എച്ച്-1ബി വിസ പ്രോഗ്രാം പൂർണ്ണമായും ഇല്ലാതാക്കുന്നതിനുള്ള ബിൽ അവതരിപ്പിക്കാൻ ഒരുങ്ങി റിപ്ലബിക്കൻ പാർട്ടി അംഗം മാജറി ടെയ്‌ല ഗ്രീൻ . ഈ പ്രോഗ്രാം ഇല്ലാതാക്കുന്നത് വിദേശികൾക്ക് യുഎസിലേക്ക് വരാനും എച്ച്-1ബി വിസകൾ വഴി പൗരത്വം നേടാനുമുള്ള വഴി അടയ്ക്കുമെന്ന് ഗ്രീൻഎക്‌സിൽ പങ്കിട്ട വീഡിയോയിൽ ജോർജിയയിൽനിന്നുള്ള ജനപ്രതിനിധി മാജറി ടെയ്‌ല പറഞ്ഞു.
ജോലിക്കായി യുഎസിലേക്ക് വരുന്ന വിദേശികൾക്ക് അവരുടെ വിസ കാലാവധി കഴിയുമ്പോൾ തിരിച്ചു പോകാൻ കഴിയുന്ന തരത്തിൽ നിയമം മാറ്റണമെന്ന് ടെയ്‌ല പറയുന്നു .യുഎസിലെ ജനങ്ങളുടെ ജീവൻ രക്ഷിക്കുന്ന, അവർക്കു പരിചരണം നൽകുന്ന ഡോക്ടർമാർ, നഴ്സുമാർ തുടങ്ങിയ മെഡിക്കൽ പ്രഫഷനലുകൾക്കു നൽകുന്ന വീസകൾക്കു പ്രതിവർഷം 10,000 എന്ന പരിധി അനുവദിക്കുന്ന ഒരു ഇളവു മാത്രമേ തന്റെ ബില്ലിൽ ഉണ്ടാകൂ എന്നാണ് മാജറി ടെയ്‌ല ഗ്രീനിന്റെ നിലപാട്.
ഈ ബിൽ പാസായാൽ, ഏകദേശം 70% H-1B വിസകളുടെയും ഗുണഭോക്താക്കളായ ഇന്ത്യൻ ടെക് ജീവനക്കാരെയും പ്രൊഫഷണലുകളെയും ഇത് സാരമായി ബാധിക്കും. നിലവിൽ, 2024 സാമ്പത്തിക വർഷത്തിൽ മാത്രം 2,83,397 ഇന്ത്യൻ പൗരന്മാർക്കാണ് H-1B വിസ ലഭിച്ചത്.
ഗ്രീനിന്റെ ബില്ലിലെ പ്രധാന നിർദ്ദേശങ്ങൾ:
H-1B നിർത്തലാക്കൽ: ടെക്നോളജി, എഞ്ചിനീയറിംഗ്, നിർമ്മാണ മേഖലകൾ ഉൾപ്പെടെ എല്ലാ മേഖലകളിലും പ്രോഗ്രാം ഘട്ടം ഘട്ടമായി നിർത്തലാക്കും.
മെഡിക്കൽ ഇളവ്: ഡോക്ടർമാർക്കും നഴ്സുമാർക്കുമായി 10 വർഷത്തേക്ക് പ്രതിവർഷം 10,000 വിസകൾ അനുവദിക്കും. ഈ ഇളവും പിന്നീട് പൂർണ്ണമായി അവസാനിപ്പിക്കും.
സ്ഥിരതാമസം ഇല്ലാതാകും: H-1B വിസയിലുള്ളവർക്ക് ഗ്രീൻ കാർഡിനോ പൗരത്വത്തിനോ അപേക്ഷിക്കാനുള്ള വഴികൾ പൂർണ്ണമായും ഇല്ലാതാക്കും. വിസ കാലാവധി കഴിയുമ്പോൾ അവർക്ക് സ്വന്തം നാട്ടിലേക്ക് മടങ്ങേണ്ടിവരും.
റെസിഡൻസി നിയന്ത്രണം: മെഡിക്കെയർ ഫണ്ടിൽ പ്രവർത്തിക്കുന്ന റെസിഡൻസി പ്രോഗ്രാമുകളിൽ വിദേശ മെഡിക്കൽ വിദ്യാർത്ഥികളുടെ പ്രവേശനം നിരോധിക്കും. (2023-ൽ 5,000-ൽ അധികം വിദേശ ഡോക്ടർമാർ റെസിഡൻസി നേടിയ സാഹചര്യത്തിൽ).
മാജറി ടെയ്‌ലർ ഗ്രീൻ തൻ്റെ നീക്കത്തെ ന്യായീകരിക്കുന്നത് “അമേരിക്ക ഫസ്റ്റ്” എന്ന തത്വത്തിൽ ഊന്നിയാണ്. ബിഗ് ടെക്, എഐ കമ്പനികൾ H-1B സംവിധാനം ദുരുപയോഗം ചെയ്ത് ലാഭം നേടുന്നുവെന്നും, അമേരിക്കൻ ജനതയാണ് ഏറ്റവും കഴിവുള്ളവരെന്നും അവർ കൂട്ടിച്ചേർത്തു.
