യൂറോപ്യൻ രാജ്യങ്ങൾ ദുർബലവും “ശോഷിച്ചുകൊണ്ടിരിക്കുന്നവയുമാണ്” എന്ന് അമേരിക്കൻ പ്രസിഡൻ്റ് ഡോണൾഡ് ട്രംപ് അഭിമുഖത്തിൽ വിമർശിച്ചു. അമേരിക്ക ഇനി യൂറോപ്പിൻ്റെ സുരക്ഷ പൂർണ്ണമായി ഉറപ്പുനൽകേണ്ടതില്ലെന്ന് സൂചിപ്പിക്കുന്ന ഒരു സുരക്ഷാ തന്ത്രരേഖ ട്രംപ് ഭരണകൂടം ദിവസങ്ങൾക്ക് മുൻപ് പുറത്തിറക്കിയതിന് പിന്നാലെയാണ് ഈ രൂക്ഷമായ പ്രതികരണം.
യൂറോപ്പിൻ്റെ നിലവിലെ നേതാക്കൾ ദുർബലരും ‘രാഷ്ട്രീയപരമായ ശരി’ (Politically Correct) എന്നതിലാണ് കൂടുതൽ ശ്രദ്ധ കേന്ദ്രീകരിക്കുന്നതെന്നും ട്രംപ് അഭിപ്രായപ്പെട്ടു. അനനിയന്ത്രിതമായ കുടിയേറ്റമാണ് യൂറോപ്യൻ രാജ്യങ്ങളെ തകർക്കുന്നതെന്നും നിലവിലെ കുടിയേറ്റ നയം ഒരു ദുരന്തമാണെന്നും അദ്ദേഹം ആരോപിച്ചു. യൂറോപ്പിലെ മിക്ക രാജ്യങ്ങളും ശോഷിച്ചുകൊണ്ടിരിക്കുകയാണെന്നും, കുടിയേറ്റം നിയന്ത്രിക്കുന്നതിൽ ഹംഗറിയും പോളണ്ടും മികച്ച നിലപാട് സ്വീകരിച്ചെന്നും ട്രംപ് കൂട്ടിച്ചേർത്തു
റഷ്യ-യുക്രെയ്ൻ യുദ്ധവുമായി ബന്ധപ്പെട്ട വെടിനിർത്തൽ ചർച്ചകളിൽ പ്രസിഡൻ്റ് വൊളോഡിമിർ സെലെൻസ്കി വിട്ടുവീഴ്ചക്ക് തയ്യാറാകേണ്ട സമയമായെന്നും ട്രംപ് സൂചന നൽകി. റഷ്യക്കാണ് നിലവിൽ യുദ്ധത്തിൽ മേൽക്കൈ ഉള്ളതെന്നും വലുപ്പം കൊണ്ട് റഷ്യ വിജയിക്കുമെന്നും ട്രംപ് വാദിച്ചു. യുദ്ധം അവസാനിപ്പിക്കാനായി താൻ അവതരിപ്പിച്ച സമാധാന നിർദ്ദേശങ്ങൾ സെലെൻസ്കി വായിച്ചില്ല എന്നും അത് വായിക്കുന്നത് നന്നായിരിക്കുമെന്നും ട്രംപ് വിമർശിച്ചു.
അമേരിക്കയുടെ പുതിയ ദേശീയ സുരക്ഷാ തന്ത്രരേഖ യൂറോപ്പിൻ്റെ സുരക്ഷാ കാര്യങ്ങളിൽ അമേരിക്കയുടെ പങ്കാളിത്തം കുറയ്ക്കാനുള്ള വ്യക്തമായ സൂചന നൽകിയിരുന്നു. യൂറോപ്പ് അതിന്റെ സ്വന്തം പ്രതിരോധത്തിന്റെ പ്രധാന ഉത്തരവാദിത്തം ഏറ്റെടുക്കണമെന്നും, അതിനായി യൂറോപ്പിലെ രാഷ്ട്രീയ സാഹചര്യങ്ങൾ തിരുത്താൻ അമേരിക്ക പിന്തുണ നൽകുമെന്നും തന്ത്രരേഖയിൽ പറഞ്ഞിരുന്നു. ഈ നിലപാടുകൾ യൂറോപ്യൻ നേതാക്കൾക്കിടയിൽ കടുത്ത ആശങ്ക ഉയർത്തുകയും യൂറോപ്പിന്റെ സുരക്ഷയ്ക്ക് അമേരിക്കയെ അമിതമായി ആശ്രയിക്കുന്നത് ശരിയല്ല എന്ന ചിന്തയ്ക്ക് ശക്തി നൽകുകയും ചെയ്തിട്ടുണ്ട്.
