ഗള്ഫ് രാജ്യങ്ങളില് നിന്നും കേരളത്തിലേക്കുള്ള സര്വീസിന് അമിതമായ ടിക്കറ്റ് നിരക്ക് ഈടാക്കുന്ന പ്രവണ തടയാന് നിര്ണായക നീക്കവുമായി സംസ്ഥാന സര്ക്കാര്. ഉത്സവ, അവധിക്കാല സീസണുകളില് ഗള്ഫ് രാജ്യങ്ങളില് നിന്നും കേരളത്തിലേക്ക് വിമാന കമ്പനികള് കഴുത്തറക്കുന്ന നിരക്കാണ് വാങ്ങിക്കുന്നത്. ഇതിനെ മറികടക്കാനാണ് മുഖ്യമന്ത്രി പിണറായി വിജയന്റെ അധ്യക്ഷതയില് ഉന്നതതല അവലോകനയോഗം ചേര്ന്നത്.
ഇക്കാര്യത്തില് സംസ്ഥാനത്തിന് ഏതൊക്കെ തരത്തില് ഇടപെടാനാകും എന്നതു സംബന്ധിച്ച് യോഗത്തില് വിലയിരുത്തി. ഗള്ഫ് മേഖലയില് നിന്നും നാട്ടിലേക്കു വരുന്ന സാധാരണക്കാരയ പ്രവാസികള്ക്ക് സഹായകരമാകുന്ന തരത്തില് വിമാനടിക്കറ്റ് ലഭ്യമാക്കാന് നടപടി സ്വീകരിക്കുമെന്ന് നേരത്തേ സര്ക്കാര് തീരുമാനിച്ചിരുന്നു. ഇതിനായി ബജറ്റിലും തുക വകയിരുത്തിയിരുന്നു. ഇതിന്റെ തുടര്നടപടി എന്ന നിലയിലാണ് അവലോകനയോഗം ചേര്ന്നത്.
