- ഡോ. ജോര്ജ് എം. കാക്കനാട്
ഹൂസ്റ്റണ്: വൈസ് പ്രസിഡന്റും ഡെമോക്രാറ്റിക് പാര്ട്ടിയുടെ പ്രസിഡന്റ് സ്ഥാനാര്ഥിയുമായ കമല ഹാരിസുമായി മുന് പ്രസിഡന്റ് ഡൊണാള്ഡ് ട്രംപിന്റെ ടെലിവഷന് സംവാദം നടക്കുമെന്ന് ഏറെക്കുറേ ഉറപ്പായിരിക്കുകയാണ്. ജോ ബൈഡനുമായി നടത്തിയ സംവാദത്തിന്റെ അതേ നിയമങ്ങള് പാലിച്ചു കൊണ്ട് രണ്ട് പ്രസിഡന്റ് സ്ഥാനാര്ത്ഥികളും സെപ്റ്റംബര് 10 ന് ഏറ്റുമുട്ടും എന്നാണ് ഒടുവില് അറിയാന് സാധിച്ചിരിക്കുന്നത്.
കമലാ ഹാരിസും ഡൊണാള്ഡ് ട്രംപും അടുത്ത മാസം അവരുടെ ആദ്യ പ്രസിഡന്ഷ്യല് ഡിബേറ്റില് ഏറ്റുമുട്ടാന് ഒരുങ്ങുമ്പോഴും ഇരുവരുടെയും ക്യാമ്പെയിനുകള് ഇപ്പോഴും ലോജിസ്റ്റിക്സിനെച്ചൊല്ലി പോരാടുകയാണ് എന്നതാണ് വാസ്തവം. അതായത് മൈക്രോഫോണുകളുമായി ബന്ധപ്പെട്ടുള്ള തര്ക്കം ഇപ്പോഴും പൂര്ണമായി പരിഹരിക്കപ്പെട്ടിട്ടില്ല എന്ന് സാരം. മറ്റൊരാള്ക്ക് സംസാരിക്കാനുള്ള അവസരം ലഭിക്കുമ്പോള് മൈക്രോഫോണുകള് നിശബ്ദമാക്കണം എന്നതാണ് ട്രംപിന്റെ ടീം താല്പ്പര്യപ്പെടുന്നത്. ഡെമോക്രാറ്റിക് സ്ഥാനാര്ത്ഥിയായിരുന്നപ്പോള് ജോ ബൈഡന് ആദ്യം ആവശ്യപ്പെട്ട നിയമമാണിത്.ട്രംപിന്റെ ടീം ഇത് അംഗീകരിക്കുകയായിരുന്നു.
ട്രംപിന്റെ ഭാഗത്തുനിന്നുള്ള തടസ്സങ്ങള് പരിമിതപ്പെടുത്താനുള്ള ബൈഡന്റെ സംഘത്തിന്റെ ശ്രമത്തിന്റെ ഭാഗമായിരുന്നു ഈ നീക്കം. അതിനു കാരണം 2020ലെ ഈ ജോഡിയുടെ കുഴപ്പത്തിലായ ആദ്യത്തെ സംവാദമായിരുന്നു. അന്ന് ട്രംപിന്റെ നിരന്തരമായ ഇടപെടലുകളില് മടുത്ത് ബൈഡന് തന്റെ എതിരാളിയോട് പൊട്ടിത്തെറിക്കുകയായിരുന്നു. ‘വില് യു ഷട്ട് അപ്പ, മാന്? എന്നാണ് ബൈഡന് ചോദിച്ചത്.
സെപ്തംബര് 10 ന് നടക്കുന്ന ഹാരിസ് സംവാദത്തില് മൈക്ക് മ്യൂട്ട് ആക്കുന്നതിനുള്ള ട്രംപ് പ്രചാരണത്തിന്റെ വ്യഗ്രത ജൂണില് ബൈഡനെതിരെ പലരും പ്രതീക്ഷിച്ചതിലും കൂടുതല് പിന്തുണ അദ്ദേഹത്തിന്റെ പ്രകടനത്തിന് ലഭിച്ചതിനാലാണെന്ന് ചില വിശകലന വിദഗ്ധര് പറയുന്നു. പ്രായോഗികമായി, ഇത് തടസ്സപ്പെടുത്താനുള്ള സാഹചര്യങ്ങള് ഇല്ലാതാക്കുകയാണ് ചെയ്തതെങ്കിലും കാര്യങ്ങള് ട്രംപിന് അനുകൂലമായി വന്നു ഭവിക്കുകയായിരുന്നു.
എന്നിരുന്നാലും, മുന് പ്രസിഡന്റ്, ഈ നിയമത്തില് കാര്യമായ താല്പ്പര്യം ഉള്ള വ്യക്തിയല്ലെന്ന് അദ്ദേഹത്തിന്റെ പ്രതികരണങ്ങള് തെളിയിക്കുന്നു. ഈ മ്യൂട്ട് നിയമം നിലനില്ക്കണമെന്ന് ആവശ്യപ്പെടുന്ന സ്വന്തം ടീമിന്റെ പ്രസ്താവനകളെ ഒരു പരിധിവരെ ദുര്ബലപ്പെടുത്തുകയും ചെയ്തു. ‘അത് എനിക്ക് പ്രശ്നമല്ല. മൈക്രോഫോണുകള് ഓണാക്കിയിരിക്കാന് ഞാന് ആഗ്രഹിക്കുന്നു,’ എന്നായിരുന്നു ട്രംപിന്റെ പരാമര്ശം. എന്നാല് സംവാദം കഴിഞ്ഞ തവണത്തേത് പോലെ തന്നെയായിരിക്കുമെന്നായിരുന്നു കരാര്. അങ്ങനെയെങ്കില് മ്യൂട്ട് ചെയ്യുക തന്നെ വേണം എന്നും അദ്ദേഹം പറഞ്ഞു വയ്ക്കുന്നു.
സെപ്തംബര് 10ന് നടക്കുന്ന സംവാദത്തിനായി എബിസിയുമായി താന് ഒരു കരാറില് എത്തിയതായി ട്രംപ് സോഷ്യല് മീഡിയയില് പോസ്റ്റ് ചെയ്തു. പോസ്റ്റില് മൈക്കുകളെക്കുറിച്ച് അദ്ദേഹം പരാമര്ശിച്ചില്ല എന്നതാണ് ശ്രദ്ധ്യേം. എന്നാല് ‘നിയമങ്ങള് അവസാനത്തെ സിഎന്എന് ഡിബേറ്റ് പോലെയായിരിക്കും’ എന്നു പറയുന്നുണ്ട്. അങ്ങനെയെങ്കില് മൈക്കുകള് മ്യൂട്ടായി തന്നെ നില്ക്കാനാണ് സാധ്യത.
പോസ്റ്റെല് എബിസി നെറ്റ്വര്ക്ക് തന്നോട് ‘അന്യായമായാണ്’ പെരുമാറുന്നതെന്ന് ആരോപിച്ച അദ്ദേഹം പക്ഷേ എന്ന് അദ്ദേഹം ആരോപിച്ചു, എന്നാല് ‘ന്യായവും തുല്യവും’ ആയിരിക്കുമെന്ന് തന്റെ ടീമിന് ഉറപ്പുനല്കിയിട്ടുണ്ടെന്നും വ്യക്തമാക്കി. എബിസിയുമായി താന് സമ്മതിച്ചതായി ട്രംപ് പറഞ്ഞ നിബന്ധനകളില് ഹാരിസ് പ്രചാരണം ഒപ്പുവച്ചോ എന്ന് വ്യക്തമല്ല.
ഹാരിസ് കാമ്പെയ്ന് രണ്ട് സ്ഥാനാര്ത്ഥികളുടെയും മൈക്രോഫോണുകള് മുഴുവന് സംവാദത്തിനും അണ്മ്യൂട്ട് ചെയ്യപ്പെടാന് ആഗ്രഹിക്കുന്നു. ഈ മാറ്റത്തില് നിന്ന് അവര്ക്ക് നേട്ടമുണ്ടാകുമെന്നാണ് അവരുടെ പ്രതീക്ഷ. അതിനു കാരണവും ട്രംപിന്റെ സ്വഭാവം തന്നെയാണ്. ഹാരിസ് സംസാരിക്കുന്ന മുഴുവന് സമയത്തും ട്രംപിന്റെ ഫില്റ്റര് ചെയ്യാത്ത പരാമര്ശങ്ങള് ജനങ്ങളില് അദ്ദേഹത്തിന് അവമതിപ്പ് ഉണ്ടാക്കുമെന്നാണ് ഹാരിസ് ക്യാമ്പെയിന് കണക്കു കൂട്ടുന്നത്.
‘ ട്രംപിന്റെ ഹാന്ഡ്ലര്മാര് മൈക്ക് നിശബ്ദമാക്കാന് ആഗ്രഹിക്കുന്നത് അവരുടെ സ്ഥാനാര്ത്ഥിക്ക് 90 മിനിറ്റ് പോലും പ്രസിഡന്റ് തിരഞ്ഞെടുപ്പിന്റെ അന്തസ്സ് കാത്തു സൂക്ഷിക്കാന് കഴിയില്ലെന്ന വിശ്വാസം ഉള്ളതു കൊമ്ടാണെന്ന് ഹാരിസിന്റെ വക്താവ് പ്രസ്താവനയില് പറഞ്ഞു. ‘ട്രംപ് അനിയന്ത്രിതമായതിനാലാണ് മൈക്കുകള് അണ്മ്യൂട്ട് ചെയ്യാന് അവര് പറയുന്നത്.’ – ഡെമോക്രാറ്റിക് സ്ട്രാറ്റജിസ്റ്റും പൊളിറ്റിക്കല് അനലിസ്റ്റുമായ അമേഷിയ ക്രോസ് ബിബിസിയോട് പറഞ്ഞു.
ട്രംപിന്റെ റാലികളും ട്രൂത്ത് സോഷ്യല് പോസ്റ്റുകളും, ഹാരിസിനെതിരെ അഴിച്ചുവിട്ട് വ്യക്തിപരമായ ആക്രമണങ്ങള് എബിസി ന്യൂസിലെ ചര്ച്ചയിലും ആവര്ത്തിക്കും എന്നാണ് അവര് പ്രതീക്ഷിക്കുന്നത്. ആ ആക്രമണങ്ങള് സ്ത്രീ വോട്ടര്മാര്, നിറമുള്ള വോട്ടര്മാര്, യുവ വോട്ടര്മാര് എന്നിവരില് ട്രംപിന് അവമതിപ്പ് ഉണ്ടാക്കുമെന്നും ക്രോസ് ചൂണ്ടിക്കാട്ടുന്നു. ട്രംപിന്റെ അവഹേളനങ്ങള് നിര്ണായക തീരുമാനമില്ലാത്ത വോട്ടര്മാരെ അദ്ദേഹത്തിന് വോട്ട് ചെയ്യുന്നതില് നിന്ന് പിന്തിരിപ്പിച്ചേക്കാമെന്നും തന്ത്രജ്ഞര് അഭിപ്രായപ്പെടുന്നു.
‘സ്വിംഗ് വോട്ടര്മാരെ തങ്ങളിലേക്ക് അടുപ്പിക്കാനുള്ള മാര്ഗം വ്യക്തിപരമായ ആക്രമണങ്ങളല്ല. സ്വഭാവത്താല്, അവര് കക്ഷിരാഷ്ട്രീയത്തെ ഇഷ്ടപ്പെടുന്നില്ല.” ദീര്ഘകാല റിപ്പബ്ലിക്കന് തന്ത്രജ്ഞനായ കെവിന് മാഡന് ന്യൂയോര്ക്ക് ടൈംസിനോട് പറഞ്ഞു. ഹാരിസ് സംസാരിക്കുമ്പോള് ട്രംപിന്റെ മൈക്രോഫോണ് അണ്മ്യൂട്ടുചെയ്താല്, ഹാരിസിനെതിരേ കേള്ക്കാവുന്ന അപമാനമോ തടസ്സമോ ഉണ്ടാകാനുള്ള സാധ്യത വര്ദ്ധിക്കും. ഇഷ്ടാനുസരണം തടസ്സപ്പെടുത്താന് കഴിയുന്ന ട്രംപിന് ഈ സ്വിംഗ് വോട്ടര്മാരുടെ വോട്ട് നഷ്ടമാക്കാന് ഉപകരിക്കും എന്നാണ് ഹാരിസ് ടീം കരുതുന്നത്.
സംവാദം നടക്കുന്ന പെന്സില്വാനിയ പോലെയുള്ള നിര്ണായക സംസ്ഥാനങ്ങളില് ഇതുവരെ നിലപാട് സ്വീകരിക്കാത്ത ചെറിയ ശതമാനം വോട്ടര്മാര് നിര്ണായകമാകും എ്ന്നാണ് കരുതുന്നത്. ‘അദ്ദേഹം പൊട്ടിത്തെറിക്കാനുള്ള സാധ്യത വളരെ കൂടുതലാണ്… ഹാരിസ് കാമ്പെയ്ന് കാഴ്ചക്കാര് അത് കേള്ക്കാന് ആഗ്രഹിക്കുന്നുവെന്ന് ഞാന് കരുതുന്നു.’ സംവാദ ചര്ച്ചകളെക്കുറിച്ച് പരിചയമുള്ള ഒരാള് പൊളിറ്റിക്കോയോട് പറഞ്ഞു.
റിപ്പോര്ട്ടുകള് അനുസരിച്ച്, തങ്ങളുടെ സ്ഥാനാര്ത്ഥി വ്യക്തിപരമായ ആക്രമണങ്ങളിലല്ല പ്രധാന വിഷയങ്ങളില് ശ്രദ്ധ കേന്ദ്രീകരിക്കും എന്നാണ് ട്രംപ് പ്രചാരണ സംഘം പറയുന്നത്. സമ്പദ്വ്യവസ്ഥ, അതിര്ത്തി, കുറ്റകൃത്യങ്ങള് എന്നിവയെക്കുറിച്ച് സംസാരിക്കുന്നതില് ഉറച്ചുനില്ക്കുകയാണെങ്കില് ട്രംപ് നവംബറില് വിജയിക്കുമെന്ന് അദ്ദേഹത്തോട് അടുത്ത വൃത്തങ്ങള് ബിബിസിയോട് പറഞ്ഞു. മൈക്രോഫോണുകള് അണ്മ്യൂട്ട് ചെയ്യാനുള്ള ഹാരിസ് കാമ്പെയ്നിന്റെ ശ്രമം, ചര്ച്ചയെ പ്രശ്നങ്ങളില് നിന്ന് മാറ്റി വൈറല് നിമിഷങ്ങളുടെ രംഗത്തേക്ക് മാറ്റാനുള്ള ശ്രമമാണെന്ന് താന് വിശ്വസിക്കുന്നതായി റിപ്പബ്ലിക്കന് ക്യാമ്പെയിന് സംഘത്തിലുള്ള ഫോര്ഡ് ഓ കോണല് ചൂണ്ടിക്കാട്ടുന്നു.
