നിയുടെ ഹോളിവുഡ് സ്റ്റുഡിയോയും ബുധനാഴ്ച വീണ്ടും തുറക്കാന്‍ ഒരുങ്ങുകയാണ്. ഫ്‌ലോറിഡയിലെ വൈറസ് ആക്രമണം തുടരുന്നതിനിടെയാണ് വീണ്ടും ഇവിടം തുറക്കുന്നത്. ഞായറാഴ്ച 15,000 ത്തിലധികം പുതിയ അണുബാധകള്‍ റിപ്പോര്‍ട്ട് ചെയ്തിട്ടുണ്ട്. രോഗാണുക്കളെ അകറ്റാന്‍, ഡിസ്‌നി ഇപ്പോള്‍ സവാരിയില്‍ സീറ്റുകള്‍ ശൂന്യമായി ഇടുന്നു, അത് ജീവനക്കാര്‍ നിരന്തരം അണുവിമുക്തമാക്കുന്നു. ഫെയ്‌സ് മാസ്‌കുകള്‍ നിര്‍ബന്ധമാണ്.
