പരിണാമം എന്നത് ഒരു തുടർപ്രക്രിയയാണ്. കാലത്തിനും സാഹചര്യങ്ങൾക്കുമനുസരിച്ച് ഭൂമിയിലെ എല്ലാ ജീവജാലങ്ങളും പതിയെ മാറ്റത്തിന് വിധേയമാകും. പരിണാമത്തെ അതിജീവിക്കാൻ സാധിക്കാത്ത ജീവജാലങ്ങളെ പ്രകൃതി തന്നെ ഇല്ലാതാക്കുന്നു. ഇത് ലക്ഷക്കണക്കിന് വർഷങ്ങളായി തുടർന്നുകൊണ്ടേയിരിക്കുന്ന പ്രകൃതിപ്രവർത്തനമാണ്. അതിൽനിന്ന് മനുഷ്യർക്ക് മാത്രമായി മാറിനിൽക്കാനാകില്ല. അടുത്ത ആയിരം വർഷങ്ങൾ കഴിയുമ്പോൾ ഇപ്പോൾ കാണപ്പെടുന്നത് പോലെയാകില്ല മനുഷ്യരെന്നാണ് ഗവേഷകരുടെ അഭിപ്രായം. മനുഷ്യർ ഉയരം കുറഞ്ഞവരാകും. കറുത്തവരും വെളുത്തവരുമെന്ന വ്യത്യാസം മാഞ്ഞുപോകും. ത്വക്കിന്റെ നിറം എല്ലാമനുഷ്യർക്കും ഏതാണ്ട് ഒരേപോലെയാകും. ഭൂമിയിലെ മനുഷ്യരുടെ ഘടനയും ഏകദേശം ഏകരൂപമായിത്തീരും. എന്നാൽ ഇതൊക്കെ സംഭവിക്കുമ്പോഴും മനുഷ്യർ കൂടുതൽ സൗന്ദര്യമുള്ളവരായി മാറുമെന്നും ഗവേഷകർ പറയുന്നു.
ഇവല്യൂഷണറി ജെനെറ്റിസിസ്റ്റ് ആയ പ്രൊഫ. മാർക്ക് ജി തോമസിന്റെ അഭിപ്രായപ്രകാരം മനുഷ്യർ ഭാവിയിൽ പൊക്കം കുറഞ്ഞവരാകുമെന്നാണ്. കൂടുതൽ കുട്ടികളുണ്ടാകുന്നവരുടെ ജനിതകപാരമ്പര്യമാണ് നിലനിൽക്കുക. പണ്ട് ആളുകൾക്ക് ശരാശരി ആയുർദൈർഘ്യം കുറവായിരുന്നതുകാരണം ഇന്ന് നിലനിൽക്കുന്നവർ ആ കാലത്തെ അതിജീവിച്ചവരുടെ പിൻഗാമികളാണ്. എന്നാൽ ആധുനിക വൈദ്യശാസ്ത്രത്തിൻറെ വളർച്ചയ്ക്കനുസരിച്ച് പല രോഗങ്ങൾക്കും ചികിത്സയോ പരിഹാരമോ കണ്ടെത്താൻ സാധിക്കും. ഇതോടെ അടുത്ത തലമുറയെ സൃഷ്ടിക്കാൻ അവർക്ക് കൂടുതൽ കാലം ജീവിക്കാൻ സാധിക്കുമെന്ന നിലവരും. അങ്ങനെ വരുമ്പോൾ ഏതൊക്കെ ജീനുകളാണ് അടുത്ത തലമുറയിലേക്ക് കൈമാറ്റപ്പെടുകയെന്നതിൽ പ്രകൃതി മറ്റൊരു തീരുമാനത്തിലേക്കെത്തും. അങ്ങനെ വരുമ്പോൾ പ്രത്യുത്പാദനത്തിന് യോഗ്യമാകുന്ന പ്രായം വളരെ കുറഞ്ഞെന്ന് വരാം. നേരത്തെ പ്രായപൂർത്തിയാകുന്നത് പിന്നീട് ശാരീരിക വളർച്ചയുടെ വേഗത കുറയ്ക്കും. അങ്ങനെ സംഭവിച്ചാൽ ആളുകൾക്ക് പൊക്കം കുറഞ്ഞെന്നും വരാം. നേരത്തെ പ്രായപൂർത്തിയാകുന്നവർക്ക് കൂടുതൽ കുട്ടികളുണ്ടാകാനുള്ള സാധ്യത കൂടുതലാണ്. അങ്ങനെ വരുമ്പോൾ സമൂഹത്തിൽ ഉയരം കുറഞ്ഞവരുടെ എണ്ണം കൂടുന്നതിന് കാരണമാകുമെന്നും പ്രൊഫ. മാർക്ക് ജി തോമസിൻറെ സിദ്ധാന്തമിങ്ങനെ. ഇതൊരു തിയറി മാത്രമാണെന്നും അദ്ദേഹം പറഞ്ഞുവെയ്ക്കുന്നുണ്ട്. ലണ്ടൺ യൂണിവേഴ്സിറ്റി കോളേജ് പ്രൊഫസറാണ് മാർക്ക് ജി. തോമസ്.
പൊക്കം കുറഞ്ഞാലും കാണാൻ അഴകുള്ളവരായി മാറുമെന്നാണ് ഇദ്ദേഹത്തിന്റെ അഭിപ്രായം. ശാസ്ത്രം വളരുമ്പോൾ മരണം സംഭവിക്കുന്നതിന്റെ കാരണങ്ങൾ കുറയുന്നു. ഇതോടെ സ്ത്രീകൾക്ക് തങ്ങളുടെ പങ്കാളികളെ തിരഞ്ഞെടുക്കാൻ ഒരുപാട് ഓപ്ഷനുകൾ ലഭിക്കുന്നു. അതിൽ കഴിവും സൗന്ദര്യവും കരുത്തും കൂടുതലുള്ള പുരുഷന്മാർ അതിജീവിക്കും. അങ്ങനെ വരുമ്പോൾ അതിജീവിച്ചവരുടെ ജീനുകൾ കൂടുതലായി പങ്കുവെക്കപ്പെടും. അപ്പോൾ സമൂഹത്തിൽ സൗന്ദര്യമുള്ളവരുടെ എണ്ണം കൂടും- പ്രൊഫസർ പറയുന്നു.
