ബിഗ് ബോസ് സീസൺ 7ന്റെ ആദ്യ ആഴ്ചയിൽ മാസ് ഡയലോഗായിരുന്നു രേണു സുധിയിൽ നിന്ന് വന്നത്. രേണു സുധി ഫ്ളവർ അല്ലടാ, ഫയറാട, താഴത്തില്ലടാ എന്ന് പറഞ്ഞായിരുന്നു ഹൗസിനുള്ളിൽ എത്ര ആക്രമിക്കപ്പെട്ടാലും വിട്ടുകൊടുക്കില്ല എന്ന് രേണു പ്രഖ്യാപിച്ചത്. എന്നാൽ രണ്ടാം ആഴ്ച ആരംഭിക്കുമ്പോൾ കാര്യങ്ങൾ കീഴ്മേൽ മറിഞ്ഞിരിക്കുകയാണ്. വയ്യ എന്ന് രേണു മറ്റ് മത്സരാർഥികളോട് പറഞ്ഞു.
“എന്റെ ഹെൽത്ത് തീരെ ഓക്കെ അല്ല. എനിക്കിനി വയ്യ. വീട്ടിൽ പോയാൽ മതിയെന്നായി”, ഇങ്ങനെ രേണു സുധി കഴിഞ്ഞ എപ്പിസോഡിൽ പറഞ്ഞതോടെ താരം പുറത്തേക്ക് പോകുമോ എന്ന ചോദ്യമാണ് ശക്തമാവുന്നത്. മിഡ് വീക്ക് എവിക്ഷനിലൂടെ പുറത്ത് പോകാൻ സാധ്യത കൂടുതൽ രേണുവിന് ആണെന്നാണ് സമൂഹമാധ്യമങ്ങളിൽ കൂടുതൽ പേരുടേയും പ്രതികരണം.
കാരണം മിഡ് വീക്ക് എവിക്ഷനിൽ ടാസ്കിൽ തോൽക്കുന്ന രണ്ട് പേരാണ് പുറത്തേക്ക് പോവുക. ബിഗ് ബോസിൽ ഇതുവരെയുള്ള ടാസ്കുകളിൽ രേണു സുധി വലിയ രീതിയിലുള്ള മത്സരം ഒന്നും പുറത്തെടുത്തിട്ടില്ല. അതുകൊണ്ട് തന്നെ നിലവിൽ ആരോഗ്യനില മോശമാണ് എന്ന് രേണു പറയുന്ന കൂടി സാഹചര്യത്തിൽ ഇവർക്ക് മിഡ് വീക്ക് എവിക്ഷനിൽ നിന്ന് രക്ഷപെടാനുള്ള ടാസ്കിൽ ജയിക്കാനുള്ള സാധ്യത കുറവാണ്.
ബിഗ് ബോസ് രണ്ടാമത്തെ ആഴ്ചയിലേക്ക് എത്തുമ്പോഴും വലിയ കണ്ടന്റുകളൊന്നും സൃഷ്ടിക്കാൻ രേണു സുധിക്ക് സാധിച്ചിട്ടില്ല. അക്ബർ ഖാൻ നടത്തിയ മോശം പരാമർശം, തലവേദനയെ ചൊല്ലിയുള്ള തർക്കം, അനീഷിനെതിരായ വാക് പോര് എന്നിങ്ങനെയുള്ള നിമിഷങ്ങൾ അല്ലാതെ രേണു സുധിയിൽ നിന്ന് മറ്റ് കണ്ടന്റുകൾ പ്രേക്ഷകരുടെ ശ്രദ്ധ പിടിച്ച് എത്തിയിട്ടില്ല.
മാത്രമല്ല വീക്കെൻഡ് എപ്പിസോഡിൽ രേണുവിന്റെ വോട്ട് അഭ്യർഥിച്ചുള്ള വിഡിയോ മോഹൻലാൽ കാണിക്കുകയും ചെയ്തതത് ഇവർക്ക് തിരിച്ചടിയായി. എന്നാൽ പ്രേക്ഷകരുടെ വോട്ടിങ്ങിലേക്ക് വന്നാൽ രേണു സുധിക്ക് ആശങ്കപ്പെടാനുള്ള സാഹചര്യം ഇല്ലെന്നാണ് റിപ്പോർട്ടുകൾ.
