ജീലോംഗ്: ആദ്യ മത്സരത്തിൽ നമീബിയയോട് അപ്രതീക്ഷിത തോൽവി ഏറ്റുവാങ്ങിയ ശ്രീലങ്ക രണ്ടാം മത്സരത്തിൽ യുഎഇയെ തകർത്ത് വിജയവഴിയിൽ തിരിച്ചെത്തി. 79 റണ്സിന്റെ മിന്നും ജയമാണ് ലങ്ക സ്വന്തമാക്കിയത്. ആദ്യം ബാറ്റ് ചെയ്ത ലങ്ക എട്ട് വിക്കറ്റിന് 152 റണ്സ് നേടി. 17.1 ഓവറിൽ 73 റണ്സിന് യുഎഇയുടെ മറുപടി അവസാനിച്ചു.
74 റണ്സ് നേടിയ ഓപ്പണർ നിസങ്കയാണ് ലങ്കയ്ക്ക് മികച്ച സ്കോർ സമ്മാനിച്ചത്. ധനഞ്ജയ ഡിസിൽവ 33 റണ്സ് നേടി. യുഎഇക്കായി കാർത്ത് മെയ്യപ്പൻ ഹാട്രിക് നേടി. 15-ാം ഓവറിലെ അവസാന മൂന്ന് പന്തിലാണ് മെയ്യപ്പൻ ഹാട്രിക് തികച്ചത്.
മറുപടി ബാറ്റിംഗിൽ യുഎഇ ഒരുഘട്ടത്തിലും ജയപ്രതീക്ഷ ഉയർത്തിയില്ല. 19 റണ്സ് നേടിയ അയാൻ ഖാനാണ് ടോപ്പ് സ്കോറർ. ലങ്കയ്ക്കായി ഹസരങ്കയും ചമീരയും മൂന്ന് വീതം വിക്കറ്റുകൾ നേടി.
