ഡോ. ജോർജ് എം. കാക്കനാട്
ഹൂസ്റ്റൺ: ഇറാനിലെ നിലവിലെ ഭരണകൂടത്തോട് തീവ്രമായ ശത്രുത പുലർത്തുന്ന സമീപനമാണ് യുഎസ് പ്രസിഡന്റ് ഡൊണാൾഡ് ട്രംപ് സ്വീകരിക്കുന്നത്. തന്റെ മുൻ ഭരണകാലത്തെ ‘മാക്സിമം പ്രഷർ’ എന്ന നയം അദ്ദേഹം വീണ്ടും സജീവമാക്കിയിരിക്കുകയാണ്.
ഇറാനിലെ ഇസ്ലാമിക് റിപ്പബ്ലിക് ഭരണകൂടത്തെ സാമ്പത്തികമായും രാഷ്ട്രീയമായും ഒറ്റപ്പെടുത്തുക എന്നതാണ് ഇതിന്റെ പ്രധാന ലക്ഷ്യം. ഇതിന്റെ ഭാഗമായി ഇറാനുമായി വ്യാപാരബന്ധം പുലർത്തുന്ന രാജ്യങ്ങൾക്ക് മേൽ 25 ശതമാനം വരെ താരിഫ് ഏർപ്പെടുത്തുമെന്ന് അദ്ദേഹം അടുത്തിടെ മുന്നറിയിപ്പ് നൽകിയിട്ടുണ്ട്.
ഇറാനിൽ നടക്കുന്ന ആഭ്യന്തര പ്രക്ഷോഭങ്ങൾക്ക് പരസ്യമായ പിന്തുണ നൽകുന്ന നിലപാടാണ് ട്രംപ് സ്വീകരിച്ചിട്ടുള്ളത്. “സഹായം ഉടൻ എത്തും” എന്നും “പ്രതിഷേധം തുടരുക” എന്നും അദ്ദേഹം സമൂഹമാധ്യമങ്ങളിലൂടെ ആഹ്വാനം ചെയ്തിരുന്നു. പ്രക്ഷോഭകർക്കെതിരെ ഇറാൻ ഭരണകൂടം സൈനിക നടപടി സ്വീകരിക്കുകയോ വധശിക്ഷ നടപ്പാക്കുകയോ ചെയ്താൽ അമേരിക്ക ശക്തമായി ഇടപെടുമെന്ന് അദ്ദേഹം മുന്നറിയിപ്പ് നൽകി. ഇത് കേവലം വാക്കുകളിൽ ഒതുങ്ങില്ലെന്നും സൈനിക നീക്കങ്ങൾ ഉൾപ്പെടെയുള്ള കാര്യങ്ങൾ അമേരിക്കയുടെ പരിഗണനയിലുണ്ടെന്നും റിപ്പോർട്ടുകൾ സൂചിപ്പിക്കുന്നു.
ഖുമേനി ഭരണകൂടത്തെ അട്ടിമറിച്ച് ഇറാനിൽ ഭരണമാറ്റം കൊണ്ടുവരുമെന്ന അഭ്യൂഹങ്ങൾ പൂർണ്ണമായും തള്ളിക്കളയാനാവില്ല. തന്റെ സോഷ്യൽ മീഡിയ പോസ്റ്റുകളിൽ പ്രതിഷേധക്കാരെ സ്ഥാപനങ്ങൾ പിടിച്ചെടുക്കാൻ അദ്ദേഹം പ്രേരിപ്പിച്ചിട്ടുണ്ട്. ഔദ്യോഗികമായി ‘ഭരണമാറ്റം’ അമേരിക്കയുടെ നയമാണെന്ന് പ്രഖ്യാപിച്ചിട്ടില്ലെങ്കിലും, ട്രംപിന്റെ പ്രവർത്തനങ്ങളും പ്രസ്താവനകളും വിരൽ ചൂണ്ടുന്നത് നിലവിലെ ഭരണകൂടത്തിന്റെ പതനത്തിലേക്കാണ്. വെനസ്വേല പോലുള്ള രാജ്യങ്ങളിൽ അമേരിക്ക നടത്തിയ ഇടപെടലുകൾ ഇറാനിലും ആവർത്തിക്കപ്പെടുമോ എന്ന ആശങ്ക അന്താരാഷ്ട്ര തലത്തിൽ ശക്തമാണ്.
അതേസമയം, ട്രംപിന്റെ ഈ നീക്കങ്ങൾക്കെതിരെ ഇറാൻ കടുത്ത പ്രതിരോധമാണ് ഉയർത്തുന്നത്. അമേരിക്കയുടേത് ആഭ്യന്തര കാര്യങ്ങളിലുള്ള ഇടപെടലാണെന്നും ഏതൊരു വിദേശ നീക്കത്തെയും സൈനികമായി നേരിടുമെന്നും ഇറാൻ വിദേശകാര്യ മന്ത്രാലയം വ്യക്തമാക്കിയിട്ടുണ്ട്. അമേരിക്കയുടെ ഭീഷണികൾക്കിടയിലും തങ്ങൾ പിന്മാറില്ലെന്ന സൂചനയാണ് ആയത്തുള്ള ഖൊമേനിയും സൈന്യവും നൽകുന്നത്. എന്നാൽ പ്രതിഷേധക്കാരെ വധിക്കുന്നത് നിർത്തിവെക്കുമെന്ന് ഇറാൻ ഉറപ്പുനൽകിയതായി ട്രംപ് കഴിഞ്ഞ ദിവസം അവകാശപ്പെട്ടത് സംഘർഷാവസ്ഥയിൽ നേരിയ അയവ് വരുത്തിയിട്ടുണ്ട്.
ട്രംപിന്റെ രണ്ടാം ഭരണകാലത്ത് ഇറാൻ നയം കൂടുതൽ കർക്കശമായിരിക്കുകയാണ് എന്നാണ് ഇപ്പോൾ ലഭിക്കുന്ന സൂചനകൾ. സാമ്പത്തിക ഉപരോധങ്ങളിലൂടെ ഇറാനെ തകർക്കാനും ഒപ്പം ജനകീയ പ്രക്ഷോഭങ്ങൾക്ക് വളമിട്ട് ഭരണകൂടത്തെ അസ്ഥിരപ്പെടുത്താനുമാണ് അദ്ദേഹം ശ്രമിക്കുന്നത്. ഒരു നേരിട്ടുള്ള യുദ്ധത്തേക്കാൾ, ആഭ്യന്തരമായ തകർച്ചയിലൂടെ ഭരണമാറ്റം കൊണ്ടുവരിക എന്ന തന്ത്രമാണ് ട്രംപ് ഇപ്പോൾ പയറ്റുന്നത്. എങ്കിലും മേഖലയിലെ സങ്കീർണ്ണമായ സാഹചര്യം കണക്കിലെടുക്കുമ്പോൾ, ഈ നീക്കങ്ങൾ എത്രത്തോളം വിജയിക്കും എന്നത് വരും ദിവസങ്ങളിലെ സംഭവവികാസങ്ങളെ ആശ്രയിച്ചിരിക്കും എന്നാണ് രാഷ്ട്രീയ നിരീക്ഷകർ വിലയിരുത്തുന്നത്.
