പാറ്റ്ന: ബിഹാറിൽ പോലീസ് സംഘം സഞ്ചരിച്ച ബോട്ട് മുങ്ങി ഒരു ഉദ്യോഗസ്ഥൻ മരിച്ചു. ഗോപാൽഗഞ്ജ് ജില്ലയിലെ ഗാണ്ഡക് നദിയിലാണ് അപകടം സംഭവിച്ചത്.
മദ്യനിരോധനം നിലവിലുള്ള സംസ്ഥാനത്ത് അനധികൃത മദ്യവിൽപന നടത്തുന്ന സംഘത്തെ തെരഞ്ഞ് പോയ പോലീസുകാരുടെ ബോട്ടാണ് അപകടത്തിൽപ്പെട്ടത്. രാജ്വാഹി ഗ്രാമത്തിലേക്ക് പോയ അഞ്ച് പേരടങ്ങുന്ന സംഘത്തിലെ രാജ് കുമാർ എന്ന കോൺസ്റ്റബിളാണ് മരിച്ചത്.
ഒഴുക്കിൽപ്പെട്ട രണ്ട് പോലീസുകാരെ പ്രദേശവാസികൾ രക്ഷപ്പെടുത്തി. മറ്റ് രണ്ട് ഉദ്യോഗസ്ഥർ നീന്തി രക്ഷപ്പെട്ടു.
സംഭവത്തിൽ വിശദമായ അന്വേഷണം ആരംഭിച്ചതായി അധികൃതർ അറിയിച്ചു.
